ພິທີລົງນາມສັນຍາຮັບເອົາໂຄງການບໍລິຫານລັດ ກ່ຽວກັບທີ່ດິນປະຈຳພາກພື້ນແມ່ນ້ຳຂອງ ໄດ້ຈັດຂຶ້ນວັນທີ 13 ມີນາ 2015 ຢູ່ໂຮງແຮມເມີກຽວ ລະຫວ່າງທ່ານ ດຣ. ກິແກ້ວ ຈັນທະບູຣີ ລັດຖະມົນຕີຊ່ວຍວ່າການກະຊວງແຜນການ ແລະ ການລົງທຶນ ແລະ ທ່ານ Manuel Sager ເລຂາທິການປະຈຳຫ້ອງວ່າການລັດຖະບານສະວິດ ຜູ້ອຳນວຍການໃຫຍ່ອົງການເພື່ອການພັດທະນາ ແລະ ການຮ່ວມມືປະເທດສະວິດ ໂດຍຊ້ອງໜ້າພະນັກງານກ່ຽວຂ້ອງ ແລະ ແຂກຖືກເຊີນ.
ໂຄງການບໍລິຫານລັດກ່ຽວກັບທີ່ດິນປະຈຳພາກພື້ນແມ່ນ້ຳຂອງ ມີຈຸດປະສົງເພື່ອສະໜັບສະໜູນການຈັດຕັ້ງປະຕິບັດນະໂຍບາຍກ່ຽວກັບທີ່ ດິນ ເພື່ອຮັບປະກັນບັນດາຄອບຄົວຊາວກະສິກອນຂອງລາວ ໃຫ້ມີສິດເຂົ້າເຖິງການນຳໃຊ້ທີ່ດິນ ແລະ ຊັບພະຍາກອນທຳມະຊາດ ສົ່ງເສີມປະຕິບັດວຽກງານຢ່າງມີປະສິດທິຜົນຂອງຄູ່ຮ່ວມງານ ໂດຍຜ່ານການຮຽນຮູ້ ເຊິ່ງຈະມີການສ້າງຕັ້ງຄູ່ຮ່ວມງານ ແລະ ການຮ່ວມມືໃນຂົງເຂດພາກພື້ນ ແລະ ສ້າງຄວາມເຂັ້ມແຂງ ຢູ່ໃນບັນດາປະເທດພາກພື້ນແມ່ນ້ຳຂອງ.
ການຈັດຕັ້ງປະຕິບັດໂຄງການນີ້ ຈະດຳເນີນແຕ່ຕົ້ນປີ 2015-ທ້າຍເດືອນມີນາ 2018 ມູນຄ່າໂຄງການ 12 ລ້ານໂດລາສະຫະລັດ ຫຼື ປະມານ 96 ຕື້ກີບ ໃນນີ້ ທຶນສະໜັບສະໜູນຈາກລັດຖະບານສະວິດ 8 ລ້ານໂດລາສະຫະລັດ ແລະ ລັດຖະບານເຢຍລະມັນ 3,5 ລ້ານເອີໂຣ ສຳລັບຜົນໄດ້ຮັບແມ່ນ ຈະເປັນການຍົກລະດັບຊີວິດການເປັນຢູ່ຂອງປະຊາຊົນລາວບັນດາເຜົ່າ ສາມາດເຂົ້າເຖິງສິດການນຳໃຊ້ທີ່ດິນ ຫຼຸດຜ່ອນຜົນກະທົບຕໍ່ການນຳໃຊ້ທີ່ດິນທີ່ບໍ່ມີປະສິດທິພາບໃນ ສປປ ລາວ ແລະ ບັນດາປະເທດພາກພື້ນແມ່ນ້ຳຂອງ ໂດຍຜ່ານການຈັດຫາຊ່ອງທາງແກ້ໄຂບັນຫາ ກ່ຽວກັບທີ່ດິນກະສິກຳໃຫ້ມີປະສິດທິພາບ ແລະ ໃຫ້ມີຄວາມຍືນຍົງ ທັງເປັນການປະກອບສ່ວນໃນການພັດທະນາຂອງ ສປປ ລາວ ໃຫ້ຫຼຸດພົ້ນອອກຈາກກຸ່ມປະເທດດ້ອຍພັດທະນາ ໃນປີ 2020.
ແຫລ່ງຂ່າວ: ວຽງຈັນໃໝ່