ໃນ​ວັນ​ທີ 13 ມັງກອນ 2015 ທີ່ສະຖານທູດ​ຝຣັ່ງ​ປະຈຳ​ລາວ ທ່ານ ອາ​ລຸນ​ແກ້ວ ກິດ​ຕິ​ຄຸນ ລັດຖະ​ມົນຕີ​ຊ່ວຍ​ວ່າການ​ກະຊວງການ​ຕ່າງປະເທດ ພ້ອມ​ດ້ວຍ​ຄະນະ ໄດ້​ລົງ​ນາມ​ໄວ້ອາໄລ​ແກ່​ຜູ້ເສຍ​ຊີວິດ ​ຈາກ​ເຫດການ​ບຸກໂຈມ​ຕີ​ສຳນັກງານ​ໜັງສືພິມ “CHARLIE HEBDO” ໃນ​ວັນ​ທີ 7 ມັງກອນ 2015 ຢູ່ນະຄອນຫຼວງ​ປາ​ຣີ ຂອງ​ປະເທດ​ຝຣັ່ງ ທີ່ໄດ້​ນຳ​ມາ​ເຊິ່ງ​ການ​ສູນ​ເສຍ​ຊີວິດ​ຂອງ​ຄົນ​ເປັນ​ຈຳນວນ​ຫຼວງຫຼາຍ.

ທ່ານ​ລັດ​ຖະ​ມົນ​ຊ່ວຍ​ວ່າການ​ກະຊວງ​ການ​ຕ່າງປະເທດ ໄດ້​ລົງນາມ​ສະແດງ​ຄວາມ​ໂສກເສົ້າເສຍ​ໃຈ​ຕໍ່​ເຫດການ​ດັ່ງກ່າວ ໂດຍໃນ​ນາມ​ລັດຖະບານ ແລະ ປະຊາຊົນແຫ່ງ ສາທາລະນະ​ລັດ ປະຊາ​ທິ​ປະ​ໄຕ ປະຊາຊົນ​ລາວ ຂໍ​ສະແດງ​ຄວາມ​ເສົ້າ​ສະຫຼົດ​ໃຈ​ຢ່າງສຸດ​ຊຶ້ງ ໄປ​ຍັງ​ລັດຖະບານ ແລະ ປະຊາຊົນ​ຝຣັ່ງ ໂດຍ​ສະເພາະແມ່ນ​ຄອບຄົວ​ຂອງ​ຜູ້​ທີ່​ປະສົບເຄາະ​ຮ້າຍ ທີ່​ເປັນ​ຍ້ອນ​ການ​ບຸກໂຈມ​ຕີຂອງ​ພວກ​ກໍ່​ການ​ຮ້າຍ ຊຶ່ງ​ພວກ​ເຮົາຂໍ​ກ່າວ​ປະນາມຢ່າງ​ແຂງແຮງ.

​ສປປ ລາວ ກຽມພ້ອມ​ທີ່​ຈະຮ່ວມ​ມື​ນຳ​ປະຊາ​ຄົມ​ສາກົນ ເພື່ອການ​ຮັບປະກັນ​ຄວາມ​ໝັ້ນຄົງ ປອດ​ໄພ ແລະ ການ​ປົກ​ປັກ​ຮັກສາສັນຕິພາບຢູ່​ໃນ​ໂລກ.

ແຫລ່ງ​ຂ່າວ: ວຽງ​ຈັນ​ໃໝ່