ພິທີມອບ-ຮັບປຶ້ມການອອກແບບໂຄງການກໍ່ສ້າງເສັ້ນທາງລົດໄຟຄວາມໄວສູງ ສະຫວັນນະເຂດ-ລາວບາວ ໄດ້ຈັດຂຶ້ນວັນທີ 10 ມີນາ 2015 ຢູ່ໂຮງແຮມດອກຈຳປາ ເຊິ່ງມອບໂດຍທ່ານ ອາຊາຮາ ອາມັດ ປະທານບໍລິສັດ OSI (ຜູ້ອອກແບບ) ແລະ ຮັບໂດຍທ່ານ HM Fadzwi ປະທານບໍລິສັດ ທາງລົດໄຟໄຈແອນ ຈຳກັດ (ເຈົ້າຂອງໂຄງການ) ໂດຍຊ້ອງໜ້າທ່ານ ດາໂຕະ ທັນໄຕຮິງ ເອກອັກຄະລັດຖະທູດມາເລເຊຍ ປະຈຳລາວ ທ່ານ ສອນສັກ ນ.ຍານຊະນະ ຮອງຫົວໜ້າກົມທາງລົດໄຟ ພ້ອມດ້ວຍພາກສ່ວນກ່ຽວຂ້ອງ.
ການມອບ-ຮັບຄັ້ງນີ້ ແມ່ນເປັນຊຸດທຳອິດລວມມີ 2.700 ກວ່າເຫຼັ້ມ ເຊິ່ງແມ່ນປຶ້ມທີ່ຮວບຮວມເອົາການອອກແບບທັງໝົດຂອງໂຄງການ ເປັນຕົ້ນ ທາງລົດໄຟ ລາງລົດໄຟ ອາຄານສຳນັກງານ ສະຖານີຕ່າງໆ ພາຍຫຼັງມອບໃຫ້ບໍລິສັດຜູ້ລົງທຶນແລ້ວ ກໍ່ຈະໄດ້ມອບຕໍ່ໃຫ້ລັດຖະບານເພື່ອພິຈາລະນາ ແລະ ພາຍຫຼັງການຮັບຮອງແລ້ວ ກໍ່ຈະເລີ່ມກໍ່ສ້າງທັນທີ ໂດຍຈະໃຊ້ເວລາໃນການກໍ່ສ້າງ 3 ປີ ໂຄງການທາງລົດໄຟຄວາມໄວສູງ ສະຫວັນນະເຂດ-ລາວບາວ ມີຄວາມຍາວ 220 ກິໂລແມັດ ມີ 11 ສະຖານີ ເປັນໂຄງການລົງທຶນຮູບແບບ BOT ໂດຍບໍລິສັດ ທາງລົດໄຟໄຈແອນ ຈຳກັດ ລົງທຶນກ່ອນ 100% ມູນຄ່າ 5 ຕື້ໂດລາສະຫະລັດ ຫຼື ປະມານ 40.700 ຕື້ກີບ (ຖືຮຸ້ນ 90%) ແລະ ລັດຖະບານລາວຖືຮຸ້ນ 10%.
ໂຄງການລົດໄຟຄວາມໄວສູງ ສະຫວັນນະເຂດ-ລາວບາວ ໄດ້ອອກແບບຄວາມໄວເບື້ອງຕົ້ນ 120 ກິໂລແມັດຕໍ່ຊົ່ວໂມງ (ສຳລັບຜູ້ໂດຍສານ) 80 ກິໂລແມັດຕໍ່ຊົ່ວໂມງ (ສຳລັບບັນທຸກສິນຄ້າ) ແລະ ຍັງສາມາດເພີ່ມຄວາມໄວເຖິງ 200 ກິໂລແມັດຕໍ່ຊົ່ວໂມງ ພາຍຫຼັງການກໍ່ສ້າງສຳເລັດ ຈະປະກອບສ່ວນສຳຄັນໃນການພັດທະນາເສດຖະກິດ ລະຫວ່າງປະເທດໃນເຂດລຸ່ມແມ່ນ້ຳຂອງ ທີ່ມີລາວເປັນສູນກາງເຊື່ອມຕໍ່ດ້ານຄົມມະນາຄົມ-ຂົນສົ່ງກັບຫວຽດນາມ ໄທ ແລະ ມຽນມາ.
ແຫລ່ງຂ່າວ: ວຽງຈັນໃໝ່