ພິທີເຊັນສັນຍາແລກປ່ຽນສຳນັກງານ ແລະ ທີ່ດິນບ່ອນເກົ່າ ສຳນັກງານ ແລະ ທີ່ດິນບ່ອນໃໝ່ ລະຫວ່າງພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ກັບບໍລິສັດ ທີເຄກຣຸບ ຈຳກັດຜູ້ດຽວ ໄດ້ຈັດຂຶ້ນໃນວັນທີ 28 ມັງກອນ 2015 ທີ່ພະແນກ ຖວທ ນວ ໃຫ້ກຽດລົງນາມໃນບົດບັນທຶກຄັ້ງນີ້ ລະຫວ່າງທ່ານນາງ ວັນເພັງ ແກ້ວນະຄອນ ຫົວໜ້າພະແນກ ຖວທ ນວ ແລະ ທ່ານ ທັດນະຄອນ ທຳມະວົງ ປະທານບໍລິສັດ ທີເຄກຣູບ ຈຳກັດຜູ້ດຽວ ໂດຍການເຂົ້າຮ່ວມເປັນສັກຂີພິຍານຂອງທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງ ພ້ອມດ້ວຍຕາງໜ້າພະແນກການກ່ຽວຂ້ອງສອງຝ່າຍເຂົ້າຮ່ວມ.
ການຮ່ວມລົງນາມໃນຄັ້ງນີ້ ແມ່ນເພື່ອແລກປ່ຽນທີ່ດິນ ແລະ ສຳນັກງານຂອງພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນວ ຫຼັງເກົ່າ ໃຫ້ບໍລິສັດ ທີເຄກຣຸບ ຈຳກັດຜູ້ດຽວ ພ້ອມນີ້ ບໍລິສັດດັ່ງກ່າວຍັງໄດ້ຈັດສັນເນື້ອທີ່ດິນຈຳນວນ 1 ເຮັກຕາ ທີ່ຕັ້ງຢູ່ແຄມທາງຕັດໃໝ່ ລະຫວ່າງບ້ານໜອງບົວທອງ-ໜອງບຶກ ເພື່ອເປັນບ່ອນປຸກສ້າງສຳນັກງານໃໝ່ຂອງພະແນກ ຖວທ ນວ ແລະ ກອງວິຊາການໜັງສືພິມວຽງຈັນໃໝ່ ແລະ ວຽງຈັນທຸລະກິດ-ສັງຄົມ ໂດຍບໍລິສັດດັ່ງກ່າວ ໄດ້ສຳຫຼວດຄິດໄລ່ອອກແບບທາງດ້ານເຕັກນິກຕ່າງໆ ເຊິ່ງເປັນຕຶກອາຄານ 3 ຊັ້ນ ຮູບຊົງລາວ ປະກອບມີ 39 ຫ້ອງເຮັດວຽກ ມີຫ້ອງປະຊຸມ ຫ້ອງຮັບແຂກ ແລະ ຫ້ອງມ້ຽນເຄື່ອງຄົບຊຸດ ມູນຄ່າການກໍ່ສ້າງເບື້ອງຕົ້ນປະມານ 52,6 ຕື້ກີບ ເຊິ່ງລວມມູນຄ່າໃນການກໍ່ສ້າງທັງໝົດປະມານ 89 ຕື້ກວ່າກີບ ໂດຍບໍລິສັດດັ່ງກ່າວ ຈະໄດ້ຈັດຕັ້ງປະຕິບັດດຳເນີນການກໍ່ສ້າງຢູ່ໃນໄລຍະເວລາ 3 ປີໃຫ້ສຳເລັດ.
ການແລກປ່ຽນດິນຄັ້ງນີ້ ກໍ່ເນື່ອງຈາກວ່າ ສຳນັກງານເກົ່າຂອງພະແນກດັ່ງກ່າວ ປະກອບມີ 6 ຂະແໜງການ 6 ກອງວິຊາການ ທີ່ຕັ້ງຢູ່ກະແຈກກະຈາຍ ມີຄວາມຫຍຸ້ງຍາກແກ່ການຄຸ້ມຄອງບໍລິຫານ ຫ້ອງການເຮັດວຽກບໍ່ພຽງພໍກັບຈຳນວນພະນັກງານ ຢູ່ກະແຈກກະຈາຍບໍ່ລວມສູນສະຖານທີ່ຈອດລົດຄັບແຄບ ແອອັດ ຕຶກອາຄານຕ່າງໆ ເປັນຕຶກເກົ່າແກ່ ຊຸດໂຊມຫຼາຍ ຖ້າຈະປຸກໃໝ່ແມ່ນຕ້ອງໃຊ້ງົບປະມານຢ່າງຫຼວງຫຼາຍ ເຊິ່ງລັດບໍ່ສາມາດສະໜອງໃຫ້ໄດ້ ນອກນີ້ ການຄຸ້ມຄອງພາຫະນະສື່ມວນຊົນຂອງ ນວ ມີຄວາມຫຍຸ້ງຍາກ ເນື່ອງຈາກມີວິທະຍຸກະຈາຍສຽງສອງລະບົບຄື້ນ ທີ່ຕັ້ງຢູ່ຄົນລະບ່ອນ ແລະ ພາຍໃຕ້ການຄຸ້ມຄອງແຕກຕ່າງກັນ.
ການຍ້າຍສຳນັກງານໃໝ່ນີ້ ຈະມີຄວາມສະດວກຫຼາຍດ້ານ ເປັນຕົ້ນແມ່ນ ຈະໄດ້ອາຄານຫຼັງໃໝ່ທີ່ໄດ້ມາດຕະຖານ ແລະ ມີສະຖານທີ່ຈອດລົດກວ້າງຂວາງ ນອກນີ້ໃນອະນາຄົດຂ້າງໜ້ານີ້ ເຂດດັ່ງກ່າວຍັງຈະກາຍເປັນນະຄອນຫຼວງວຽງຈັນ.
ແຫລ່ງຂ່າວ: ວຽງຈັນໃໝ່