ເສັ້ນທາງເລກ 11 ແຕ່ສາມແຍກເກົ້າລ້ຽວຫາເມືອງສັງທອງ, ນະຄອນ ຫລວງວຽງຈັນ, ປັດຈຸບັນມີບາງຍ່ານເລີ່ມ ເປັນຄື້ນ ແລະ ມີສະພາບບ່ວມ, ຫລັງ ຈາກມີລົດບັນທຸກໜັກແລ່ນຜ່ານໄປມາເປັນຈຳນວນຫລາຍໃນແຕ່ລະວັນ, ເຊິ່ງ ຖ້າຫາກພາກສ່ວນກ່ຽວຂ້ອງຍັງບໍ່ເຂັ້ມງວດຕໍ່ການກວດກາບັນຫານັ້ນ, ອາດເຮັດ ໃຫ້ອາຍຸການນໍາໃຊ້ເສັ້ນທາງດັ່ງກ່າວ ບໍ່ໄດ້ດົນ.
ນັກຂ່າວພວກເຮົາໄດ້ລົງເບິ່ງສະພາບການສັນຈອນຂອງພາຫະນະບົນ ເສັ້ນທາງດັ່ງກ່າວໃນວັນທີ 20 ມັງກອນນີ້, ພາຍຫລັງມີປະຊາຊົນສະເໜີວ່າມີລົດບັນທຸກໜັກເປັນຈຳນວນຫລາຍ ແລ່ນໄປ ມາເຮັດໃຫ້ເສັ້ນທາງເລີ່ມຊຸດໂຊມ ແລະ ກໍເປັນດັ່ງວ່າແທ້ໂດຍມີລົດບັນທຸກແຮ່, ຫີນ-ຊາຍ ນັບແຕ່ຂະໜາດນ້ອຍ 6 ຕີນໄປ ຈົນຮອດຂະໜາດ 12 ຕີນແລ່ນ ໄປມາບໍ່ຂາດສາຍ, ຂະນະດຽວກັນຈຸດກວດກາສັ່ງນ້ຳໜັກລົດໃນເສັ້ນທາງດັ່ງກ່າວກໍບໍ່ມີ ໂດຍສະເພາະແຕ່ສາມແຍກ ເກົ້າລ້ຽວຫາເມືອງສັງທອງ, ຈຶ່ງເປັນຊ່ອງຫວ່າງໃຫ້ຜູ້ກອບການຂົນສົ່ງສີນຄ້າ, ບໍລິການແຮ່ຕ່າງໆ ພາກັນສວຍໂອ ກາດ ໃສ່ນ້ຳໜັກເກີນຫລາຍ, ລົດບັນທຸກແຮ່ບາງຄັນການປົກຫຸ້ມບໍ່ຮັບປະກັນດີເຮັດໃຫ້ມີເສດດິນເຮ່ຍສ້າງ ຄວາມເປື້ອນ ເປີະ ໃຫ້ເສັ້ນທາງ.
ພະແນກໂຍທາທິການ ແລະ ຂົນສົ່ງ,ນະຄອນຫລວງວຽງຈັນໃຫ້ຮູ້ວ່າ:ເສັ້ນທາງດັ່ງກ່າວ, ແມ່ນໄດ້ຮັບການສະ ໜັບສະໜູນດ້ານການເງິນຈາກລັດຖະບານໄທ ກໍຄືອົງການນິດາ(NEDA) ໃນມູນຄ່າ 1.392 ລ້ານບາດ (ສະກຸນເງິນໄທ) ຫລື ປະມານ 348 ຕື້ກີບ,ໃນນັ້ນ 30% ແມ່ນຊ່ວຍເຫລືອລ້າ ແລະ 70% ແມ່ນກູ້ຢືມດອກເບ້ຍຕ່ຳໄລຍະຍາວ, ມີຄວາມຍາວ 204 ກິໂລແມັດແຕ່ແຍກລະຫວ່າງທາງຫລວງແຫ່ງຊາດເລກ 13 ເໜືອ ແລະ ທາງສີໄຄ, ເມືອງສີໂຄດ ຕະບອງ, ນະຄອນ ຫລວງວຽງຈັນລຽບຕາມແມ່ນ້ຳຂອງໄປທາງທິດຕາເວັນຕົກສຽງເໜືອ ແລະ ຂ້າມຜ່ານນ້ຳຂອງ ໄປເຊື່ອມຈອດກັບເສັ້ນ ທາງເລກ 4 ຢູ່ບ້ານຄົກເຂົ້າດໍ, ເມືອງປາກລາຍ, ແຂວງໄຊຍະບູລີ. ເພື່ອອຳນວຍໃຫ້ແກ່ການຄົມ ມານາຄົມໄປມາຫາສູ່ລະ ຫວ່າງປະຊາຊົນ, ການຂົນສົ່ງພາຍໃນປະເທດມີຄວາມສະດວກຫລາຍຂຶ້ນ, ນອກຈາກນີ້, ຍັງເປັນເສັ້ນທາງເຊື່ອມຕໍ່ກັບຊາຍ ແດນລາຊະອານາຈັກໄທນຳດ້ວຍ, ອັນໄດ້ປະກອບສ່ວນ ສຳຄັນໃນການຊຸກຍູ້ດ້ານເສດຖະກິດ- ສັງຄົມ, ການຄ້າ, ການລົງທຶນ ແລະ ການທ່ອງທ່ຽວຂອງລາວໃຫ້ມີການຂະ ຫຍາຍຕົວດີຍິ່ງຂຶ້ນ, ທັງຊ່ວຍ ໃຫ້ລະດັບຊີວິດການເປັນຢູ່ຂອງປະຊາຊົ ນບັນດາເຜົ່າທີ່ດຳລົງຊີວິດລຽບຕາມເສັ້ນທາງ ນັບມື້ດີຂຶ້ນເປັນກ້າວໆ. ເຊິ່ງເສັ້ນທາງສາຍນີ້, ເມື່ອກ່ອນເປັນທາງດິນແດງ, ແລວທາງຄົດໂຄ້ງຫລາຍ, ໜ້າທາງແຄບ ແລະ ເປັນຄື້ນເປັນຂຸມ, ການສັນຈອນໄປມາມີຄວາມຫຍຸ້ງຍາກລຳບາກ, ບາງປີເກີດນ້ຳຖ້ວມເສັ້ນທາງເປ່ເພເຮັດໃຫ້ການສັນຈອນຕິດຂັດເປັນເວລາດົນ ແລະ ສ້າງຄວາມສິ້ນເປືອງຫລາຍຢ່າງດັ່ງນັ້ນ, ລັດຖະບານລາວຈຶ່ງໄດ້ສະເໜີຕໍ່ລັດຖະບານໄທໃຫ້ກາ ນຊ່ວຍເຫລືອໃນການກໍ່ສ້າງສ້ອມແປງເສັ້ນທາງດັ່ງກ່າວມີມາດຕະຖານ ແລະ ອຳນວຍຄວາມສະດວກສະບາຍໃນການຄົມມານາຄົມ ໃຫ້ດີຂຶ້ນເທື່ອລະກ້າວ ແລະ ສິ່ງສຳຄັນລັດຖະບານ, ໄດ້ກຳນົດເອົາເສັ້ນທາງສາຍນີ້ເປັນເສັ້ນທາງຍຸດທະສາດທີ່ມີຄວາມສຳຄັນ ຕໍ່ການພັດທະນາເສດຖະກິດ-ສັງຄົມເວົ້າລວມ, ເວົ້າສະເພາະຢູ່ບັນດາແຂວງທີ່ມີສາຍທາງຜ່ານ ແລະ ທັງເປັນເສັ້ນທາງ ເຊື່ອມຕໍ່ລະຫວ່າງບັນດາແຂວງພາກເໜືອ, ກາງ ແລະ ໃຕ້ ແລະ ເຊື່ອມໄປຫາປະເທດເພື່ອນບ້ານ ແລະ ອານຸພາກພື້ນນຳດ້ວຍ.
ພະແນກໂຍທາທິການ ແລະ ຂົນສົ່ງ ໃຫ້ຮູ້ວ່າ:ເສັ້ນທາງສາຍນີ້ສາມາດຮັບນ້ຳໜັກໄດ້ປະມານ 30 ໂຕນ ແລະ ສາມາດນຳໃຊ້ໄດ້ປະມານ 10 ປີ, ໂດຍແມ່ນພະແນກໂຍທານະຄອນຫລວງເປັນຜູ້ຄຸ້ມຄອງ ແລະ ຍອມຮັບວ່າຕະ ຫລອດສາຍທາງຍັງບໍ່ມີຈຸດຊັ່ງນ້ຳໜັກ, ສະນັ້ນການກວດການ້ຳໜັກລົດຜ່ານມາຢູ່ເສັ້ນທາງດັ່ງກ່າວມີພຽງແຕ່ເຮັດແບບ ລັກສະນະສຸມກວດພິເສດເທົ່ານັ້ນ,ຈຶ່ງເຮັດໃຫ້ຜູ້ປະກອບການຂົນສົ່ງຈຳນວນໜຶ່ງເກີດການສວຍໂອກາດບັນທຸກສິ່ງຂອງທີ່ມີນ້ຳໜັກເກີນການຮອງຮັບຂອງທາງ ແລະ ເປັນສາເຫດໜຶ່ງພາໃຫ້ເສັ້ນທາງຊຸດໂຊມຄືດັ່ງສັງຄົມມີຄວາມເປັນຫວ່ງ, ເຊິ່ງພາກສ່ວນກ່ຽວຂ້ອງຈະໄດ້ລົງກວດກາບັນຫາດັ່ງກ່າວໃຫ້ຫລາຍຂື້ນເພື່ອສະກັດກັ້ນບໍ່ໃຫ້ເກີດມີສະ ພາບທີ່ບໍ່ດີຕາມ ມາ ແລະ ຈະນຳໃຊ້ລະບຽບກົດໝາຍຕໍ່ຜູ້ລະເມີດຢ່າງເຂັ້ມງວດເດັດຂາດ.
ແຫລ່ງຂ່າວ: ລາວພັດທະນາ