ໂຄງການ​ແລກປ່ຽນ​ສຳນັກງານສູນ​ກາງ​ສະຫະພັນ​ກຳມະບານລາວ ໄດ້​ຮັບ​ການ​ລົງ​ນາມ​ໃນ​ສັນຍາ ໄດ້​ເລີ່ມ​ຈັດ​ຕັ້ງ​ປະຕິບັດ​ໃນ​ວັນທີ 15/7/2013 ລວມ 19 ເດືອນ ຊຶ່ງ​ຕັ້ງ​ຢູ່​ເຂດ​ບ້ານ​ນາ​ແຄ​ຄຳ (ເສັ້ນທາງ​ວຽງ​ຈັນ 450 ປີ) ເມືອງ​ໄຊ​ທານີ ນະຄອນຫຼວງ​ວຽງຈັນ ໃນ​ເນື້ອທີ່​ດິນ 11.203 ຕາແມັດ ຖົມ​ດິນ​ປຸກ​ສ້າງ​ອາຄານ​ສຳນັກ​ງານ​ຂະໜາດ 29×43 ແມັດ ສູງ 4 ຊັ້ນ ​ມີ​ຂັ້ນໄດ​ໄຟຟ້າ (ລິບ) ພ້ອມ​ກັບ​ການ​ຕົບແຕ່ງ​ພາຍ​ໃນຄົບ​ຊຸດ ມີ​ລານ​ຈອດ​ລົດ ຫ້ອງ​ອາຫານ ກຳແພງ​ອ້ອມ​ຮອບ ເສັ້ນທາງ​ເຂົ້າ-ອອກ ສະໜອງ​ເຟີ​ນີ​ເຈີ ແລະ ພາຫະນະ​ເຄື່ອງມື​ອຸປະກອນ​ຮັບ​ໃຊ້​ວຽກ​ງານ​ຈຳນວນໜຶ່ງ ສຳຄັນ​ທີ່​ສຸດ​ແມ່ນ​ບໍ່​ໄດ້​ແຕະຕ້ອງ​ເຖິງ​ງົບປະມານ​ຂອງ​ລັດ ແລະ ບໍ່​ໄດ້​ຮັບ​ຜົນ​ກະທົບ​ຈາກຄວາມ​ຫຍຸ້ງຍາກ​ດ້ານ​ການ​ເງິນຂອງ​ລັດຖະບານ ໂຄງການ​ໄດ້​ສຳເລັດ​ໄວ​ກວ່າ​ກຳນົດ ທັງ​ເປັນ​ໂຄງການ​ຮ່ວມ​ມື​ທີ່​ມີ​ປະ​ສິດທິ​ຜົນ ແລະ ສາມາດ​ເປັນ​ຕົວ​ແບບ​ທີ່​ດີ ໃຫ້​ແກ່​ການ​ຮ່ວມ​ມື​ລະຫວ່າງພາກ​ລັດ​ກັບ​ເອກະ​ຊົນ​ໃນ​ອະ​ນາຄົດ ໂຄງການ​ແລກປ່ຽນ​ສຳນັກງານ​ສູນ​ກາງ​ສະຫະພັນ​ກຳ​ມະບານ​ລາວ ​ແມ່ນ​ບໍລິສັດ ​ຣາ​ມາຢາ​ນາ​ບູ​ຕິ ​ຈຳກັດ ເປັນ​ຜູ້​ລົງທຶນ​ຜູ້ດຽວ ດັ່ງນັ້ນ​ໄດ້​ມອບ​ສຳນັກງານໃໝ່​ໃຫ້​ພະນັກງານ-ລັດຖະກອນສູນ​ກາງ​ສະຫະພັນ​ ກຳມະບານ ເປັນ​ເຈົ້າ​ການ​ຄຸ້ມ​ຄອງປົກ​ປັກ​ຮັກສາ ແລະ ນຳ​ໃຊ້​ໃຫ້​ມີ​ປະ​ສິດທິ​ຜົນ.

ພິທີ​ມອບ-ຮັບ​ໂຄງການ​ແລກປ່ຽນ​ສຳນັກງານ​ສູນ​ກາງ​ສະຫະພັນ​ກຳມະບານ​ລາວ ໄດ້​ຈັດ​ຂຶ້ນວັນ​ທີ 30 ມັງກອນ 2015 ທີ່​ຜ່ານມາ​ ໂດຍ​ມີ​ທ່ານ ​ດຣ. ພັນ​ຄຳ ວິພາວັນ ຮອງ​ນາຍົກລັດຖະມົນຕີ ລັດຖະ​ມົນຕີ​ວ່າການ​ກະຊວງ​ສຶກ​ສາທິ​ການ ແລະ ກີລາ ທ່ານ ຄຳ​ຫຼ້າ ລໍ​ລອນ​ສີ ປະທານ​ສູນ​ກາງ​ສະຫະ​ພັນ​ກຳມະບານ​ລາວ ມີ​ລັດ​ຖະມົນຕີ​ວ່າການ ຊ່ວຍ​ວ່າການ ຕາງໜ້າ​ນະຄອນຫຼວງ​ວຽງ​ຈັນ ອົງການຈັດຕັ້ງ​ມະຫາຊົນ ແມ່ຍິງ ຊາວ​ໜຸ່ມ ປະທານ​ບໍລິສັດ​ຜູ້​ຮັບເໝົາ ພະນັກງານ-ລັດຖະກອນພາຍ​ໃນ ແລະ ແຂກ​ຖືກ​ເຊີນ​ເຂົ້າຮ່ວມ.

ແຫລ່ງ​ຂ່າວ: ວຽງ​ຈັນ​ໃໝ່