ໃນວັນທີ 10-11 ມັງກອນນີ້ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳວຽກງານເສດຖະກິດການຜະລິດ ແລະ ຈໍລະຈອນ ພ້ອມດ້ວຍ ຄະນະຊີ້ນຳໂຄງການສົ່ງທໍ່ນ້ຳມັນແຫ່ງຊາດຝ່າຍລາວ ເຮັດວຽກຮ່ວມກັບແຂວງກວາງບິງ ສສ ຫວຽດນາມ, ໃນໂອກາດ ນຳພາຄະນະຊີ້ນຳໂຄງການດັ່ງກ່າວ ໄປແນະນຳໃຫ້ແກ່ຝ່າຍຫວຽດນາມຮັບຮູ້.
ໃນໂອກາດນີ້, ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ພ້ອມຄະນະ ໄດ້ໄປສຳຫຼວດສະຖານທີ່ກໍ່ສ້າງສາງພັກນ້ຳມັນ ຢູ່ສາມແຍກລັງຄັງ ເມືອງຍົມມະລາດ ແຂວງຄຳມ່ວນ ຫ່າງຈາກຊາຍແດນລາວ-ຫວຽດນາມ 30 ກິໂລແມັດ. ແລະ ໄປສຳຫຼວດທ່າທຽບກຳປັ່ນຂົນສົ່ງນ້ຳມັນ ຢູ່ທ່າເຮືອຮອນລາ ແຂວງ ກວາງບິງ ສສ ຫວຽດນາມ ເຊິ່ງແມ່ນຈຸດເລີ່ມຕົ້ນໃນການລຳລຽງຂົນສົ່ງນ້ຳມັນຜ່ານທໍ່ຈາກຫວຽດນາມຫາລາວ.
ຈາກນັ້ນ, ທ່ານ ສົມສະຫວາດ ເລັ່ງສະຫວັດ ພ້ອມດ້ວຍຄະນະ ໄດ້ເຮັດວຽກຮ່ວມກັບຜູ້ຕາງໜ້າຂອງບັນດາກະຊວງ, ຂະແໜງການກ່ຽວຂ້ອງ ຂອງລັດຖະບານ ສສ ຫວຽດນາມ ແລະ ແຂວງກວາງບິງ ຢູ່ເມືອງດົງເຮີຍ ແຂວງກວາງບິງ, ໂດຍໄດ້ຮັບຟັງການລາຍງານແຜນການ ແລະ ຄວາມຄືບໜ້າຂອງການສຶກສາ, ສຳຫຼວດ ສ້າງບົດລາຍງານຄວາມເປັນໄປໄດ້ ແລະ ບົດລາຍງານກ່ຽວກັບການລົງທຶນຂອງໂຄງການ (FS) ຈາກບໍລິສັດEC (Energy Com moditie) ແລະ ບໍລິສັດເປໂຕຣລາວຈຳກັດ. ພ້ອມນີ້, ທັງສອງຝ່າຍ ໄດ້ປຶກສາຫາລື ແລະ ຕົກລົງເປັນກະພາບກັນ ເປັນຕົ້ນ: ເນື້ອໃນຂັ້ນຕອນການສ້າງຕັ້ງບໍລິສັດລູກ ຂອງເປໂຕຣລາວຢູ່ສສ ຫວຽດນາມ( ດ້ວຍທຶນ100% ຂອງບໍລິສັດເປໂຕຣລາວ) ເພື່ອຈັດຕັ້ງປະຕິບັດໂຄງການນີ້; ການນຳໃຊ້ເນື້ອທີ່ດິນກໍ່ສ້າງຢູ່ທ່າເຮືອຮອນລາ ແລະ ລະບົບທໍ່ສົ່ງນ້ຳມັນທີ່ຜ່ານດິນຫວຽດນາມ; ວິທີຈັດຕັ້ງປະຕິບັດການທົດແທນຄືນ, ປັບໜ້າດິນ ແລະ ການເກັບກູ້ລະເບີດ ແລະ ບັນດາຂັ້ນຕອນການວາງແຜນການຢູ່ທ່າເຮືອຮອນລາ ເພື່ອສ້າງສາງພັກນ້ຳມັນ ແລະ ທ່າທຽບກຳປັ່ນບັນທຸກນ້ຳມັນ.
ໂຄງການນີ້ຈະໄດ້ຮັບການຈັດຕັ້ງປະຕິບັດໂດຍ ບໍລິສັດ ເປໂຕຣລາວ ຊຶ່ງເປັນ ຫົວໜ່ວຍທຸລະກິດທີ່ມີແຫຼ່ງທຶນເປັນຕົວແທນຈາກລັດຖະບານລາວ ໂດຍຜ່ານຮູບແບບຂອງການຖືຮຸ້ນ ຂອງກົມສະສົມແຫ່ງລັດ ທີ່ຂຶ້ນກັບກະຊວງການເງິນ ສປປ ລາວ ເຄື່ອນໄຫວຕາມພາລະບົດບາດ ທີ່ໄດ້ມອບໝາຍຄື: ສະສົມຮັບປະກັນຄວາມປອດໄພແຫຼ່ງພະລັງງານແຫ່ງຊາດ, ເປັນໃຈກາງສະໜອງເຊື້ອໄຟໃຫ້ແກ່ລັດຖະບານລາວ ໂດຍລັດຖະບານຮ່ວມຮຸ້ນ 15% ແລະ ບັນດາບໍລິສັດ 85% ໂດຍໄດ້ຮັບການຮ່ວມມື ທາງດ້ານການເງິນກັບສາທາລະນະລັດສະໂລວັກ ໃນການສະໜັບສະໜູນແຫຼ່ງທຶນສຳລັບໂຄງການກໍ່ສ້າງສາງ ແລະ ທໍ່ສົ່ງນ້ຳມັນຈາກທ່າເຮືອຮອນລາ ຈາກແຂວງກວາງບິງ ສສ ຫວຽດນາມ ມາຫາແຂວງຄຳມ່ວນຂອງລາວ.
ແຫລ່ງຂ່າວ: ລາວພັດທະນາ