ຂປລ. ລັດຖະບານຍີ່ປຸ່ນ ໄດ້ຕົກລົງໃຫ້ການຊ່ວຍເຫລືອລ້າ ແກ່ລັດຖະບານລາວ ຈຳນວນ 82.271 ໂດລາສະຫະລັດ ຫລື ປະມານ 600 ລ້ານກວ່າກີບ ເພື່ອສ້າງຂົວຈົມ ຄອນກີດ 2 ແຫ່ງ ແລະ ສ້ອມແປງເສັ້ນທາງ ມີຄວາມຍາວ 5 ກິໂລແມັດຢູ່ 4 ບ້ານເຂດຊຸມຊົນຄື: ບ້ານເຫລົ່າໃຫຍ່, ບ້ານແມດ, ບ້ານໂພນ ແລະ ບ້ານໜອງບົວທອງ ເມືອງອຸ ທຸມພອນ ແຂວງສະຫວັນນະເຂດ. ແນໃສ່ການສົ່ງເສີມການບໍລິການຂັ້ນພື້ນຖານຂອງປະຊາຊົນ ແລະ ອຳນວຍ ຄວາມສະດວກ ໃນການບໍລິການ-ຂົນສົ່ງສິນຄ້າ, ການໄປມາຫາສູ່ເຊິ່ງກັນ ແລະ ກັນ. ລວມທັງການນຳໃຊ້ໄປໂຮງຮຽນ, ສຸກສາລາ ແລະ ອື່ນໆ ເຊິ່ງມີອາຍຸໃຊ້ງານກວ່າ 25 ປີ ແລະ ປະກອບມີຂົວໄມ້ທີ່ແຕກຫັກ ທີ່ສົມຄວນຈະໄດ້ຮັບການປັບປຸງ. ເມື່ອຂົວຈົມທັງສອງແຫ່ງແລະ ການສ້ອງແປງທາງສຳເລັດ ປະຊາຊົນປະມານ 4.000 ຄົນ ທີ່ອາໄສຢູ່ບ້ານຕ່າງໆ ລວມທັງນັກຮຽນ ປະມານ 250 ຄົນ ຈະໄດ້ຊົມໃຊ້ຢ່າງສະດວກສະບາຍຂຶ້ນກວ່າເກົ່າ.
ພິທີລົງນາມການຊ່ວຍເຫລືອຄັ້ງນີ້ ໄດ້ມີຂຶ້ນໃນວັນທີ 25 ກຸມພາ 2015 ທີ່ນະຄອນຫລວງວຽງຈັນ ລະຫວ່າງທ່ານ ວົງວິສັກ ສອນໄຟທອງ ຫົວໜ້າ ຫ້ອງການໂຍທາທິການ ແລະ ຂົນສົ່ງ ເມືອງອຸທຸມພອນ ແລະ ທ່ານ ຮິໂຣຢູກິ ຄິຊີໂນະ ເອກອັກຄະຣາຊະທູດ ວິສາມັນຜູ້ມີອຳນາດເຕັມ ແຫ່ງປະເທດຍີ່ປຸ່ນ ປະຈຳລາວ ໂດຍມີທ່ານ ດຣ. ບຸນຈັນ ສິນທະວົງ ລັດຖະມົນຕີວ່າການກະຊວງໂຍທາທິການ ແລະ ຂົນສົ່ງ ພ້ອມດ້ວຍພະນັກກ່ຽວຂ້ອງສອງຝ່າຍ ເຂົ້າຮ່ວມ.
ທ່ານ ຮິໂຣຢູກິ ຄິຊີໂນະ ກ່າວວ່າ: ໂຄງການນີ້ ຈະຊ່ວຍເພີ່ມຂີດຄວາມສາມາດ ຂອງປະຊາຊົນ ທັງປະກອບ ສ່ວນເຂົ້າໃນການພັດທະນາ ເສດຖະ ກິດ-ສັງຄົມ ໃນຊຸມຊົນ ພາຍໃຕ້ໂຄງການເສີມສ້າງ ຄວາມໝັ້ນຄົງຂອງມະນຸດ ຂັ້ນຮາກຖານປະເທດຍີ່ປຸ່ນ ຫລື GGPs. ໃນໄລຍະຜ່ານມາ ລັດຖະບານຍີ່ປຸ່ນ ໄດ້ໃຫ້ການສະໜັບສະໜູນ ຊ່ວຍເຫລືອ ເພື່ອການພັດທະນາ ພື້ນຖານໂຄງລ່າງ ມາເປັນເວລາຫລາຍປີ ພາຍໃຕ້ໂຄງການ GGPs, ຕັ້ງແຕ່ປີ 1989 ມາຮອດປັດຈຸບັນມີ ທັງໝົດ 471 ໂຄງການ, ໃນນັ້ນ ມີ 35 ໂຄງການພັດທະນາ ພື້ນຖານໂຄງລ່າງຂະໜາດນ້ອຍ.
ແຫລ່ງຂ່າວ: ສຳນັກຂ່າວສານປະເທດລາວ