ວັນທີ 2 ກຸມພາ 2015 ທີ່ກະຊວງການຕ່າງປະເທດ ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຄຳນັບຂອງທ່ານນາງ ແອນກຣີ ຟິດສ ປະທານສະມາຄົມຄອບຄົວທະຫານອາເມຣິກາ ທີ່ຫາຍສາບສູນໃນປາງສົງຄາມຢູ່ອາຊີຕາເວັນອອກສ່ຽງໃຕ້ ໃນໂອກາດທີ່ທ່ານພ້ອມຄະນະ ມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 27 ມັງກອນ ຫາ 2 ກຸມພາ 2015 ເພື່ອປຶກສາຫາລືເຈົ້າໜ້າທີ່ກ່ຽວຂ້ອງຂອງລັດຖະບານລາວ ກ່ຽວກັບບາດກ້າວໃໝ່ໃນການຮ່ວມມືລະຫວ່າງສອງປະເທດ.
ທ່ານ ທອງລຸນ ສີສຸລິດ ໄດ້ຕີລາຄາສູງຕໍ່ການຢ້ຽມຢາມຂອງຄະນະຜູ້ແທນສະຫະລັດອາເມຣິກາ ເຊິ່ງຈະເປັນການປະກອບສ່ວນອັນສຳຄັນ ເຂົ້າໃນການເພີ່ມທະວີຄວາມເຂົ້າອົກເຂົ້າໃຈເຊິ່ງກັນ ແລະ ກັນລະຫວ່າງສອງຝ່າຍໃຫ້ເລິກເຊິ່ງ ທັງເປັນການຊຸກຍູ້ໃຫ້ແກ່ການເປີດກວ້າງການພົວພັນ ແລະ ຮ່ວມມືລະຫວ່າງສອງປະເທດ ແລະ ຍັງໄດ້ຢືນຢັນເຖິງນະໂຍບາຍດ້ານມະນຸດສະທຳອັນສະເໝີຕົ້ນສະເໝີປາຍຂອງ ລັດຖະບານລາວ ທີ່ມີຕໍ່ຄອບຄົວ ກໍ່ຄືຍາດພີ່ນ້ອງຂອງທະຫານອາເມຣິກາ ຜູ້ທີ່ຫາຍສາບສູນໃນປາງສົງຄາມຢູ່ລາວ ແລະ ຈະສືບຕໍ່ໃຫ້ການຮ່ວມມື ໃນການຊອກຫາຄົນອາເມຣິກາທີ່ຫາຍສາບສູນຢູ່ລາວ ເຊິ່ງເປັນການປະຕິບັດນະໂຍບາຍມະນຸດສະທຳອັນສະເໝີຕົ້ນສະເໝີປາຍຂອງລັດ ຖະບານ ເຖິງປັດຈຸບັນ ໄດ້ທຳການປະຕິບັດງານຮ່ວມສຳຫຼວດ ແລະ ຂຸດຄົ້ນສຳເລັດ 134 ຄັ້ງ ແລະ ໄດ້ສົ່ງມອບຊາກສົບທະຫານອາເມລິກາ ໃຫ້ລັດຖະບານອາເມຣິກາຢ່າງເປັນທາງການແລ້ວ 269 ຄົນ ໃນຈຳນວນ 575 ຄົນທີ່ຫາຍສາບສູນຢູ່ລາວ ແລະ ຍັງເຫຼືອ 306 ຄົນທີ່ຈະສືບຕໍ່ຄົ້ນຫາ.
ຂ່າວແຈ້ງຕື່ມອີກວ່າ: ໃນວັນດຽວກັນນີ້ ທ່ານນາງ ແອນກຣີ ຟິດສ ປະທານສະມາຄົມຄອບຄົວທະຫານອາເມຣິກາ ທີ່ຫາຍສາບສູນໃນປາງສົງຄາມຢູ່ອາຊີຕາເວັນອອກສ່ຽງໃຕ້ ກໍ່ໄດ້ເຂົ້າພົບປະກັບທ່ານ ພົງສະຫວັດ ບຸບຜາ ລັດຖະມົນຕີ ຫົວໜ້າຫ້ອງວ່າການສຳນັກງານປະທານປະເທດ.
ໃນໂອກາດການເຄື່ອນໄຫວຢ້ຽມຢາມລາວ ທ່ານປະທານສະມາຄົມຄອບຄົວທະຫານອາເມລິກາ ທີ່ຫາຍສາບສູນໃນປາງສົງຄາມຢູ່ອາຊີຕາເວັນອອກສ່ຽງໃຕ້ ພ້ອມດ້ວຍຄະນະ ຍັງໄດ້ພົບປະກັບເຈົ້າໜ້າທີ່ຂັ້ນສູງຂອງລາວ ເຊັ່ນ: ກະຊວງປ້ອງກັນປະເທດ ແລະ ໄປຢ້ຽມຢາມການປະຕິບັດງານຮ່ວມຄັ້ງທີ 2 ປີ 2015 ກ່ຽວກັບການສຳຫຼວດ ແລະ ຂຸດຄົ້ນຫາຮ່ອງຮອຍ ແລະ ສິ່ງເສດເຫຼືອຂອງທະຫານອາເມຣິກາ ທີ່ຫາຍສາບສູນໃນປາງສົງຄາມ ທີ່ກຳລັງດຳເນີນຢູ່ແຂວງສະຫວັນນະເຂດ.
ແຫລ່ງຂ່າວ: ວຽງຈັນໃໝ່