spot_img
Homeຂ່າວການພັດທະນານາຍົກເນັ້ນ! ໂຄງການສ້າງດາວທຽມດວງທຳອິດຂອງລາວ ໃຫ້ສຳເລັດທ້າຍປີນີ້!

ນາຍົກເນັ້ນ! ໂຄງການສ້າງດາວທຽມດວງທຳອິດຂອງລາວ ໃຫ້ສຳເລັດທ້າຍປີນີ້!

Published on

20150317150233

ກອງ​ປະຊຸມ​ວຽກ​ງານ​ໄປສະນີ ໂທລະ​ຄົມ ແລະ ການ​ສື່ສານ ແລະ ກອງ​ປະຊຸມ​ເຕັກ​ໂນ​ໂລ​ຊີ​ສື່ສານ​ຂໍ້​ມູນ​ຂ່າວສານ ປະຈຳ​ປີ 2014 ໄດ້​ຈັດ​ຂຶ້ນ​ວັນ​ທີ 16-17 ມີນາ 2015 ທີ່​ຫໍ​ປະຊຸມ​ແຫ່ງ​ຊາດ ເປັນ​ປະທານ​ຂອງ​ທ່ານ ຫຽມ ພົມມະຈັນ ລັດຖະມົນຕີ​ວ່າການ ກະຊວງໄປສະນີ ໂທລະ​ຄົມມະນາ​ຄົມ ແລະ ການ​ສື່ສານ ເປັນກຽດ​ເຂົ້າ​ຮ່ວມ​ຂອງ​ທ່ານ ທອງ​ສິງ ທຳ​ມະ​ວົງ ນາຍົກລັດຖະມົນຕີ ພ້ອມ​ດ້ວຍ​ລັດຖະມົນຕີ​ຊ່ວຍ​ວ່າການ ທ່ານ​ຮອງ​ເຈົ້າແຂວງ ພະນັກ​ງານ-ລັດຖະກອນ​ອ້ອມ​ຂ້າງ ແລະ ບັນດາ​ຜູ້​ປະກອບ​ການ​ດ້ານໄປສະນີ ໂທລະ​ຄົມມະນາຄົມ.

ກອງ​ປະຊຸມ​ດັ່ງກ່າວ ​ໄດ້​ທົບທວນຄືນ​ຜົນສຳເລັດ​ໃນ​ການ​ປະຕິບັດ​ໜ້າທີ່ ​ຂອງ​ຂະແໜງການ​ໄປສະ​ນີ ໂທລະ​ຄົມມະນາຄົມ ແລະ ການ​ສື່ສານ ເປັນຕົ້ນ ໄດ້​ສຳເລັດການ​ປັບປຸງ​ນິຕິ​ກຳ​ອັນ​ເກົ່າ ແລະ ສ້າງ​ໃໝ່​ເພີ່ມ ເພື່ອ​ເປັນ​ເຄື່ອງມືອັນ​ສຳຄັນ​ ໃນ​ການຈັດຕັ້ງ​ປະຕິບັດວຽກ​ງານ​ໃຫ້​ເຂົ້າ​ສູ່​ລະບຽບ​ຫຼັກການ ໃນ​ນັ້ນ ໄດ້​ສຳເລັດ​ໃນ​ການປັບປຸງ​ກົດໝາຍ ​ວ່າ​ດ້ວຍ​ໂທລະຄົມມະນາຄົມ ແລະ ການ​ສື່ສານ ກົດໝາຍ​ວ່າ​ດ້ວຍ​ໄປສະນີ ດຳລັດວ່າ​ດ້ວຍ​ການ​ຄຸ້ມ​ຄອງ​ຂໍ້​ມູນ​ຂ່າວສານ​ຜ່ານ​ອິນ​ເຕີ​ເນັດ ໃນ​ການພັດທະນາ ແລະ ຂະຫຍາຍ​ພື້ນຖານ​ເຕັກນິກ​ຂອງ​ລະບົບ​ໄອ​ຊີ​ທີ ໃນ​ນັ້ນ ລວມ​ມີ​ການ​ຄຸ້ມ​ຄອງ​ລະບົບ​ສູນ​ສື່ສານ ​ທາງ​ດ້ານ​ເຕັກ​ໂນໂລ​ຊີ​ສື່ສານຂໍ້​ມູນ​ຂ່າວສານ ການ​ຄຸ້ມ​ຄອງ​ຄື້ນ​ຄວາມ​ຖີ່ ການຄຸ້ມ​ຄອງ​ລະບົບ​ສາຍ​ສົ່ງ​ດ້ານ​ໂທລະ​ຄົມມະນາຄົມ (ສາຍ​ໄຍ​ແກ້ວ) ການ​ດຳເນີນ​ບັນດາ​ໂຄງການ​ດາວ​ທຽມ​ລາວ ເຊິ່ງ​ມີ 2 ໂຄງການ ໃນ​ນັ້ນ ມີ​ໂຄງການ​ດາວທຽມ​ລາວ​ຕຳແໜ່ງ​ວົງ​ຈອນ 126E ອົງສາ​ຕາເວັນ​ອອກ ຮ່ວມ​ທຶນລະຫວ່າງລັດຖະບານ​ລາວ​ຖື​ຮຸ້ນ 30% ບໍລິສັດ ລິນ​ຮາຍ​ຂອງ​ຈີນ ຖື​ຮຸ້ນ 70% ແລະ ໂຄງການດາວ​ທຽມ​ຕຳແໜ່ງ​ວົງ​ໂຄຈອນ 128,5 ອົງສາ​ຕາເວັນ​ອອກ ທີ່ເປັນ​ການ​ລົງທຶນ​ຂອງ​ລັດຖະບານລາວ 100% ມາ​ຮອດ​ປັດຈຸບັນ ໄດ້​ກໍ່ສ້າງ​ສຳເລັດ​ລະບົບ​ຄຸ້ມ​ຄອງພາກ​ພື້ນ​ດິນ​ປະມານ 65% ແລະ ລະບົບ​ພາກ​ອາ​ວະ​ກາດ ສຳເລັດ 20% ແລະ ໄດ້​ນຳ​ສົ່ງ​ພະນັກງານ​ໄປ​ເຝິກອົບຮົມ​ຢູ່ ​ສປ ຈີນ ຈຳນວນ 50 ຄົນ ເພື່ອ​ມາ​ບັນຊາລະບົບ​ເຕັກນິກ ແລະ ການ​ບໍ​ລິການ​ດາວ​ທຽມ ພ້ອມ​ນັ້ນ ໄດ້​ຊຸກຍູ້​ຜູ້​ປະກອບ​ການ​ໃນ​ຂະແໜງການ​ດັ່ງກ່າວ​ ໃນ​ການ​ຂະຫຍາຍເຄືອ​ຂ່າຍ​ໄປ​ສູ່​ຊົນນະບົດ ​ຕາມ​ທິດສາມ​ສ້າງ​ຂອງ​ລັດຖະບານ ສ້າງບຸກ​ຄະລາ​ກອນ​ໃຫ້​ມີ​ຄວາມ​ຮູ້ຄວາມ​ສາມາດ​ສູງ​ຂຶ້ນ ​ໃນ​ການຄຸ້ມ​ຄອງ ແລະ ນຳ​ໃຊ້ ອຸປະກອນ​ເອ​ເລັກ​ໂຕຣ​ນິກ​ທີ່​ທັນ​ສະໄໝ ນອກ​ນັ້ນ​ຍັງ​ໄດ້​ອອກ​ນິຕິ​ກຳ​ລຸ່ມ ກົດໝາຍ​ຫຼາຍ​ສະບັບ ເພື່ອ​ຄຸ້ມຄອງ​ລຸ່ມ​ກົດໝາຍ ຄຽງ​ຄູ່​ກັບ​ຜົນສຳເລັດ​ດັ່ງກ່າວ​ນັ້ນ ກໍ່​ຍັງ​ມີ​ຂໍ້​ຄົງຄ້າງ ແລະ ສິ່ງ​ທ້າ​ທາຍ ທີ່​ກະຊວງ​ດັ່ງກ່າວ​ ໄດ້​ເອົາ​ມາ​ເປັນ​ແຜນການ​ເພື່ອ​ສູ້​ຊົນ​ປະຕິບັດ​ໃຫ້​ສຳເລັດ​ໃນຕໍ່ໜ້າ.

ໃນ​ຕອນ​ທ້າຍ​ກອງ​ປະຊຸມ ທ່ານນາຍົກລັດຖະມົນຕີ ໄດ້​ໃຫ້​ກຽດໂອ້​ລົມ ແລະ ໃຫ້​ທິດ​ຊີ້​ນຳ ໃນການເຄື່ອນໄຫວ​ວຽກ​ງານໄອ​ຊີທີ ໃຫ້​ບັນລຸ​ຕາມ​ຄຳ​ຂວັນ “ຊຸກຍູ້​ການ​ນຳ​ໃຊ້​ໄອ​ຊີ​ທີ ໃນ​ທົ່ວ​ຂະແໜງ​ການ ແລະ ທົ່ວ​ສັງຄົມ ໃຫ້ເກີດ​ຜົນ​ປະໂຫຍດ​ສູງ ແລະ ປອດໄພ” ໂດຍ​ໄດ້​ເນັ້ນ​ໃຫ້​ຂະແໜງການ​ດັ່ງກ່າວ ​ບຸກ​ບືນ​ເດີນ​ໜ້າພັດທະນາ​ວຽກ​ງານ​ນີ້ ​ໃຫ້​ມີ​ປະສິດທິ​ພາບ​ທຽບ​ທັນ​ກັບ​ສາກົນ ປັບປຸງ​ຄືນ​ນະໂຍບາຍ​ແຫ່ງ​ຊາດ ດ້ານ​ໄອ​ຊີ​ທີ ແລະ ສ້າງ​ນະ​ໂຍບາຍ​ແຫ່ງ​ຊາດ​ດ້ານ​ການ​ສື່ສານຄວາມ​ໄວ​ສູງ ​ໃຫ້​ແທດເໝາະ​ກັບສະພາບ​ໃໝ່​ ເພື່ອ​ເປັນ​ທິດ​ໃຫ້​ແຕ່ລະ​ພາກສ່ວນ ​ຈັດ​ຕັ້ງ​ປະຕິບັດຕາມ​ລວງ​ດຽວ ແລະ ເປັນ​ເອກະພາບ ທັງ​ຕ້ອງ​ເລັ່ງ​ສ້າງ​ກົດໝາຍ ແລະ ນິຕິ​ກຳ​ລຸ່ມ​ກົດໝາຍ​ດ້ານໄອ​ຊີ​ທີ​ໃຫ້​ຄົບ​ຖ້ວນ ເພື່ອ​ຫັນ​ການຄຸ້ມ​ຄອງ​ລັດ​ດ້ານ​ໄປສະນີ ແລະ ໂທລະ​ຄົມມະນາຄົມ ດ້ວຍ​ກົດໝາຍ ໂດຍ​ສະເພາະແມ່ນ​ກົດໝາຍ​ຕ້ານ​ອາ​ຊະ​ຍາ​ກຳ​ທາງຄອມ​ພິວ​ເຕີ ແລະ ກົດໝາຍ​ໄອຊີ​ທີ ສືບຕໍ່​ເຜີຍແຜ່ ແລະ ສ້າງຄວາມ​ເຂົ້າໃຈ​ໃຫ້​ສັງຄົມ​ຕໍ່​ການນຳ​ໃຊ້​ສື່​ສັງຄົມ​ອອນ​ລາຍ ຢ່າງ​ມີຈັນ​ຍາ​ບັນ ມີ​ຄວາມ​ຮັບຜິດຊອບ ສົ່ງເສີມ​ການ​ນຳ​ໃຊ້​ທີ່​ດີ ມີ​ປະໂຫຍດ ແລະ ຈຳກັດ​ດ້ານ​ຫຍໍ້ທໍ້ຕ່າງໆ ແລະ ສືບຕໍ່​ຊີ້​ນຳ​ດັດສົມການ​ດຳເນີນ​ທຸລະ​ກິດ​ ຂອງ​ບັນດາວິ​ສາ​ຫະ​ກິດ​ທີ່​ຂຶ້ນ​ກັບ ເພື່ອ​ຍົກສູງ​ການ​ບໍລິການ​ທີ່​ມີ​ຄຸນະພາບ ທັນ​ສະໄໝ ມີ​ຜົນ​ກຳໄລ​ທີ່​ຖືກຕ້ອງ ແລະ ມີ​ຄວາມ​ສະເໝີພາບ​ພາຍໃຕ້​ກົດໝາຍ ເອົາໃຈໃສ່​ພັດ​ທະນາ​ບຸກ​ຄະລາ​ກອນ​ໃຫ້​ເປັນ​ລະບົບ ມີ​ທັງ​ຄຸນະພາບ ແລະ ປະລິມານ ເລັ່ງ​ປັບປຸງ​ສະ​ຖາ​ບັນ​ໄປສະນີ ໂທລະ​ຄົມມະນາຄົມ ແລະ ການ​ສື່ສານ ​ໃຫ້​ມີ​ຫຼັກສູດ​ການ​ຮຽນ​ການສອນ​ທີ່​ຄົບ​ຖ້ວນ​ສົມບູນ ສ້າງກອງ​ທຶນ​ໄອ​ຊີ​ທີ ແລະ ເລັ່ງ​ຈັດ​ຕັ້ງປະຕິບັດ​ໂຄງການ​ດາວ​ທຽມ​ດວງທຳ​ອິດ​ຂອງ​ລາວ​ ໃຫ້​ສາມາດ​ສົ່ງຂຶ້ນ​ວົງ​ໂຄຈອນ​ ຕາມ​ແຜນການ​ທີ່ກຳນົດ​ໄວ້ໃນ​ເດືອນ​ພະຈິກ 2015 ເພື່ອ​ເປັນ​ຂອງຂວັນ​ເອກ​ທະ​ນົງ​ໃຈໃຫ້​ແກ່​ປະຊາຊົນ ແລະ ປະເທດຊາດ ແລະ ເພື່ອ​ຄຳນັບ​ຮັບ​ຕ້ອນສອງ​ວັນ​ປະຫວັດສາດ.

 

ແຫລ່ງ​ຂ່າວ: ວຽງ​ຈັນ​ໃໝ່

 

ບົດຄວາມຫຼ້າສຸດ

ຍຶດຢາບ້າຈຳນວນ 101 ເປົາ ເທົ່າກັບ 20.200.000 ເມັດ, ນໍ້າໜັກ 2.020 ກິໂລກຼາມ.

ກອງບັນຊາການ ປກສ ແຂວງບໍ່ແກ້ວ ຍຶດຂອງກາງ ຢາບ້າຈຳນວນ 101 ເປົາ ເທົ່າກັບ 20.200.000 ເມັດ, ນໍ້າໜັກ 2.020 ກິໂລກຼາມ. ໃນຄັ້ງວັນທີ 21...

ປກສ ນະຄອນໄກສອນ ພົມວິຫານ ຈັບຜູ້ສໍ້ໂກງ ແລະ ລັກຊັບ

ເຈົ້າໜ້າທີ່ ປກສ ນະຄອນໄກສອນ ພົມວິຫານ ແຂວງສະຫວັນນະເຂດ ໄດ້ຈັບທ້າວ ວັນນະລາດ ອາຍຸ 55 ປີ ອາຊີບກຳມະກອນ ເຊື້ອຊາດ-ສັນຊາດລາວ ບ້ານເກີດໂພນໄຊ ເມືອງໂພນໂຮງ...

ກອງທັບປະຊາຊົນລາວ ເດີນທາງເຂົ້າຮ່ວມ ພິທີສະເຫຼີມສະຫຼອງ ວັນປົດປ່ອຍພາກໃຕ້ ສສ ຫວຽດນາມ.

ກ້ອນກຳລັງສວນສະໜາມ ກອງທັບປະຊາຊົນລາວ ເດີນທາງເຂົ້າຮ່ວມ ພິທີສະເຫຼີມສະຫຼອງ ວັນປົດປ່ອຍພາກໃຕ້ ສສ ຫວຽດນາມ. ວັນທີ 19 ເມສາ 2025 ນີ້, ກ້ອນກໍາລັງສວນສະໜາມ ກອງທັບປະຊາຊົນລາວ ໄດ້ເດີນທາງເຂົ້າຮ່ວມພິທີສະເຫຼີມສະຫຼອງ...

7 ວັນອັນຕະລາຍ ໃນໄລຍະບຸນປີໃໝ່ເກີດອຸບັດຕິເຫດທົ່ວປະເທດ 313 ຄັ້ງ ເສຍຊີວິດທັງໝົດ 26 ຄົນ

ເສຍຊີວິດ 26 ຄົນ ຈາກອຸບັດຕິເຫດທີ່ເກີດຂຶ້ນທົ່ວປະເທດ 313 ຄັ້ງ ໃນໄລຍະບຸນປີໃໝ່ລາວ 2025. ພັອ ແກ້ວມາລາ ແສງທອງ ຮອງຫົວໜ້າກົມຕຳຫຼວດຈະລາຈອນ ກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ ໄດ້ຖະແຫຼງຕໍ່ສື່ມວນຊົນ...