ບໍລິສັດ ລ້ານ​ຊ້າງ ມີ​ເນໂຣນ ລິ​ມິ​ເຕັດ-ບໍ່​ຄຳ-ທອງ​ເຊໂປນ (MMG LXML Sepon) ໄດ້​ມອບ​ເງິນ​ພາສີ​ຊັບພະຍາກອນແຮ່​ທາດ ສຳລັບ​ໄຕ​ມາດ​ທີ 3 ປີ 2014 ຈຳນວນ 6,6 ລ້ານ​ໂດ​ລາສະຫະລັດ ຫຼື ປະມານ 52 ຕື້ກວ່າ​ກີບ ໃຫ້​ແກ່​ລັດຖະບານ ​ສປປ ລາວ.

ພິທີ​ມອບ-ຮັບ​ເງິນ​ດັ່ງກ່າວ ໄດ້​ຈັດ​ຂຶ້ນ​ອາທິດ​ຜ່ານ​ມາ ທີ່​ກະຊວງ​ການ​ເງິນ ໃຫ້​ກຽດ​ກ່າວ​ມອບໂດຍ​ແມ່ນ​ທ່ານ ຊຸ​ເຣດຊ໌ ວາດນາກ​ຣາ ຜູ້​ຈັດການ​ໃຫຍ່ ບໍລິສັດ ລ້ານ​ຊ້າງ ມີ​ເນ​ໂຣນ ລິ​ມິ​ເຕັດ ແລະ ກ່າວ​ຮັບ​ໂດຍ​ແມ່ນ​ທ່ານນາງ ກະເສີມ​ສີ ພົມ​ມະ​ວົງສາ ຫົວໜ້າ​ກົມຄຸ້ມ​ຄອງ​ຊັບ​ສິນ ກະຊວງ​ການ​ເງິນ ເຊິ່ງ​ມີ​ພາກສ່ວນກ່ຽວຂ້ອງ​ທັງ​ສອງ​ຝ່າຍ​ເຂົ້າ​ຮ່ວມ ເປັນ​ສັກຂີ​ພິຍານ.

ທ່ານ ຊຸ​ເຣດຊ໌ ວາດ​ນາກ​ຣາ ໄດ້​ກ່າວ​ວ່າ: ນັບ​ຕັ້ງແຕ່​ເລີ່ມ​ການຜະລິດ​ໃນ​ປີ 2003 ເປັນຕົ້ນ​ມາ ບໍລິສັດ ລ້ານ​ຊ້າງ ມີ​ເນ​ໂຣນ ລິມິ​ເຕັດ ໄດ້​ປະຕິບັດ​ພັນທະ​ຂອງຕົນ​ຢ່າງ​ຕັ້ງໜ້າ​ຕະຫຼອດ​ມາ​ ເປັນຕົ້ນ​ແມ່ນ​ໄດ້​ປະກອບສ່ວນ​ສ້າງລາຍ​ຮັບ​ໂດຍ​ກົງ​ໃຫ້​ແກ່ ​ສປປ ລາວ ຫຼາຍ​ກວ່າ 1,3 ຕື້​ໂດ​ລາ ເພື່ອ​ປະກອບສ່ວນ​ເຂົ້າ​ໃນ​ການສ້າງສາ​ພັດທະນາ​ປະເທດ​ລາວ ແລະ ປັບປຸງ​ຊີວິດ​ການ​ເປັນ​ຢູ່​ຂອງປະຊາຊົນ​ລາວ​ບັນດາເຜົ່າ​ໃຫ້​ດີຂຶ້ນ.

ແຫລ່ງ​ຂ່າວ: ວຽງ​ຈັນ​ໃໝ່