ວັນທີ 17 ມັງກອນນີ້ໂຄງການ ລາດຊະວົງພລາຊາໄດ້ຈັດພິທີແນະນຳ ແລະ ເປີດໃຫ້ລູກຄ້າຈັບຈອງຫ້ອງຂາຍ ຂຶ້ນຢ່າງເປັນທາງການ, ຢູ່ໂຄງການດັ່ງກ່າວ ທີ່ຖະ ໜົນໄກສອນ ພົມວິຫານ ນະຄອນລວງວຽງຈັນ, ໂດຍມີນັກທຸລະກິດ ທັງພາຍໃນ ແລະ ຕ່າງປະເທດເຂົ້າ ຮ່ວມເປັນຈຳນວນຫຼາຍ.
ຜູ້ຮັບຜິດຊອບໂຄງການກ່າວວ່າ: ເລີ່ມແຕ່ເດືອນກໍລະກົດ 2014 ເປັນຕົ້ນ ມາການກໍ່ສ້າງໂຄງການລາດຊະວົງ ພລາຊາມີຄວາມຄືບໜ້າຢ່າງວ່ອງໄວ, ມາຮອດ ປັດຈຸບັນການກໍ່ສ້າງສຳເລັດ ແລ້ວປະມານ 50%, ໂດຍມີກຳນົດສຳເລັດການກໍ່ສ້າງ ແລະ ເປີດນຳໃຊ້ໃນຕົ້ນປີ 2016 ທີ່ຈະມາເຖິງ, ລາດຊະວົງພລາຊາ ເປັນໂຮງແຮມສາກົນ ລະດັບ 5 ດາວ ແລະ ຈະຖືກນຳໃຊ້ໃຫ້ເປັນທີ່ຕ້ອນຮັບບັນດາຜູ້ນຳທີ່ຈະມາເຂົ້າຮ່ວມ ກອງປະຊຸມສຸດຍອດອາຊຽນຄັ້ງທີ 28 ຊຶ່ງຈະຈັດຂຶ້ນໃນປີ 2016 ນີ້ ທີ່ລາວໄດ້ຮັບກຽດເປັນເຈົ້າພາບ, ປັດຈຸບັນໂຮງແຮມດັ່ງກ່າວເປັນທີ່ດຶງດູດເອົາຄວາມສົນໃຈຈາກນັກລົງທຶນຈຳນວນຫຼາຍ, ເນື່ອງຈາກການອອກແບບທີ່ ສວຍງາມ ແລະ ທັນສະໄໝ.
ນອກຈາກໂຮງແຮມແລ້ວ ໂຄງການດັ່ງກ່າວຍັງມີສູນການຄ້າຂະໜາດໃຫຍ່ທີ່ທັນສະໄໝ, ຊຶ່ງຈະເປັນຈຸດລວມ ຂອງຫຼາຍຂະແໜງບໍລິການເຊັ່ນ: ສະຖານທີ່ຊອບປິ້ງ, ພັກຜ່ອນ, ບັນເທີງ, ຮ້ານອາຫານ, ສະຖານທີ່ທ່ອງທ່ຽວ, ບ່ອນຈັດກອງປະຊຸມ, ຫ້ອງການທຸລະກິດ ແລະ ທີ່ພັກອາໄສ, ທີ່ມີການບໍລິ ການລະດັບສາກົນ. ນອກນັ້ນໂຄງການລາດຊະວົງຍັງມີແຜນນຳພາເຕົ້າໂຮມການບຸກເບີກ, ການປະຕິບັດງານ ແລະ ການບໍລິຫານທີ່ເປັນໜຶ່ງດຽວ, ເປັນລະບົບຄົບຊຸດ ແລະ ເຊື້ອໝັ້ນວ່າໂຄງການລາດຊະວົງ ຈະນຳມາຊຶ່ງຄວາມສະດວກສະບາຍ, ຄວາມທັນສະໄໝໃນນະຄອນຫຼວງວຽງຈັນ.
ແຫລ່ງຂ່າວ: ລາວພັດທະນາ