ເທສະການອາຫານລາວ ທີ່ເປັນການໂຮມເອົາບັນດາແມ່ຄົວມືເອກ ແລະ ຮ້ານອາຫານດັງໃນທົ່ວປະເທດ ເຂົ້າຮ່ວມສະແດງ-ຂາຍ ເພື່ອເປັນການສົ່ງເສີມທາງດ້ານການຕະຫຼາດ ແລະ ໃຫ້ສັງຄົມນັບມື້ຮັບຮູ້ກວ້າງຂວາງ ໂດຍປີນີ້ທາງຄະນະກຳມະການໄດ້ເລືອກເອົາ “ການປຸງແຕ່ງເຂົ້າປຸ້ນແຊບ” ເປັນຫົວຂໍ້ໃນການແຂ່ງຂັນ ເຊິ່ງຈະມີນັກແຂ່ງຂັນຈາກ 11 ໂຮງຮຽນວິຊາຊີບໃນທົ່ວປະເທດເຂົ້າຮ່ວມ.
ງານຖະແຫຼງຂ່າວຈັດເທສະການອາຫານລາວ ຄັ້ງທີ 10 ປະຈຳປີໄດ້ມີຂຶ້ນໃນວັນທີ 13 ມັງກອນ 2015 ທີ່ສະມາຄົມນັກຂ່າວແຫ່ງ ສປປ ລາວ ໂດຍການເຂົ້າຮ່ວມຂອງທ່ານ ສົມສະໜຸກ ມີໄຊ ຮອງປະທານສະມາຄົມນັກຂ່າວແຫ່ງ ສປປ ລາວ ພ້ອມດ້ວຍຄະນະສະມາຄົມນັກທຸລະກິດແມ່ຍິງ ແລະ ສື່ມວນຊົນເຂົ້າຮ່ວມ.
ທ່ານນາງ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງ ທັງເປັນປະທານຈັດງານກ່າວຈຸດປະສົງຂອງການຈັດງານຄັ້ງນີ້ວ່າ: ເປັນການສືບຕໍ່ຊຸກຍູ້ ແລະ ສົ່ງເສີມທຸກຫົວໜ່ວຍທຸລະກິດຂອງແມ່ຍິງ ນັບແຕ່ການຜະລິດ ປູກພືດກະສິກຳ ລ້ຽງສັດ ປຸງແຕ່ງ ທຸລະກິດຮ້ານອາຫານ ໂຮງຮຽນ ສະຖາບັນທີ່ເຝິກອົບຮົມການປຸງແຕ່ງອາຫານ ຈາກນະຄອນຫຼວງວຽງຈັນ ແລະ ບັນດາແຂວງພາຍໃນໄດ້ມີໂອກາດເຂົ້າມາວາງສະແດງ ແລະ ຈຳໜ່າຍຜະລິດຕະພັນ ທັງເປັນການເປີດໂອກາດໃຫ້ແມ່ຍິງ ຜູ້ປະກອບການຂະແໜງການຜະລິດ ແລະ ປຸງແຕ່ງອາຫານໄດ້ມີການແລກປ່ຽນບົດຮຽນເຊິ່ງກັນ ແລະ ກັນ.
ໂດຍງານເທສະການອາຫານລາວ ປະຈຳປີ 2015 ຈະໄດ້ເລີ່ມຈັດແຕ່ວັນທີ 29-31 ມັງກອນ ທີ່ຈະເຖິງທີ່ສວນເຈົ້າອານຸວົງ ຈະມີຮ້ານອາຫານເຂົ້າຮ່ວມທັງໝົດຫຼາຍກວ່າ 100 ຮ້ານ ຈາກໃນທົ່ວປະເທດ ຄາດວ່າຈະໄດ້ຮັບຄວາມສົນໃຈຈາກບັນດານັກທ່ອງທ່ຽວພາຍໃນ ແລະ ຕ່າງປະເທດເຂົ້າຮ່ວມເປັນຈຳນວນຫຼາຍ ສຳລັບຜູ້ທີ່ສົນໃຈຕ້ອງການຮັບປະທານອາຫານແບບລາວໆ ກໍ່ສາມາດເຂົ້າຮ່ວມໄດ້ຕາມທີ່ລະບຸຊັດເຈນໃນເບື້ອງຕົ້ນ.
ແຫລ່ງຂ່າວ: ວຽງຈັນໃໝ່