ເຫັນ​ໄດ້​ຄວາມ​ສຳຄັນ​ຂອງ​ມູນນິທິ​ຊ່ວຍເຫຼືອ​ຄົນ​ທຸກ​ຍາກ​ແຫ່ງ ​ສປປ ລາວ ທີ່​ໃຫ້ການ​ຊ່ວຍເຫຼືອສັງຄົມ ໃນ​ການ​ກອບ​ກູ້​ຊີວິດ​ແກ່​ຜູ້ປະສົບ​ອຸບັດ​ຕິ​ເຫດ ແລະ ຜູ້​ຖືກເຄາະ​ຮ້າຍມາ​ໂດຍ​ຕະຫຼອດ ແຕ່ອຸປະກອນ​ຮັບ​ໃຊ້​ໃນ​ວຽກ​ງານ​ດັ່ງກ່າວ​ ຍັງ​ບໍ່​ພຽງພໍ​ກັບ​ຄວາມ​ຕ້ອງການ ດັ່ງນັ້ນ ວັນ​ທີ 26 ກຸມພາ 2015 ບໍລິສັດ ​ເມືອງ​ວັງ​ພັດທະນາ ຈຳກັດ​ຜູ້​ດຽວ ໄດ້​ນຳ​ເຄື່ອງ​ໄປມອບ​ໃຫ້​ກັບ​ມູນ​ນິທິ​ຊ່ວຍເຫຼືອ​ຄົນທຸກ​ຍາກແຫ່ງ ​ສປປ ລາວ ມອບໂດຍ​ທ່ານ ຄຳ​ກົມ ອຸ​ນາ​ວົງ ຜູ້​ອຳນວຍ​ການ​ບໍລິສັດ ຮັບ​ໂດຍທ່ານນາງ ສີ​ສະຫຼຽວ ທຳ​ມະ​ເທວາ ປະທານ​ມູນ​ນິທິ ມີ​ພະນັກງານກ່ຽວຂ້ອງ​ທັງ​ສອງ​ຝ່າຍ​ເຂົ້າ​ຮ່ວມ.

ເຄື່ອງ​ທີ່​ນຳ​ມາ​ມອບ​ໃນ​ຄັ້ງ​ນີ້ ປະກອບ​ມີຕູ້ Container ທີ່​ປະດິດ​ໃຫ້​ເປັນ​ຫ້ອງການ​ພ້ອມ​ໃຊ້ງານ​ໜຶ່ງ​ໜ່ວຍ ບັ້ງ​ອົກ​ຊີ​ນ້ອຍຈຳນວນ 4 ບັ້ງ ALCOHOL 90.70 ຈຳນວນ 96 ປ່ອງ COTTON 419 ກໍ້ OS (ຜ້າ​ແສ) 23 ກັບ Paster Neoplast 20 ກັບ ສະ​ກ໋ອດ Neoplast 30 ກັບ ບັ້ງ​ພັນ 71 ຖົງ ຢາດົມ 228 ອັນ Glove ທຳ​ມະ​ດາ 24 ກັບ Mask 24 ກັບ ຢາແດງ 39 ໂຫຼ ລວມ​ມູນ​ຄ່າ​ທັງ​ໝົດ 65 ລ້ານກີບ.

ໂອກາດ​ດັ່ງກ່າວ ທ່ານ​ນາງ ສີ​ສະຫຼຽວ ທຳ​ມະ​ເທວາ ກໍ່​ໄດ້​ສະແດງ​ຄວາມ​ຂອບໃຈ​ມາ​ຍັງ​ບໍ​ລິສັດ​ດັ່ງກ່າວ ​ທີ່​ໃຫ້ການ​ສະໜັບ​ສະໜູນ ແລະ ຈະ​ນຳ​ເອົາ​ເຄື່ອງ​ທີ່​ໄດ້ຮັບ​ໃນ​ຄັ້ງ​ນີ້​ ນຳໄປ​ໃຊ້​ເຂົ້າ​ໃນ​ການຊ່ວຍເຫຼືອ​ສັງຄົມ​ໃຫ້​ເກີດ​ປະໂຫຍດ​ສູງ​ສຸດ.

ແຫລ່ງ​ຂ່າວ: ວຽງ​ຈັນ​ໃໝ່