ໂດຍຕອບສະໜອງຕາມຄຳເຊື້ອເຊີນຂອງ ຜູ້ວ່າຣາຊະການກຸງເທບມະຫານະຄອນ ໃນນາມປະທານກອງປະຊຸມ ຄະນະຜູ້ແທນຂັ້ນສູງຂອງນະຄອນຫຼວງວຽງຈັນ ນຳໂດຍທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງວຽງຈັນ ພ້ອມຄະນະ ໄດ້ເດີນທາງ ແລະ ເຂົ້າຮ່ວມກອງປະຊຸມບັນດາການນຳຂັ້ນສູງຂອງປະເທດອາຊີ ແລະ ເອີຣົບ ຄັ້ງທີ III (3rd ASEM Mayors and Governors Meeting) ທີ່ຈັດຂຶ້ນຢູ່ນະຄອນຫຼວງບາງກອກ ປະເທດໄທ ໃນວັນທີ 11 ຫາ 13 ມີນາ 2015 ໂດຍມີຕົວແທນຈາກບັນດານະຄອນເຂົ້າຮ່ວມ 24 ນະຄອນ ແລະ ນະຄອນຫຼວງຂອງ 21 ປະເທດ ໃນນັ້ນ ມາຈາກອາຊີ 14 ປະເທດ ແລະ ອົງການຈັດຕັ້ງສາກົນ 2 ອົງການ.
ກອງປະຊຸມຄັ້ງນີ້ ໄດ້ດຳເນີນພາຍໃຕ້ຫົວຂໍ້ “ອາແຊັມ ກ້າວສູ່ທ້ອງຖິ່ນແຫ່ງການປ່ຽນແປງໃໝ່ ແລະ ການເກີດໃໝ່” ໂດຍໄດ້ຍົກເອົາ 3 ປະເດັນທີ່ສຳຄັນມາປຶກສາຫາລື ແລະ ແລກປ່ຽນບົດຮຽນນຳກັນ ເປັນຕົ້ນ ການໂຕ້ຕອບຕໍ່ຜົນກະທົບຈາກສິ່ງແວດລ້ອມ ການຈັດສັນການຄົມມະນາຄົມ ແລະ ການຂົນສົ່ງ ການຄຸ້ມຄອງການທ່ອງທ່ຽວ ແລະ ຄວາມຫຼາກຫຼາຍທາງດ້ານວັດທະນະທຳ.
ຜ່ານການດຳເນີນກອງປະຊຸມເປັນເວລາ 2 ວັນ ກໍ່ໄດ້ມີຖະແຫຼງການບາງກອກ ຄັ້ງທີ 3 ເຊິ່ງໄດ້ຮັບຮອງເອົາຜົນຂອງກອງປະຊຸມໃນ 3 ຫົວຂໍ້ທີ່ສຳຄັນນັ້ນ ເຊິ່ງເປັນບົດຮຽນອັນດີໃຫ້ແກ່ການວາງແຜນນະໂຍບາຍ ຍຸດທະສາດການພັດທະນາ ແລະ ການຮ່ວມມືແບບພາຄີໃນການປົກປ້ອງສິ່ງແວດລ້ອມ ການບໍລິຫານຈັດການ ແລະ ວາງແຜນຜັງພັດທະນາຕົວເມືອງ ປັບປຸງຊີວິດການເປັນຢູ່ ການຫຼຸດຜ່ອນຄວາມແອອັດ ການສັນຈອນຕິດຂັດ ການຍົກສູງຄຸນຄ່າຂອງການທ່ອງທ່ຽວ ໄປຄຽງຄູ່ກັບການອະນຸຮັກຄວາມຫຼາກຫຼາຍ ທາງດ້ານວັດທະນະທຳເພື່ອການທ່ອງທ່ຽວ.
ນອກນັ້ນ ກອງປະຊຸມຍັງໄດ້ຮັບຮອງໃຫ້ນະຄອນຫຼວງອູລັນບາຕໍ ປະເທດມົງໂກລີ ເປັນເຈົ້າພາບຈັດກອງປະຊຸມສຸດຍອດອາແຊັມ ຄັ້ງທີ XI ໃນເດືອນກໍລະກົດ 2016 ແລະ ເຫັນດີໃຫ້ນະຄອນຫຼວງລີສບອນ ປະເທດປອກຕຸຍການ ເປັນເຈົ້າພາບກອງປະຊຸມເຈົ້ານະຄອນ-ເຈົ້າຄອງນະຄອນຫຼວງບັນດາປະເທດ ອາຊີ ແລະ ເອີຣົບ ຄັ້ງທີ IV ໃນປີ 2017 ເຊິ່ງ 3 ຄັ້ງທີ່ຜ່ານມາ ແມ່ນຈັດຂຶ້ນທີ່ນະຄອນຫຼວງຈາກາຕາ ປະເທດສິງກະໂປ ແລະ ນະຄອນຫຼວງແບກແລັງ ປະເທດເຢຍລະມັນ.
ແຫລ່ງຂ່າວ: ວຽງຈັນໃໝ່