ໄຂ່ເຄັມເປັນອາຫານທີ່ເກິດຂື້ນມາຈາກພູມປັນຍາຊາວບ້ານໃນການຖະໜອມອາຫານເພື່ອທີ່ຈະເກັບໄຂ່ເປັດໄວ້ກິນໄດ້ດົນໆເລີຍຈັບໄປດອງກັບນ້ຳເກືອຫລືສູດອື່ນໆຕາມແຕ່ລະພື້ນຈົນກາຍມາເປັນໄຂ່ເຄັມສຸດແຊບແລະຖືເປັນອາຫານທີ່ຫລາຍໆເຮືອນມັກຈະມີຕິດເອົາໄວ້ຈະເຮັດໄຂ່ເຄັມຕົ້ມ,ໄຂ່ເຄັມດາວຫລືຈະຍຳແຊບໆກິນກັບເຂົ້າກໍ່ແຊບແຕ່ຄົງຈະດີຖ້າເຮົາມາເຮັດໄຂ່ເຄັມກິນເອງໄດ້
ເຖິງແມ່ນວ່າໄຂ່ເຄັມຈະສາມາດຫາຊື້ມາຮັບປະທານໄດ້ງ່າຍໆແຕ່ຫາກມື້ໜຶ່ງມື້ໃດເຈົ້າເກີດໄດ້ຮັບໄຂ່ເປັດສົດໆຈາກຟາລ໌ຈຳນວນຫລາຍມາເປັນຂອງຝາກແລ້ວບໍ່ຮູ້ຈະນຳໄປເຮັດເປັນເມນູຫຍັງໄດ້ອີກນອກຈາກຕົ້ມ,ຈືນ,ຕຸ໋ນຫລືເຈົ້າຢາກຈະວັດຝີມືຄວາມເປັນພໍ່ເຮືອນແມ່ເຮືອນດ້ວຍການເຮັດໄຂ່ເຄັມກິນເອງມື້ນີ້ເຮົາກໍມີວິທີເຮັດໄຂ່ເຄັມເອງແບບງ່າຍໆມາຝາກເປັນສູດໄຂ່ເຄັມດອງໃນນ້ຳເກືອພຽງ1-2ອາທິດ ກໍໄດ້ໄຂ່ເຄັມຝີມືຕົວເອງໄວ້ກິນແລ້ວຖ້າຢາກຮູ້ແລ້ວວ່າໄຂ່ເຄັມເຮັດເອງນີ້ຈະມີວິທີການຢ່າງໃດມາເບິ່ງກັນເລີຍ
-ສິ່ງທີ່ຕ້ອງກຽມ
1.ໄຂ່ເປັດດິບ 10 ໜ່ວຍ
2.ພາຊະນະສຳລັບດອງໄຂ່ (ທີ່ບໍ່ເຮັດປະຕິກິລິຢາກັບເກືອເຊັ່ນໂຫລແກ້ວ,ແກ້ວພາສະຕິກເຄື່ອງເຄືອບດິນເຜົາ)
3.ເກືອ1ຖ້ວຍ
4.ນ້ຳສຳລັບຕົ້ມນ້ຳເກືອ4ຖ້ວຍ(ຫລື1ລີດ)
– ວິທີເຮັດ
1. ລ້າງໄຂ່ເປັດໃຫ້ສະອາດສະເດັດນ້ຳຈົນແຫ້ງສະນິດໃສ່ລົງໃນໂຫລແກ້ວກຽມໄວ້
2. ເຮັດນ້ຳເກືອສຳລັບດອງໄຂ່ໂດຍໃສ່ເກືອກັບນ້ຳລົງໃນໝໍ້ນຳຂຶ້ນຕັ້ງໄຟຈົນເດືອດແລະຄົນໃຫ້ເກືອລະລາຍຈົນໝົດມອດໄຟປະໄວ້ຈົນເຢັນສະນິດ
3. ເທນ້ຳເກືອທີ່ເຢັນແລ້ວລົງໃນໂຫລໄຂ່ຈົນທ່ວມໄຂ່ຈາກນັ້ນໃຊ້ຖົງພາດສະຕິກໃສ່ນ້ຳວາງທັບລົງໄປໃຫ້ໄຂ່ເປັດຈົມຢູ່ກ້ອງນ້ຳຕະຫລອດເວລາປິດຝາໃຫ້ສະນິດເກັບໄວ້ໃນທີ່ຮົ່ມດົນປະມານ2-3ອາທິດສຳລັບເຮັດໄຂ່ດາວເກັບໄວ້ດົນປະມານ2ອາທິດສຳລັບເຮັດໄຂ່ຕົ້ມ
– ເຮັດຢ່າງໃດໃຫ້ໄຂ່ແດງເຄັມເປັນນ້ຳມັນ?
ຫລາຍຄົນມັກກິນໄຂ່ເຄັມທີ່ມີໄຂ່ແດງເປັນນ້ຳມັນເຍີ້ມໆອອກມາເພາະທັງມັນທັງແຊບເທັກນິກກໍຄື ຫລັງຈາກທີ່ພັກນ້ຳເກືອຈົນເຢັນສະນິດແລ້ວໃຫ້ເຕີມເຫລົ້າຂາວລົງໄປໃນນ້ຳເກືອດ້ວຍເລັກນ້ອຍຄົນປະ ສົມໃຫ້ເຂົ້າກັນແລ້ວເທໃສ່ລົງໃນໂຫລຈະເຮັດໃຫ້ໄຂ່ແດງເຄັມທີ່ໄດ້ກໍຈະເປັນນ້ຳມັນເຍີ້ມໆໜ້າກິນ
– ວິທີຕົ້ມໄຂ່ເຄັມໃຫ້ແຊບ
ການທີ່ຈະຕົ້ມໄຂ່ເຄັມໃຫ້ແຊບນັ້ນມີເຄັດລັບຢູ່ທີ່”ສານສົ້ມ”ເຮັດໄດ້ໂດຍໃສ່ນ້ຳລົງໃນໝໍ້ໃສ່ສານສົ້ມ 1ກ້ອນຫລືສານສົ້ມບົດປະມານ1/2ບ່ວງຕາມດ້ວຍໄຂ່ນຳຂຶ້ນຕັ້ງໄຟປານກາງຕົ້ມຈົນເດືອດດົນປະມານ 8-10ນາທີກໍຈະໄດ້ໄຂ່ເຄັມຕົ້ມສຸດແຊບໄວ້ກິນແລ້ວ
– ວິທີເກັບໄຂ່ເຄັມຕົ້ມໃຫ້ໄດ້ດົນທີ່ສຸດ
ໄຂ່ເຄັມທີ່ນຳໄປຕົ້ມແລ້ວສາມາດເກັບໄວ້ໃນຕູ້ເຢັນໄດ້ດົນປະມານ1ເດືອນສ່ວນວິທີການເກັບຮັກສາໄຂ່ເຄັມຕົ້ມໃຫ້ໄດ້ດົນທີ່ສຸດຄືໃຫ້ໃສ່ສານສົ້ມລົງໄປແກວ່ງໃນນ້ຳທີ່ໃຊ້ຕົ້ມໄຂ່ດ້ວຍນອກຈາກຈະຍືດອາຍຸໄຂ່ເຄັມໄດ້ແລ້ວສານສົ້ມຈະເຮັດໃຫ້ສີຂອງເປືອກໄຂ່ແລະເນື້ອໄຂ່ຂາວງາມຂຶ້ນອີກດ້ວຍ