ຄືດັ່ງທີ່ຮູ້ນຳກັນແລ້ວໃນລະດູຝົນຜ່ານມາ ຢູ່ນະຄອນຫຼວງວຽງຈັນ ໄດ້ເກີດມີສະພາບນ້ຳຖ້ວມເສັ້ນທາງຫຼາຍເສັ້ນ ຍ້ອນບັນຫາທໍ່ລອດທາງ, ຄອງລະບາຍນ້ຳຢູ່ຕາມຈຸດຕ່າງໆ ມີການອຸດຕັນ. ເຖິງແນວໃດກໍຕາມ ມາຮອດດຽວນີ້ຄອງລະບາຍນ້ຳສາຍຫຼັກນັບແຕ່ວັດໄຕ-ໜອງດ້ວງ -ໜອງບົວ ທອງ ລົງສູ່ຄອງລະບາຍນ້ຳສັກ ໄປຫາ ຮອງແຊງ ລົງບຶງທາດຫຼວງ, ເຫັນວ່າຍັງມີຫຼາຍຈຸດເກີດມີສະພາບນ້ຳອັ່ງ, ນ້ຳເສຍປະປົນຢູ່ ອັນເນື່ອງມາຈາກບາງຈຸດມີສິ່ງກີດຂວາງບໍ່ສາ ມາດເຮັດໃຫ້ນ້ຳໄຫຼສະດວກ ຖ້າຫາກພວກເຮົາບໍ່ຊອກຫາວິທີແກ້ໄຂຕັ້ງແຕ່ຫົວທີອາດມີຜົນກະທົບ ຕໍ່ບັນຫານ້ຳຖ້ວມທາງແບບຊ້ຳຮອຍຄືກັບໄລຍະລະດູຝົນຜ່ານມາ.
ສະພາບນ້ຳປ່າສັກ, ຮ່ອງແຊງໃນປັດຈຸບັນນັບວ່າມີຄວາມແຕກຕ່າງຈາກຫຼາຍປີກ່ອນ, ເຊິ່ງໃນແຕ່ລະຍ່ານຄອງລະບາຍນ້ຳເກີດມີຜັກຕົບ, ແລະ ຫຍ້າປະເພດຕ່າງໆ ປົກຫຸ້ມຢູ່ຕາມເກາະດອນນ້ອຍຂອງຄອງນ້ຳ, ສະພາບນ້ຳເປືເປື້ອນ, ບໍ່ໄສຄືແຕ່ກ່ອນ ຍ້ອນຂາດການບົວລະບັດຮັກສາ. ນັບແຕ່ຕົ້ນຄອງລະບາຍນ້ຳຈາກວັດໄຕມາຮອດໜອງບົວ ທອງມີສະພາບການ
ຖິ້ມເສດນ້ຳມັນ ແລະ ສິ່ງເສດເຫຼືອອື່ນໆລົງສູ່ຄອງນ້ຳສາຍດັ່ງກ່າວນີ້, ພາໃຫ້ເກີດມີກິ່ນເໝັນ. ຖ້າຍັງຂາດການເອົາໃຈໃສໃນການເຮັດອະນາໄມລ່ວງຄອງລະບາຍດັ່ງກ່າວ, ຈະກໍ່ໃຫ້ເກີດຜົນກະທົບຫຼາຍໆຢ່າງຕາມມາ ເຊັ່ນ : ຈະມີກິ່ນເໜົ່າເໝັນຈະເປັນບ່ອນແຜ່ຂະຫຍາຂອງຍຸງລາຍ ແລະ ເມື່ອຝົນຕົກລົງມາແຮງອາດເກີດສະພາບນ້ຳຖ້ວມກໍເປັນໄດ້.
ນອກຈາກນີ້, ຍັງມີຄອງລະບາຍນ້ຳອີກຫຼາຍສາຍຢູ່ໃນນະຄອນຫຼວງວຽງຈັນ ເຊິ່ງພາກ ສ່ວນກ່ຽວຂ້ອງຄວນຈະຕ້ອງໄດ້ເອົາໃຈໃສ່ຊອກວິທີທາງແກ້ໄຂສິ່ງເປີ້ເປື້ອນດັ່ງກ່າວຄື: ຄອງ ລະບາຍນ້ຳຈາກຂົວຂາວເສັ້ນທາງຄູວຽງ ຫາ ຕະຫຼາດຂົວດິນ ຫາ ໂພນທັນ, ຮອງແກ ລົງສູ່ທາດຫຼວງ ແລະ ຈາກໜອງບອນ ບ້ານສີບຸນເຮືອງ ຫາ ຮອງໄກ່ແກ້ວ ອອກສູ່ໂພນພະເນົາ ລົງຮອງແຊງ ແລະ ອີກຈຸດໜຶ່ງຈາກ ຮອງແຊງ ອອກສູ່ໂພນຕ້ອງ ເຊິ່ງເປັນຈຸດທີ່ເກີດມີນ້ຳຖ້ວມທາງເປັນປະຈຳໃນແຕ່ລະປີ. ສະນັ້ນ ຈະຕ້ອງໄດ້ເບິ່ງຄືນບັນຫາການປຸກສ້າງ ເພາະເປັນສິ່ງກີດຂວາງການລະບາຍນ້ຳອອກຈາກຕົວເມືອງ.
ແຫລ່ງຂ່າວ: ລາວພັດທະນາ