ພິທີເຊັນສັນຍາໂຄງການບູລະນະປະຕິສັງຂອນພິພິທະພັນຫໍພະແກ້ວ ຄັ້ງທີ 3 ໄດ້ຈັດຂຶ້ນຕອນແລງວັນທີ 21 ມັງກອນ 2015 ທີ່ພິພິທະພັນຫໍພະແກ້ວ ຮ່ວມລົງນາມຄັ້ງນີ້ ຕາງໜ້າໃຫ້ເຈົ້າຂອງໂຄງການໂດຍແມ່ນ ທ່ານນາງ ວັນເພັງ ແກ້ວນະຄອນ ຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ຫົວໜ້າຄະນະຮັບຜິດຊອບອະນຸກຳມະການບໍລິຫານງົບປະມານ ແລະ ກອງເລຂາຮັບຜິດຊອບໂຄງການບູລະນະປະຕິສັງຂອນພິພິທະພັນຫໍພະແກ້ວ ຄັ້ງທີ 3 ແລະ ຕາງໜ້າຜູ້ຮັບເໝົາກໍ່ສ້າງ ໂດຍແມ່ນທ່ານ ບຸນມີ ສອນມີໄຊ ຜູ້ອຳນວຍການບໍລິສັດ ມີພູນຊັບກໍ່ສ້າງ ຈຳກັດ ໂດຍການເຂົ້າຮ່ວມເປັນສັກຂີພິຍານຂອງທ່ານ ດຣ. ພັນຄຳ ວິພາວັນ ຮອງນາຍົກລັດຖະມົນຕີ ລັດຖະມົນຕີວ່າການກະຊວງສຶກສາທິການ ແລະ ກີລາ ຜູ້ຊີ້ນຳຂົງເຂດວັດທະນະທຳ-ສັງຄົມ ປະທານຄະນະຊີ້ນຳລະດັບຊາດ ໂຄງການບູລະນະປະຕິສັງຂອນພິພິທະພັນຫໍພະແກ້ວ ຄັ້ງທີ 3 ທ່ານ ສຈ.ດຣ. ບໍ່ແສງຄຳ ວົງດາລາ ລັດຖະມົນຕີວ່າການກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ຮອງປະທານຄະນະຊີ້ນຳລະດັບຊາດໂຄງການ ທ່ານ ດຣ. ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ຮອງປະທານຄະນະຊີ້ນຳລະດັບຊາດໂຄງການ ພ້ອມດ້ວຍຄະນະຮັບຜິດຊອບໂຄງການ ທ່ານເຈົ້າເມືອງຈັນທະບູລີ ແລະ ພາກສ່ວນທີ່ກ່ຽວຂ້ອງທັງສອງຝ່າຍ.
ໂຄງການບູລະນະປະຕິສັງຂອນພິພິທະພັນຫໍພະແກ້ວ ຄັ້ງທີ 3 ໄດ້ເປີດຢ່າງເປັນທາງການ ວັນທີ 5-6 ທັນວາ 2014 ຈາກນັ້ນຕໍ່ມາ ກໍ່ໄດ້ຈັດຫາປະມູນຜູ້ຮັບເໝົາກໍ່ສ້າງ ແລະ ຜ່ານການປະມູນ ເຫັນວ່າບໍລິສັດ ມີພູນຊັບກໍ່ສ້າງ ຈຳກັດ ເປັນຜູ້ຊະນະການປະມູນ ໃນມູນຄ່າການກໍ່ສ້າງ 6,35 ຕື້ກີບ ແລະ ໜ້າວຽກໂຄງການທີ່ຈະໄດ້ສ້ອມແປງໃນຄັ້ງນີ້ ປະກອບມີ 8 ໜ້າວຽກໃຫຍ່ຄື: ວຽກຮື້ຖອນ ແລະ ສ້ອມແປງຫຼັງຄາ ວຽກຮື້ຖອນເພດານດ້ານໃນສ້ອມແປງຄືນ ແລະ ຕີເພດານດ້ານນອກ ວຽກສ້ອມແປງຊຸ້ມປະຕູປ່ອງຢ້ຽມພ້ອມບານ ວຽກພື້ນ ແລະ ສ້ອມແປງຄືນ ວຽກຮື້ຝາລະບຽງດ້ານໃນ ແລະ ດ້ານນອກ ວຽກຂັ້ນໄດທາງຂຶ້ນ ສ້ອມແປງຖ້ານ 1 ຖ້ານ 2 ພ້ອມຕິດກາໂລດິນເຜົາ ວຽກອະນາໄມ ເພື່ອທາສີໃສ່ຝາດ້ານໃນ ດ້ານນອກ ພ້ອມແອວຂັນ ແລະ ວຽກສີມີ 15 ລາຍການ ຕາມໃບປະເມີນລາຄາ ເຊິ່ງການຈັດຕັ້ງປະຕິບັດກໍ່ສ້າງ ຈະໄດ້ເລີ່ມລົງມືນັບແຕ່ມື້ເຊັນສັນຍາເປັນຕົ້ນໄປ ແລະ ຈະໃຫ້ສຳເລັດພາຍໃນເດືອນທັນວາ 2015 ເພື່ອສະເຫຼີມສະຫຼອງສອງວັນປະຫວັດສາດ.
ສຳລັບການລະດົມທຶນຈາກສັງຄົມ ເພື່ອເປັນງົບເຂົ້າໃນໂຄງການກໍ່ສ້າງ ນັບແຕ່ມື້ເປີດໂຄງການເປັນຕົ້ນມາຮອດປັດຈຸບັນ ໄດ້ເງິນທັງໝົດແລ້ວປະມານ 745,53 ລ້ານກີບ ແຈ້ງເຈດຈຳນົງ 250,9 ລ້ານກີບ ແລະ ໄດ້ຈາກການບໍລິຈາກລາຍວັນ 70 ກວ່າລ້ານກີບ.
ແຫລ່ງຂ່າວ: ວຽງຈັນໃໝ່