ທ່ານ ດຣ. ບຸນປອນ ບຸດຕະນະວົງ ຮອງນາຍົກລັດຖະມົນຕີ ຫົວໜ້າຄະນະຊີ້ນຳການສຳຫຼວດພົນລະເມືອງ ແລະ ທີ່ຢູ່ອາໄສລະດັບຊາດ ຄັ້ງທີ IV ປີ 2015 ໄດ້ລົງເຄື່ອນໄຫວຊີ້ນຳການດຳເນີນການສຳຫຼວດພົນລະເມືອງ ແລະ ທີ່ຢູ່ອາໄສຂອງບ້ານໂພນສະຫວ່າງ ເມືອງຈັນທະບູລີ ນະຄອນຫຼວງວຽງຈັນ (ນວ) ໃນວັນທີ 1 ມີນາ 2015 ໂດຍມີທ່ານ ດຣ. ອານຸພາບ ຕຸນາລົມ ຮອງເຈົ້າຄອງ ນວ ພ້ອມດ້ວຍຄະນະຊີ້ນຳການສຳຫຼວດພົນລະເມືອງ ແລະ ທີ່ຢູ່ອາໄສຂັ້ນສູນກາງ ອຳນາດການປົກຄອງ ຄະນະກວດກາເມືອງ ບ້ານ ແລະ ພະນັກງານກ່ຽວຂ້ອງເຂົ້າຮ່ວມ.
ທ່ານນາງ ບົວລອນ ວົງດາລາແສນ ເຈົ້າເມືອງຈັນທະບູລີ ກ່າວວ່າ: ພາຍຫຼັງໄດ້ຮັບຄຳແນະນຳຈາກຂັ້ນເທິງ ເມືອງຈັນທະບູລີ ກໍ່ໄດ້ມີການກະກຽມ ໂດຍສົມທົບກັບຄະນະກະກຽມຂອງ ນວ ຈັດຕັ້ງເຝິກອົບຮົມຄັ້ງທີ 1 ເດືອນພະຈິກ 2014 ກ່ຽວກັບການເກັບກຳສະຖິຕິຄົວເຮືອນ ແລະ ໄດ້ສຳເລັດການລົງເກັບກຳຕົວຈິງໃນເດືອນທັນວາ 2014 ມາເຖິງວັນທີ 20-24 ກຸມພາ 2015 ໄດ້ຈັດເຝິກອົບຮົມທົ່ວເມືອງ ພວກເຮົາມີຄະນະຮັບຜິດຊອບຢູ່ແຕ່ລະຂັ້ນ 62 ທ່ານ ນັກເດີນສຳຫຼວດ 234 ທ່ານ ເຊິ່ງພວກເຮົາໄດ້ເນັ້ນກ່ຽວກັບວິທີການຢ່າງເຂັ້ມງວດ ເພື່ອເຮັດໃຫ້ການເດີນສຳຫຼວດສຳເລັດຢ່າງຈົບງາມ ພ້ອມນີ້ຍັງໄດ້ເນັ້ນໃຫ້ນັກສຳຫຼວດ ແລະ ຄະນະຮັບຜິດຊອບໃຫ້ເຮັດວຽກຢ່າງມີແຜນການລະອຽດໃນແຕ່ລະບ້ານ ແຕ່ລະວັນຕ້ອງມີການຖອດຖອນບົດຮຽນເຊິ່ງກັນ ແລະ ກັນ ທັງມີການໂຄສະນາໃຫ້ປະຊາຊົນເຂົ້າໃຈ ແລະ ມີສ່ວນຮ່ວມ ເມືອງຈັນທະບູລີ ມີ 30 ບ້ານ 232 ເຂດ ເຊິ່ງສ່ວນໃຫຍ່ແມ່ນໃຊ້ພະນັກງານຂອງບ້ານເປັນຜູ້ເດີນສຳຫຼວດ ສ່ວນພະນັກງານເມືອງແມ່ນເປັນຜູ້ກວດກາ ແລະ ມີພະນັກງານປົກຄອງ ວິຊາການ ອົງການຈັດຕັ້ງມະຫາຊົນ ປກຊ-ປກສ ປະກອບເປັນຄະນະຮັບຜິດຊອບ.
ທ່ານ ຊະນະນິກອນ ອິນທິລາດ ນາຍບ້ານໂພນສະຫວ່າງ ກ່າວວ່າ: ບ້ານໂພນສະຫວ່າງ ມີເນື້ອທີ່ 1.073.000 ຕາແມັດ ມີ 892 ຄອບຄົວ 698 ຫຼັງຄາເຮືອນ ແບ່ງເປັນ 72 ໜ່ວຍ ພົນລະເມືອງ 4.282 ຄົນ ຍິງ 2.148 ຄົນ ອາຊີບສ່ວນໃຫຍ່ແມ່ນພະນັກງານ ມີກອງທຶນ 3,8 ຕື້ກີບ ກອງທຶນສົງເຄາະຜູ້ເສຍຊີວິດ 25 ລ້ານກີບ ແຕ່ລະປີໄດ້ຖອກພັນທະບໍ່ຫຼຸດ 150 ລ້ານກີບ ບ້ານໂພນສະຫວ່າງ ໄດ້ແບ່ງເຂດສຳຫຼວດ 13 ເຂດ ໃຊ້ນັກເດີນສຳຫຼວດ 13 ທ່ານ ເລີ່ມເກັບກຳທີ່ຢູ່ອາໄສວັນທີ 5 ທັນວາ 2014 ວັນທີ 20-24 ເຝິກອົບຮົມຢູ່ເມືອງ ວັນທີ 25-28 ກຸມພາ 2015 ໄດ້ລົງປະຕິບັດຕົວຈິງຢູ່ບ້ານ ແລະ ມື້ນີ້ກໍ່ໄດ້ເລີ່ມສຳຫຼວດຕົວຈິງນັບແຕ່ 8:00 ໂມງເປັນຕົ້ນມາ.
ໂອກາດນີ້ ທ່ານ ດຣ. ບຸນປອນ ບຸດຕະນະວົງ ກໍ່ໄດ້ໃຫ້ທິດຊີ້ນຳ ເຊິ່ງກ່ອນອື່ນທ່ານໄດ້ສະແດງຄວາມຊົມເຊີຍຕໍ່ອຳນາດການປົກຄອງເມືອງ ບ້ານ ແລະ ພະນັກງານກ່ຽວຂ້ອງທີ່ໄດ້ເອົາໃຈໃສ່ ເປັນເຈົ້າການໃນການກະກຽມຄວາມພ້ອມດ້ານຕ່າງໆ ສຳລັບການດຳເນີນການເດີນສຳຫຼວດພົນລະເມືອງ ແລະ ທີ່ຢູ່ອາໄສຄັ້ງນີ້ ພ້ອມນີ້ ທ່ານຍັງໄດ້ເນັ້ນຄະນະຊີ້ນຳຂອງ ນວ ເມືອງ ແລະ ບ້ານ ຈົ່ງເອົາໃຈໃສ່ຊີ້ນຳດ້ານວິທີການເກັບກຳຂໍ້ມູນໃຫ້ລະອຽດ ແຈ້ງໃຫ້ປະຊາຊົນມີການຫ້າງຫາກະກຽມຄຳຕອບ ສຳຄັນທີ່ສຸດ ຄະນະຊີ້ນຳແຕ່ລະຂັ້ນ ຕ້ອງໄດ້ຍາດເວລາໄປເຮັດວຽກກາງຄືນ ເພາະວ່າປະຊາຊົນພວກເຮົາ ແມ່ນມີອາຊີບແຕກຕ່າງກັນ ສຳລັບຕ່າງປະເທດ ຊາວຄ້າຂາຍ ຊາວຕ່າງດ້າວທີ່ມາເພິ່ງພາອາໄສ ກໍ່ຕ້ອງໄດ້ສຳຫຼວດໃຫ້ຄົບຖ້ວນ ໂດຍມີການແບ່ງຄວາມຮັບຜິດຊອບກັນຄັກແນ່ ຄະນະຮັບຜິດຊອບແຕ່ລະຂັ້ນ ຕ້ອງເຂົ້າໃຈຢ່າງເລິກເຊິ່ງ ຄວາມໝາຍຄວາມສຳຄັນຂອງການເດີນສຳຫຼວດຄັ້ງນີ້ ເປົ້າໝາຍຂອງການເດີນສຳຫຼວດ ແມ່ນຕ້ອງຕີລາຄາ ແລະ ປະເມີນຜົນໃຫ້ໄດ້ສະພາບຄວາມເປັນຈິງຂອງພົນລະເມືອງ ແລະ ທີ່ຢູ່ອາໄສຢູ່ໃນຂອບເຂດຄວາມຮັບຜິດຊອບຂອງພວກເຮົາ ເຊິ່ງມັນໄດ້ຕິດພັນເຖິງການຊີ້ນຳ-ນຳພາໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຖ້າວ່າພວກເຮົາມີການເກັບກຳຂໍ້ມູນໄດ້ລະອຽດຊັດເຈນເຮົາ ຈະຮູ້ໄດ້ວ່າການວາງແຜນພັດທະນາໃນໄລຍະຜ່ານມາ ກັບສະພາບຄວາມເປັນຈິງຂອງໂຄງປະກອບພົນລະເມືອງ ແຮງງານ ຄອບຄົວທຸກຍາກ ນັກທຸລະກິດ ແລະ ບັນດາຊັ້ນຄົນສາຂາອາຊີບຕ່າງໆ ພວກເຮົາຈະກຳໄດ້ໝົດ ຈາກນັ້ນ ຈະສາມາດເກັບກຳໂຄງປະກອບທາງດ້ານກະສິກຳ ສາທາລະນະສຸກ ສຶກສາ ການຄ້າ ການລົງທຶນ ແລະ ອື່ນໆ ເຊິ່ງເປັນຂໍ້ມູນທີ່ສຳຄັນພື້ນຖານ ໃຫ້ແກ່ການສືບຕໍ່ວາງແຜນພັດທະນາເສດຖະກິດ-ສັງຄົມຂອງບ້ານ ເມືອງ ແລະ ນວ ກໍ່ຄືທົ່ວປະເທດໃຫ້ມີຄວາມຊັດເຈນ ແລະ ຖືກຕ້ອງຂຶ້ນຕື່ມ.
ແຫລ່ງຂ່າວ: ວຽງຈັນໃໝ່