ຜູ້ແທນສະຫະພາບເອີຣົບ ອອກຮຽກຮ້ອງໃຫ້ຊາດເອີຣົບ ຮ່ວມມືກັບປະເທດຕາເວັນອອກກາງຫລາຍຂຶ້ນ ເພື່ອຮັບມືກັບໄພຄຸກຄາມຈາກກຸ່ມກໍ່ການຮ້າຍຫົວຮຸນແຮງ.
ສຳນັກຂ່າວຕ່າງປະເທດ ລາຍງານໃນວັນທີ 21 ມັງກອນນີ້ວ່າ ທ່ານ ນາງ ເຟເດີຣິກ້າ ໂມເກີຣິນີ ຜູ້ແທນລະດັບສູງດ້ານນະໂຍບາຍຕ່າງປະເທດ ຂອງສະຫະພາບເອີຣົບ ຫລື EU ໄດ້ອອກຖະແຫລງການຮຽກຮ້ອງໃຫ້ບັນດາປະເທດສະມາຊິກສະຫະພາບເອີຣົບ ຮ່ວມມືກັບໂລກອາຫລັບໃຫ້ຫລາຍຂຶ້ນ ເພື່ອຕໍ່ສູ້ກັບໄພຄຸກຄາມຈາກແນວຄິດອິດສະລາມສຸດໂຕ່ງ.
ທ່ານ ນາງ ໂມເກີຣິນີ ຍັງໄດ້ກ່າວພາຍຫລັງກອງປະຊຸມລັດຖະມົນຕີຕ່າງປະເທດ ຂອງສະຫະພາບເອີຣົບ ທີ່ຈັດຂຶ້ນຢູ່ນະຄອນຫລວງບຣຸກແຊນ ປະເທດແບນຊິກ ໂດຍໄດ້ລະບຸວ່າ ຫລັງຈາກເກີດເຫດກໍ່ການຮ້າຍຮຸນແຮງ ຢູ່ນະຄອນຫລວງປາຣີ ເມື່ອວັນທີ 7 ມັງກອນຜ່ານມາ, ສະຫະພາບເອີຣົບ ຈຳເປັນຕ້ອງໄດ້ມີມາດຕະການເພື່ອຕອບສະໜອງຕໍ່ໄພຄຸກຄາມ ຈາກກຸ່ມຕິດອາວຸດລັດອິດສະລາມ ດ້ວຍຄວາມເປັນອັນໜຶ່ງອັນດຽວກັນ ແລະ ສິ່ງທີ່ເອີຣົບຕ້ອງການຄືການເປັນພັນທະມິດ, ການປຶກສາຫາລື ແລະ ເຮັດວຽກຮ່ວມກັນ ເພື່ອຄວາມຮ່ວມມື ເນື່ອງຈາກທຸກຄົນຕ້ອງໄດ້ປະເຊີນກັບໄພຄຸກຄາມ ເຊັ່ນດຽວກັນ.