ທຸກມື້ນີ້ຄວາມຂາວກາຍເປັນມາດຕະຖານຄວາມງາມຂອງສາວໆໄປແລ້ວບໍ່ແມ່ນພຽງແຕ່ຂາວທຳມະດາຕ້ອງຂໍຂາວໆ,ຂາວບົວແບບດາລາສາວເກົາຫລີຊຶ່ງວິທີເຮັດໃຫ້ຂາວກໍຫລຸດໜ້າຕາມເຕັກໂນໂລຊີທີ່ຫຍັງກໍ່ໄດ້ຂໍໃຫ້ຂາວໄວທີ່ສຸດທາງລັດແບບການກິນອາຫານເສີມຈົນເຖິງຂັ້ນສີດສານອັນທີ່ເອີ້ນວ່າຢາທາງການແພດກໍໄດ້ນັ້ນຈຶ່ງກາຍເປັນທີ່ນິຍົມຂອງສາວໆຍຸກນີ້ຢ່າງຫລວງຫລາຍແລະກູຕ້າໄທໂອນ(Glutathione)ຍັງເປັນຜະລິດຕະພັນທີ່ຊອກຫາຊື້ກັນມາເຮັດໃຫ້ຜິວຂາວໄດ້ຕະຫລອດໄລຍະ4-5ປີທີ່ຜ່ານມາເຖິງວ່າຈະມີຂ່າວສີດສານແລ້ວຊັອກເສັຍຊີວິດຫລືລາຄາກູຕ້າບາງໂຕທີ່ແພງຫລາຍຊຶ່ງບໍ່ຮູ້ຊ້ຳວ່າຂອງເປັນຂອງແທ້ຫລືບໍ່ແຕ່ສາວໆຕັ້ງແຕ່ໄວໜຸ່ມຈົນເຖິງໄວເຮັດວຽກກໍຍັງຕິດຕໍ່ຂໍຊື້ຜ່ານທາງໂຊຊຽວມີເດຍກັນງ່າຍໆເພາະຄົົນທີ່ໃຊ້ໄດ້ຜົນມີຫລາຍກວ່າຄົົນທີ່ຜິດຫວັງ
ພິສູດຄວາມຂາວແບບເຜືອກ
ຈະໃຊ້ກູຕ້າກໍຄວນຮູ້ຈັກກັນແນ່ວ່າກູຕ້າເປັນໂປຕີນຂະໜາດນ້ອຍທີ່ປະກອບໄປດ້ວຍກົດອະມິໂນ3ຊະນິດຄືຊິດເທອີນ(Cysteine),ກູຕາມິກ(Glutamic Acid)ແລະໄກຊີນ(Glycine)ພົບໄດ້ທຸກຈຸລັງໃນຮ່າງກາຍມີບົດບາດສຳຄັນໃນກະບວນການເມຕາບໍລິຊຶ່ມຂອງຈຸລັງຊ່ວຍຕໍ່ຕ້ານອານຸມູນອິດສະຫລະປ້ອງກັນຄວາມເສື່ອມຂອງຈຸລັງອີກຢ່າງຍັງຊ່ວຍກະຕຸ້ນລະບົບພູມຄຸ້ມກັນແລະຊ່ວຍຕັບໃນການກຳຈັດສານພິດອອກຈາກຮ່າງກາຍທາງການແພດມີການນຳກູຕ້າມາສຶກສາແລະໃຊ້ເສີມການປິ່ນປົວພະຍາດກໍ່ຄືມະເຮັງ,ພາລກິນສັນ,ອັນໄຊເມີ,ພະຍາດຕັບ,ເອດເປັນຕົ້ນຫລັງພົບວ່າຜູ້ປ່ວຍພະຍາດເຫລົ່ານີ້ຈະມີລະດັບກູຕ້າຫລຸດລົງຢ່າງໃດກໍຕາມຫລັງນຳໄປໃຊ້ກັບຜູ້ປ່ວຍຜົນປາກົດວ່າພວກເຂົາມີຜິວຂາວຂຶ້ນດ້ວຍຄຸນສົມບັດທາງອ້ອມທີ່ໄປຍັບຍັ້ງການເຮັດວຽກງານຂອງຈຸລັງເມັດສີນີ້ເອງຈຶ່ງເປັນທີ່ມາຂອງການນຳກູຕ້າມາໃຊ້ໃນວົງການຄວາມງາມປະສິດທິພາບແລະປະໂຫຍດຂອງກູຕ້າ ໃນການເຮັດໃຫ້ຜິວຂາວກໍຍັງບໍ່ມີຜົນທາງວິທະຍາສາດຮອງຮັບຫລືຢືນຢັນຈຶ່ງບໍ່ໜ້າແປກໃຈທີ່ກູຕ້າບໍ່ຜ່ານການຮັບຮອງຂໍ້ບົ່ງໃຊ້ໂດຍອົງການອາຫານແລະຢາປະເທດສະຫະລັດອະເມລິກາວ່າເຮັດໃຫ້ຜິວຂາວໄດ້ແຕ່ທີ່ແນ່ນອນກໍຄືການກິນກູຕ້າໂດຍກົງເກືອບຈະບໍ່ໃຫ້ຜົນຫຍັງເລີຍສ່ວນການສີດເຂົ້າເສັ້ນເລືອດຫລືກ້າມຊີ້ນກໍສ່ຽງຕໍ່ຊີວິດທີ່ບໍ່ຄຸ້ມກັນ
ກິນແບບໃດຂາວໄດ້ແທ້
ແພດໝໍຕ່າງເວົ້າເປັນສຽງດຽວກັນວ່າການກິນກູຕ້າໂດຍກົງໃຫ້ຜົນບໍ່ຫລາຍໄປກວ່າ “ສູນ” ແພດໝໍອາເມລິກາບອລທາງເສັ້ນຜົມ,ຜິວໜັງ/ເລເຊີບອກວ່າການກິນສານກູຕ້າໂດຍກົງຈະບໍ່ສາມາດດູດຊຶມໄດ້ດີເທົ່າທີ່ຄວນການກິນອາຫານທີ່ມີສານວັດຖຸດິບກໍ່ຄືN-Acetyl Cysteineກັບຊ່ວຍກະຕຸ້ນໃຫ້ຮ່າງກາຍສ້າງກູຕ້າເອງໄດ້ດີກວ່າແລະສານນີ້ມີຢູ່ໃນອາຫານກໍ່ຄືໂຢເກີດ,ກາໂນລ່າ,ເຂົ້າໂອດແລະຄອດເທດຊີດຫລືຈະກິນສານນີ້ໃນຮູບແບບເມັດອາຫານເສີມກໍໄດ້ຊຶ່ງສອດຄ່ອງກັບທີ່Mark Hymanຂຽນໄວ້ໃນເວັບຂ່າວ Huffingtonpost ຕັ້ງແຕ່ເມື່ອກາງປີ2010ວ່າຖ້າຮ່າງກາຍຍ່ອຍໂປຕີນມັນຈະບໍ່ໄດ້ຜົນຖ້າເຮົາກິນກູຕ້າ ໂດຍກົງຊຶ່ງກໍເປັນໂປຕີນເຊັ່ນກັນ
ທັງນີ້ພວກເຂົາຍັງໃຫ້ເຄັດລັບ4ຂໍ້ໃນການກະຕຸ້ນໃຫ້ຮ່າງກາຍສ້າງກູຕ້າເພື່ອສຸຂະພາບທີ່ດີ (ແຕ່ເຮົາຫວັງຜົນຫລາຍກວ່ານັ້ນຄືເລື່ອງຄວາມຂາວນັ້ນເອງ)ນັ້ນກໍຄື
ໝັ່ນກິນອາຫານທີ່ອຸດົມດ້ວຍຊັນເຟີກໍ່ຄືກະທຽມ,ຫົວຜັກບົ່ວໃຫຍ່ແລະຜັກຕະກູນກະຫລ່ຳ ໄດ້ແກ່,ບັອກໂຄລີ,ຜັກກາດນາ,ດອກກະຫລ່ຳ,ກະຫລ່ຳປີ,ວໍເຕີເຄດ,ເປັນຕົ້ນ
ກິນໂປຕີນປະເພດBioactiveຊຶ່ງເປັນແຫລ່ງກົດອະມິໂນຊິດເທອີນ
ອອກກຳລັງເປັນປະຈຳເທື່ອລະ50ນາທີ3ເທື່ອຕໍ່ອາທິດໂດຍແອໂລບິກບຳລຸງຫົວໃຈ30 ນາທີເຊັ່ນຍ່າງໄວ,ແລ່ນ,ລອຍນໍ້າຫລືຂີ່ລົດຖີບ,ສະຫລັບກັນໄປແລະອອກກຳລັງເສີມຄວາມແຂງແຮງຂອງຮ່າງກາຍດ້ວຍການຍົກເວດອີກ20ນາທີ
ກິນອາຫານເສີມກໍ່ຄືN-AcetylCysteine, Alpha Lipoic Acid,ວິຕາມິນບີ 6ແລະ12,ຊີລີນຽມ, ວິຕາມິນຊີແລະອີແລະ Milk Thistleນີ້ກໍອາດຈະມີຄົນບອກວ່າເຄີຍກິນກູຕ້າແລ້ວໄດ້ຜົນແທ້ ຫລືໝູ່ກິນແລ້ວຂາວຫລາຍຖ້າແບບນັ້ນຕ້ອງຖາມກັບວ່າມີການເບິ່ງແຍງຕົວເອງອື່ນຮ່ວມນໍາຫລືບໍ່ໂດຍສະເພາະຢ່າງຍິ່ງໄລຍະນັ້ນຄຽດໜ້ອຍລົງແລະພັກຜ່ອນພຽງພໍນໍາແມ່ນບໍ່ ເພາະຄວາມຄຽດມີຜົນຕໍ່ກູຕ້າທີ່ຫລຸດລົງເຊັ່ນກັນ
ທີ່ສຳຄັນຄວາມຂາວທີ່ເຫັນນັ້ນເບິ່ງເປັນທຳມະຊາດດີຫລືບໍ່ເພາະສຸດທ້າຍແລ້ວຖ້າເຮົາຕ້ອງອາໃສຢາກູຕ້າໄປຕະຫລອດ,ການບໍລິໂພກຫຍັງທີ່ຫລາຍໄປໂດຍສະເພາະເຄມີນໍາແລ້ວຍ່ອມບໍ່ເປັນຜົນດີີຕໍ່ສຸຂະພາບໃນໄລຍະຍາວຫັນມາເສີມຄວາມງາມຂອງຜິວພັນດ້ວຍການກິນອາຫານທີ່ມີປະໂຫຍດ,ດື່ມນ້ຳ,ພັກຜ່ອນແລະບໍ່ຄຽດກັບເລື່ອງນ້ອຍໆຈະດີກວ່າ ຮັບຮອງວ່າກູຕ້າໃນຮ່າງກາຍຈະຜະລິດເກືອບບໍ່ທັນແລະຫລາຍກວ່ານັ້ນຍອມຮັບສີຜິວທີ່ເກີດຈາກເມລານິນຕາມທຳມະຊາດແລ້ວງາມໃນແບບຂອງເຮົາກັນດີກ່ວາ