ບັ້ນ​ສຳ​ຫຼວດ​ພົນ­ລະ­ເມືອງ ແລະ ທີ່­ຢູ່​ອາ­ໄສ​ທີ່​ຈະ​ເລີ່ມ​ຕົ້ນ​ຂຶ້ນ​ໃນ​ສອງ​ວັນຂ້າງ​ໜ້າ​ນີ້​ເປັນ​ຖານ​ຂໍ້ ​ມູນ​ສຳ­ຄັນ ເພື່ອ​ປະເມີນ​ຜົນ​ການ​ພັດ­ທະ­ນາ​ປະ­ເທດ​ໃນ​ຕະ­ຫຼອດ 10 ປີ­ຜ່ານ­ມາ​ທັງ​ຈະ​ເປັນ​ພື້ນ­ຖານ​ທີ່​ດີ​ໃຫ້ແກ່​ການ​ວາງ​ແຜນ​ສ້າງ­ສາ​ ພັດ­ທະ­ນາ​ປະ ເທດ​ເຮົາ​ໃນ​ອີກ 1 ທົດ​ສະ​ວັດ​ນັບ​ຈາກ​ນີ້ ສະ­ນັ້ນ ປະ­ຊາ­ຊົນ​ລາວ​ທຸກ​ຖ້ວນ​ໜ້າ​ຈົ່ງ​ໃຫ້ການ​ຮ່ວມ​ມື​ສະ­ໜອງ​ຂໍ້​ມູນ​ທີ່­ແທ້​ ຈິງ​ແນໃສ່​ຮັບ­ປະ­ກັນ​ໃຫ້​ຜົນ​ຂອງ​ການ​ສຳ​ຫຼວດອອກ​ມາ​ຈະ­ແຈ້ງ ແລະ ເຫັນ​ຕົວ​ຈິງ​ຂອງ​ປະເທດ​ເຮົາ​ເພື່ອ​ການ​ວາງ​ແຜນ​ພັດ­ທະ­ນາທີ່​ຖືກ​ທິດ ແລະ ມີ​ປະ​ສິດ­ທິ​ຜົນ.

ໂດຍ​ການ​ສຳ​ຫຼວດ​ພົນ­ລະ­ເມືອງ ແລະ ທີ່­ຢູ່​ອາ­ໄສ​ແມ່ນ​ຈະ​ເລີ່ມ​ຕົ້ນ​ແຕ່​ຕອນ​ເຊົ້າ​ວັນ​ທີ 1 ຈົນ​ຮອດ​ວັນ​ທີ 7 ມີ­ນາ 2015 ເພື່ອ​ເກັບ​ກຳ​ຂໍ້​ມູນ​ສະ­ຖິ­ຕິ​ພື້ນ­ຖານ​ກ່ຽວ​ກັບ​ຈຳ­ນວນ​ປະ­ຊາ­ກອນ, ໂຄງ​ປະ­ກອບ, ການ​ເໜັງ​ຕິງ​ຂອງ​ພົນ­ລະ­ເມືອງ, ສະ­ພາບກ່ຽວ​ກັບ​ລະ­ດັບ​ການ​ສຶກ​ສາ, ການ​ເຂົ້າ​ເຖິງການ​ບໍ­ລິ­ການ​ດ້ານ​ສຸ­ຂະ­ພາບ, ການ​ສຶກສາ, ກຳ­ລັງ​ແຮງ​ງານ, ສະ­ພາບ​ການ​ມີວຽກ​ເຮັດ​ງານ​ທຳ, ການ​ວ່າງ​ງານ, ການເຄື່ອນ​ຍ້າຍ​ຂອງ​ປະ­ຊາ­ກອນລວມ​ເຖິງຄຸນ​ລັກ­ສະ­ນະ​ຂອງທີ່­ຢູ່​ອາ­ໄສ​ອັນ​ ເປັນ​ພື້ນ­ຖານ​ກ່ຽວ​ກັບ​ການ​ດຳ­ລົງ​ຊີ­ວິດ​ຂອງ​ພົນ­ລະ­ເມືອງ​ລາວ​ໃນ​ຕະ­ຫຼອດ 10 ປີ­ຜ່ານ­ມາ.

ຜົນ​ຂອງ​ການ​ສຳ​ຫຼວດ​ພົນ­ລະ­ເມືອງຄັ້ງ​ນີ້​ຈະ​ເປັນ​ແຫຼ່ງ​ຂໍ້​ມູນ​ທີ່​ ສຳ­ຄັນ ເພື່ອ​ຕີ​ລາຄາ​ຄືນ​ຜົນ­ສຳ­ເລັດ​ຂອງ​ການ­ຈັດ­ຕັ້ງ​ປະ­ຕິບັດ​ແຜນ​ພັດ­ທະ­ນາ​ ເສດ­ຖະ­ກິດ-ສັງ­ຄົມແຫ່ງ​ຊາດ​ຄັ້ງ​ທີ VII ທີ່​ກຳ­ລັງ​ຈະ​ສິ້ນສຸດ​ລົງ​ໃນ​ປີ 2015 ນີ້ ທັງ​ຈະ​ນຳ​ມາ​ປະເມີນ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ເປົ້າໝາຍ​ສະ­ຫັດ​ສະ​ວັດ ​ແຫ່ງ​ການ​ພັດ­ທະ­ນາໃນ​ປີ 2015 ພ້ອມ​ດຽວ​ກັນ​ນີ້​ຍັງ​ເປັນ​ຂໍ້​ມູນ​ທີ່​ຈຳ­ເປັນ​ໃຫ້​ແກ່​ການ​ກະ­ກຽມ​ ກອງປະ­ຊຸມ​ໃຫຍ່​ຄັ້ງ​ທີ X ຂອງ​ພັກ ແລະ ການກະ­ກຽມ​ສ້າງ​ແຜນພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ​ຄັ້ງ​ທີ VIII ນັບ​ແຕ່ 2016-2020 ໃຫ້​ຖືກ­ຕ້ອງ​ຕາມ​ຄວາມເປັນ​ຈິງ​ຂອງ​ສັງ­ຄົມ​ກໍ​ຄື​ປະ­ຊາ­ຊົນ. ຊຶ່ງ ການ​ວາງ​ແຜນ​ພັດ­ທະ­ນາ​ຂອງ​ລັດ ຈະ​ສາມາດ​ແກ້​ໄຂ​ໄດ້​ຖືກ​ຈຸດ​ທີ່​ມີ​ຄວາມ​ຈຳ­ເປັນຂອງ​ປະ­ຊາ­ຊົນ​ກໍ​ຕໍ່​ ເມື່ອ​ພໍ່​ແມ່​ປະ­ຊາ­ຊົນ​ທຸກຊົນ​ຊາດ​ຊົນ­ເຜົ່າ, ທຸກ​ຊັ້ນ​ຄົນ, ເພດ​ໄວ​ທັງພາຍ​ໃນ ແລະ ຕ່າງ­ປະ­ເທດ​ທີ່​ອາ­ໄສ​ຢູ່​ຜືນແຜ່ນ­ດິນ​ລາວ​ຊ່ວຍ​ເອື້ອ​ອຳ­ນວຍ​ຄວາມສະ­ດວກ, ໃຫ້​ຄວາມ​ຮ່ວມ​ມື​ດ້ວຍ​ຄວາມ​ຊື່­ສັດ​ຈິງ​ໃຈ ເພື່ອ​ຕອບ​ສະ­ໜອງ​ຂໍ້​ມູນ​ຕາມຄວາມ​ເປັນ​ຈິງ​ກ່ຽວ​ກັບ​ສະ­ພາບ​ການ​ດຳ­ລົງ​ ຊີ­ວິດ​ຂອງ​ທ່ານ​ຕໍ່​ບັນ­ດາ​ນັກ​ເດີນ​ສຳຫຼວດ​ພົນ­ລະ­ເມືອງ ແລະ ທີ່­ຢູ່​ອາ­ໄສ​ໃນຄັ້ງ​ນີ້.

ແນວ­ໃດ​ກໍ​ຕາມ ປະ­ຊາ­ຊົນ​ບັນ­ດາ­ເຜົ່າຈະ​ມີ​ຄວາມ​ຕື່ນ​ຕົວ​ເຂົ້າ​ຮ່ວມ​ຂະ​ບວນ​ການ​ສຳ​ຫຼວດ​ ຄັ້ງ​ນີ້ ​ຢ່າງ​ເປັນ​ເຈົ້າ​ການຍ່ອມ​ຫຼີກ​ລ້ຽງ​ບໍ​ໄດ້​ ການ​ຊີ້​ນຳໆພາທີ່ໃກ້​ສິດ​ຕິດ​ແທດຂອງ​ບັນ­ດາ​ຄະ­ນະ​ພັກ​ອຳນາດ​ການ​ປົກ­ຄອງ​ໃນ ​ທຸກ​ທ້ອງ­ຖິ່ນ​ເຂດ ແຂວງ ແລະ ນັກ​ສຳ​ຫຼວດ, ນັກ​ກວດ­ກາພະ­ນັກ­ງານ​ທີ່​ໄດ້​ຮັບ​ມອບ​ໝາຍ​ຕ້ອງ​ມີຄວາມ​ອົດ­ທົນ​ຜ່ານ​ຜ່າ​ ຄວາມ​ຫຍຸ້ງ­ຍາກ ທຸກ​ຢ່າງ ຈິ່ງ​ຈະ​ໄດ້​ມາ​ຊຶ່ງ​ຂໍ້​ມູນ​ທີ່​ຖືກ­ຕ້ອງຄົບ​ຖ້ວນ, ຮັບ­ປະ­ກັນ​ໄດ້​ທາງ​ດ້ານ​ຄຸນ​ນະ​ພາບ​ຂອງ​ຂໍ້​ມູນ​ສາ­ມາດ​ສົມ​ທຽບ​ກັບ​ສາ­ກົນ ແລະ ພາກ​ພື້ນ​ໄດ້.

ໃນ​ຕະ­ຫຼອດ 7 ວັນ​ທີ່​ກຳ­ນົດ​ໝາຍ​ໃຫ້ ດຳ­ເນີນ​ການ​ສຳ​ຫຼວດ​ພົນ­ລະ­ເມືອງ ແລະ ທີ່­ຢູ່​ອາ­ໄສ​ລັດ­ຖະ­ບານ​ໄດ້​ອະ­ນຸ­ຍາດ​ໃຫ້ບຸກ­ຄົນ, ຄົວ​ເຮືອນ​ທີ່​ເຮັດ​ວຽກ​ກັບ​ບັນ­ດາອົງ​ການ­ຈັດ­ຕັ້ງ​ລັດ, ເອ­ກະ​ຊົນ, ອົງ­ການຈັດ​ຕັ້ງ​ສາ­ກົນ ແລະ ຫົວ­ໜ່ວຍ​ເສດ​ຖິດ​ພື້ນຖານ​ສາ­ມາດ​ພັກ​ວຽກ​ໄດ້​ໃນ​ມື້​ທີ່​ຖືກ​ນັດໝາຍ​ສຳ­ພາດ ເພື່ອ​ຄວາມ​ສະ­ດວກ​ໃນ​ການໃຫ້​ຂໍ້​ມູນ​ແກ່​ບັນ­ດາ​ນັກ​ເດີນ​ສຳ​ຫຼວດ.

ແຫລ່​ງ​ຂ່າວ: ເສດ​ຖະ​ກິດ – ສັງ​ຄົມ