ສະມາຊິກສະພາແຫ່ງຊາດ ເຂດ 1 ນະຄອນຫຼວງວຽງຈັນ (ສສຊ) ນຳໂດຍທ່ານ ລາດຊະນີວົງ ອະມາຣາທິທາດາ ປະທານຄະນະສະພາແຫ່ງຊາດ ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ ພ້ອມດ້ວຍຄະນະ ໄດ້ລົງພົບປະ ແລະ ມອບເຄື່ອງໃຫ້ນາຍ ແລະ ພົນທະຫານ ກອງຮ້ອຍທີ 1 ທີ່ຂຶ້ນກັບກອງ ຄ 512 ຢູ່ບ້ານສັງຄີ ເມືອງປາກງື່ມ ນະຄອນຫຼວງວຽງຈັນ ໃນວັນທີ 17 ມັງກອນ 2015 ທີ່ຜ່ານມາ.
ເຄື່ອງທີ່ນຳໄປມອບໃຫ້ຄັ້ງນີ້ ປະກອບມີເຄື່ອງອຸປະໂພກ-ບໍລິໂພກ ເຄື່ອງວິທະຍຸໂທລະໂຄ່ງຊຸດໃຫຍ່ ແລະ ຊຸດນ້ອຍ ລວມມູນຄ່າທັງໝົດ 14 ລ້ານກວ່າກີບ ທ່ານ ຮອ.ສອນວິໄລ ວິໄຊສອນ ຫົວໜ້າກອງຮ້ອຍທີ 1 ໄດ້ສະແດງຄວາມຂອບໃຈມາຍັງສະມາຊິກສະພາແຫ່ງຊາດ ເຂດເລືອກຕັ້ງທີ 1 ນະຄອນຫຼວງວຽງຈັນ ທີ່ເປັນຫ່ວງເປັນໄຍອ້າຍນ້ອງທະຫານ ທີ່ໄດ້ລົງມາພົບປະ ແລະ ມອບເຄື່ອງດັ່ງກ່າວນີ້ໃຫ້ນາຍ ແລະ ພົນທະຫານທີ່ຢູ່ຫ່າງໄກສອກຫຼີກ ແລະ ຈະນຳໃຊ້ເຄື່ອງນີ້ໃຫ້ເກີດປະໂຫຍດສູງສຸດ ທັງນີ້ ເພື່ອເປັນການຕ້ອນຮັບວັນສ້າງຕັ້ງກອງທັບປະຊາຊົນລາວ ຄົບຮອບ 66 ປີ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 60 ປີ ແລະ ວັນສະຖາປະນາ ສປປ ລາວ ຄົບຮອບ 40 ປີ.
ໃຫ້ກຽດກ່າວມອບແມ່ນທ່ານ ລາດຊະນີວົງ ອະມາຣາທິທາດາ ປະທານຄະນະສະພາແຫ່ງຊາດ ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ ແລະ ກ່າວຮັບແມ່ນທ່ານ ຮອ.ສອນວິໄລ ວິໄຊສອນ ຫົວໜ້າກອງຮ້ອຍທີ 1 ໂດຍຊ້ອງໜ້າສະມາຊິກສະພາແຫ່ງຊາດ ເຂດເລືອກຕັ້ງທີ 1 ນະຄອນຫຼວງວຽງຈັນ ການນຳເມືອງປາກງື່ມ ອຳນາດການປົກຄອງບ້ານນາຍ ແລະ ພົນທະຫານເປັນສັກຂີພິຍານ.
ແຫລ່ງຂ່າວ: ວຽງຈັນໃໝ່