ເພື່ອເປັນການສະກັດກັ້ນປາກົດການຫຍໍ້ທໍ້ທີ່ເກີດຂຶ້ນ ຫ້ອງການອຸດສາຫະກຳ-ການຄ້າ ເມືອງຫາດຊາຍຟອງ ນະຄອນຫຼວງ ຮ່ວມກັບ ປກສ ເມືອງ ໄດ້ຕິດຕາມກວດກາ ໃນເວລາ 6:30 ໂມງຂອງວັນທີ 5 ມັງກອນ 2015 ລົງກວດກາລົດຮຸນໄດສອງຄັນ ທີ່ກຳລັງຂົນເປັດ ໄກ່ ທີ່ພວກກ່ຽວໄດ້ນຳເຂົ້າມາຈາກປະເທດເພື່ອນບ້ານ.
ຕາມເຈົ້າໜ້າທີ່ໃຫ້ຮູ້ວ່າ: ຂະບວນການລັກລອບນຳເຂົ້າສັດປີກດັ່ງກ່າວ ແມ່ນໄດ້ມີຢູ່ຈຸດເຂດບ້ານນາລ້ອງເປັນສ່ວນຫຼາຍ ຜ່ານການກວດກາຂອງເຈົ້າໜ້າທີ່ ຕາມການພົບເຫັນຕົວຈິງ ເຫັນວ່າຢູ່ໃນລົດບັນທຸກເຄື່ອງຂອງດັ່ງກ່າວນັ້ນແມ່ນມີ: ເປັດ ໄກ່ ທີ່ພວກກະທຳຜິດ ໄດ້ນຳເຂົ້າມາຈາກປະເທດເພື່ອນບ້ານແບບບໍ່ໄດ້ຮັບອະນຸຍາດ ແມ່ນຜິດຕໍ່ລະບຽບກົດໝາຍ ແລະ ກໍ່ເປັນອີກຊ່ອງທາງທີ່ເຮັດໃຫ້ປາກົດການຫຍໍ້ທໍ້ດັ່ງກ່າວ ມັກຈະເກີດຂຶ້ນຊ້ຳແລ້ວຊ້ຳອີກ ເຊິ່ງລາຍການຢຶດໄດ້ມີໄກ່ລາດນ້ອຍເປັນຈຳນວນ 57kgເປັດ 56 kg ໄກ່ລາດໃຫຍ່ເປັນ 30 ໂຕ ລວມ 113 ກັບ 30 ໂຕ ແລະ ໄກ່ງວງອີກຈຳນວນໜຶ່ງ ຕໍ່ກັບການສອບຖາມຂອງເຈົ້າໜ້າທີ່ຕໍ່ຜູ້ກ່ຽວ ຖືວ່າເປັນການກະທຳຜິດຄັ້ງທຳອິດ ສະນັ້ນ ຈຶ່ງໄດ້ກ່າວເຕືອນເຮັດບົດບັນທຶກລາຍງານຕໍ່ຂັ້ນເທິງ ແລະ ມີການປັບໄໝຜູ້ກ່ຽວ ຈຳນວນ 5.600.000 ກີບ ສ່ວນສິນຄ້າດັ່ງກ່າວ ແມ່ນໄດ້ແຈ້ງໃຫ້ໜ່ວຍງານກ່ຽວຂ້ອງມາກວດກາຕົວຈິງ.
ກ່ອນໜ້ານີ້ ໃນວັນທີ 27 ທັນວາ 2014 ຜ່ານມາ ຫ້ອງການອຸດສາຫະກຳ ແລະ ການຄ້າ ເມືອງຫາດຊາຍຟອງ ໄດ້ລົງກວດກາສິນຄ້າທີ່ເກືອດຫ້າມ ແລະ ໝົດອາຍຸ ພົບເຫັນມີເຂົ້າໜົມ 171 ອັນ 8 ລາຍການ ຢາສູບ 8 ຕຸດ ໄພ້ 20 ກັບ ແລະ ສິ້ນໄໝທຽມ 13 ຜືນ ສ່ວນສິນຄ້າດັ່ງກ່າວນີ້ ຫ້ອງການການຄ້າເມືອງ ແມ່ນໄດ້ສົ່ງໃຫ້ກັບພະແນກອຸດສາຫະກຳ ແລະ ການຄ້າ ນວ ເພື່ອທຳລາຍຖິ້ມ.
ແຫລ່ງຂ່າວ: ວຽງຈັນໃໝ່