ພັກ-ລັດຖະບານຄອບຄົວ ແລະ ຍາດຕິພີ່ນ້ອງ ໄດ້ຈັດພິທີເຄື່ອນຍ້າຍອັດຖິ ສະຫາຍ ຊຽງສົມ ກຸນລະວົງ ວິລະຊົນແຫ່ງຊາດ ອະດີດກຳມະການສູນກາງພັກ ອະດີດລັດຖະມົນຕີຊ່ວຍວ່າການກະຊວງປ້ອງກັນຄວາມສະຫງົບ ຈາກວັດເທບນິມິດ (ວັດທາດຝຸ່ນ) ໄປເກັບຮັກສາໄວ້ທີ່ສຸສານແຫ່ງຊາດ ຫຼັກ 24 ນະຄອນຫຼວງວຽງຈັນ ໃນວັນທີ 17 ມັງກອນ 2015 ຜ່ານມາ ເຊິ່ງມີສະຫາຍ ພົນຈັດຕະວາ ວິໄລ ດວງມະນີ ປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ ຫົວໜ້າວິທະຍາຄານປ້ອງກັນຄວາມສະຫງົບ ພ້ອມດ້ວຍບັນດາຫົວໜ້າກົມ ຫ້ອງການ ສະມາຊິກຄອບຄົວ ແລະ ຍາດຕິພີ່ນ້ອງເຂົ້າຮ່ວມ.
ຕະຫຼອດໄລຍະການເຄື່ອນໄຫວປະຕິວັດ ສະຫາຍ ພົນຕີ ຊຽງສົມ ກຸນລະວົງ ໄດ້ຜ່ານການເປັນຜູ້ນຳໃນຫຼາຍຂົງເຂດວຽກງານທີ່ເຫັນວ່າໜັກໜ່ວງ ຫຍຸ້ງຍາກສັບສົນ ແຕ່ສະຫາຍກໍ່ຢຶດໝັ້ນໃນຄວາມຈົງຮັກພັກດີ ມີຄຸນສົມບັດສິນທຳປະຕິວັດຕັ້ງໜ້າ ເຝິກຝົນຕົນເອງໃຫ້ມີຄວາມອົດທົນຜ່ານຜ່າ ນຳພາຈັດຕັ້ງປະຕິບັດວຽກງານຢ່າງມີຄວາມຮັບຜິດຊອບສູງ ເປັນເຈົ້າການຄົ້ນຄວ້າຮ່ຳຮຽນປັບປຸງບູລະນະ ແນວທາງນະໂຍບາຍຂອງພັກ ລະບຽບກົດໝາຍຂອງລັດ ແຜນພັດທະນາເສດຖະກິດ-ສັງຄົມ ແນວທາງປ້ອງກັນຊາດ-ປ້ອງກັນຄວາມສະຫງົບ ແຕ່ລະໄລຍະໃຫ້ມີຄວາມໜັກແໜ້ນ ແລະ ເຂັ້ມແຂງເປັນກ້າວໆ ເຊິ່ງສະແດງໃຫ້ເຫັນໃນຂະບວນວິວັດແຫ່ງການເຄື່ອນໄຫວ ປະຕິບັດໜ້າທີ່ວຽກງານຂອງຕົນ ຈະຢູ່ໃນຖານະໃດໜ້າທີ່ໃດຈະໜັກໜ່ວງ ແລະ ສັບສົນ ສະຫາຍແມ່ນມີຄວາມອົດທົນຜ່ານຜ່າ ມີແບບແຜນນຳພາທີ່ດີ ຕາມຫຼັກການນຳພາຂອງພັກ ມີຄວາມສາມັກຄີເປັນເອກະພາບພາຍໃນພັກ ແລະ ກົມກອງ ຢຶດໝັ້ນໃນແນວທາງມະຫາຊົນຂອງພັກຢ່າງສະເໝີຕົ້ນສະເໝີປາຍ ແລະ ຢຶດໝັ້ນໃນອຸດົມການປະຕິວັດອັນສູງສົ່ງຂອງພັກ ທັງໝົດນັ້ນແມ່ນສະແດງເຖິງທາດແທ້ຂອງການປະຕິວັດ ທີ່ສະຫາຍໄດ້ອຸທິດສະຕິປັນຍາເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງເປັນກ້າວໆມາ.
ແຫລ່ງຂ່າວ: ວຽງຈັນໃໝ່