ຂປລ. ຕອນບ່າຍວັນທີ 23 ມັງກອນ 2015 ນີ້ ທີ່ຫ້ອງວ່າການລັດຖະບານ, ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ໃຫ້ກຽດຕ້ອນ ຮັບການເຂົ້າຢ້ຽມຄຳນັບຂອງ ທ່ານ ຈ໋ອງ ອຸຍ ຮົ່ວ (Chung Ui Hwa) ປະທານສະພາແຫ່ງຊາດ ແຫ່ງ ສາທາລະນະລັດ ເກົາຫລີ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມສັນຖະວະໄມຕີ ຢ່າງເປັນທາງການຢູ່ ສປປ ລາວ ແຕ່ວັນທີ 21-24 ມັງກອນ 2015.
ທ່ານ ນາຍົກລັດຖະມົນຕີ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ທ່ານປະທານສະພາແຫ່ງຊາດ ແຫ່ງ ສ ເກົາຫລີ ທີ່ໄດ້ເດີນທາງມາຢ້ຽມຢາມສັນຖະວະໄມຕີ ສປປ ລາວ ຢ່າງເປັນທາງການໃນຄັ້ງນີ້ ເຊິ່ງເປັນການ ປະກອບສ່ວນ ສຳຄັນ ເຂົ້າໃນການ ສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສອງປະເທດ ສປປ ລາວ ແລະ ສ ເກົາຫລີ ໂດຍສະເພາະ ແມ່ນລະຫວ່າງສອງອົງການນິຕິບັນຍັດຂອງສອງປະເທດ ໃຫ້ນັບມື້ມີ ການພັດທະນາຂຶ້ນ ເລື້ອຍໆ. ພ້ອມນີ້ ທ່ານຍັງໄດ້ສະແດງ ຄວາມຊົມເຊີຍ ສະພາແຫ່ງຊາດຂອງສອງປະເທດ ທີ່ໄດ້ມີການພົວພັນຮ່ວມມືກັນ ໃນຫລາຍລະດັບ ໃນໄລຍະຜ່ານມາ ເຮັດການປະຕິບັດໜ້າທີ່ຂອງອົງການນິຕິບັນຍັດ, ການສ້າງກົດໝາຍ ແລະ ການຕິດຕາມກວດກາຂອງສະພາແຫ່ງຊາດ ມີປະສິດທິຜົນ ດີຂຶ້ນ.
ທ່ານປະທານ ສະພາແຫ່ງຊາດ ສ ເກົາຫລີ ກໍໄດ້ສະແດງຄວາມຂອບໃຈ ຕໍ່ທ່ານນາຍົກລັດຖະ ມົນຕີ ທີ່ໃຫ້ກຽດຕ້ອນຮັບອັນອົບອຸ່ນ ພ້ອມທັງໄດ້ແຈ້ງໃຫ້ຊາບຈຸດປະສົງຂອງການເດີນທາງມາຢ້ຽມຢາມ ສປປ ລາວ ໃນຄັ້ງນີ້ ໂດຍສະເພາະການພົບປະຫາລື ສອງຝ່າຍ ກັບຄະນະຜູ້ແທນສະພາແຫ່ງຊາດລາວ ເພື່ອສືບຕໍ່ເພີ່ມທະວີການຮ່ວມມື ໃນຕໍ່ໜ້າ.
ແຫລ່ງຂ່າວ: ສຳນັກຂ່າວສານປະເທດລາວ