ຂົວຂ້າມນ້ຳຄານແຫ່ງທີ 3 ຕັ້ງຢູ່ເຂດບ້ານຜານົມແມ່ນໜຶ່ງໜ້າວຽກໃຫຍ່ທີ່ນອນໃນໂຄງການ ກໍ່ສ້າງເສັ້ນທາງເວັ້ນຕົວເມືອງຫຼວງພະບາງແຕ່ບ້ານກົກ ງິ້ວຫາບ້ານພອນໄຊ ປະຈຸບັນແມ່ນໄດ້ເປີດໃຫ້ລົດແລ່ນຜ່ານແລ້ວ, ສ່ວນຈະເປີດເປັນທາງການຄາດມີຂຶ້ນໃນມໍ່ໆນີ້.
ທ່ານ ດວງ ປະທຸມມະລັກ ຮອງປະທານບໍລິສັດພູສີກໍ່ສ້າງຂົວທາງ ຊຶ່ງເປັນບໍລິສັດຮັບເໝົາກໍ່ສ້າງໃຫ້ສຳພາດຕໍ່ສື່ຂ່າວເສດຖະກິດ- ສັງຄົມໃນ ວັນທີ 6 ມັງກອນ 2015 ນີ້ຮູ້ວ່າ: ຂົວນ້ຳຄານແຫ່ງ ທີ 3 ແມ່ນນອນຢູ່ໃນເສັ້ນທາງຜ່ານ ເພື່ອເຊື່ອມຈອດທາງເລກທີ 13 ເໜືອ ແຕ່ບ້ານກົກງີ້ວຫາບ້ານພອນໄຊເປັນທາງເວັ້ນຕົວເມືອງມໍລະດົກໂລກ ທີ່ຕັ້ງຢູ່ເຂດບ້ານຜານົມ ເມືອງ ແລະ ແຂວງຫຼວງພະບາງຂົວແຫ່ງນີ້ມີຄວາມກວ້າງ 10 ແມັດ, ຍາວ 165 ແມັດ, ສາມາດຮັບນ້ຳໜັກໄດ້ 80 ໂຕນ. ປະຈຸບັນແມ່ນໄດ້ເປີດໃຫ້ລົດ ແລ່ນຜ່ານໄປມາໄດ້ແລ້ວ ແຕ່ຍັງບໍ່ທັນໄດ້ເປີດເປັນທາງການ, ເນື່ອງຈາກຈະຕ້ອງປັບປຸງ, ຕົກແຕ່ງໄຟເຍືອງທາງ ແລະ ສີດຢາງສົ້ນຂົວໃຫ້ລະອຽດກ່ອນ ແຕ່ຄາດຈະເປີດນຳໃຊ້ຢ່າງເປັນທາງການໃນລະຫວ່າງທ້າຍເດືອນນີ້.
ທ່ານຮອງປະທານບໍລິສັດຍັງໃຫ້ຮູ້ຕື່ມວ່າ: ສຳລັບການກໍ່ສ້າງເສັ້ນທາງ ແມ່ນມີຄວາມຍາວ 18,4 ກິໂລແມັດ ຊຶ່ງລົງມືຈັດຕັ້ງປະຕິບັດນັບແຕ່ວັນທີ 27 ມິຖຸນາ 2011 ເປັນຕົ້ນມາ, ມາຮອດປະຈຸບັນໜ້າວຽກໂດຍລວມຂອງໂຄງການແມ່ນສຳເລັດ 95%, ເປັນຕົ້ນແມ່ນວຽກດິນຕັດລະດັບ, ຊັ້ນພື້ນທາງ, ສີດຢາງ ພື້ນທາງ ແລະ ລະບົບລະບາຍນ້ຳ, ສ່ວນອີກ 5% ແມ່ນວຽກການຕົກແຕ່ງປ້າຍການສັນຈອນ, ໄຟເຍືອງທາງ ແລະ ສີດຢາງຊັ້ນເທິງຕື່ມອີກ ໂດຍມູນຄ່າການກໍ່ສ້າງລວມທັງຂົວ ແລະ ເສັ້ນທາງມີທັງ ໝົດ 22,9 ລ້ານໂດລາສະຫະລັດ ຫຼື ປະມານ 183, 2 ຕື້ກີບ.
ການກໍ່ສ້າງຂົວນ້ຳຄານ 3 ເປັນຄວາມຫວັງໜຶ່ງຂອງລັດກໍຄືແຂວງຫຼວງພະບາງ ເພື່ອເຊື່ອມຈອດເສັ້ນທາງເວັ້ນຕົວເມືອງທ່ອງທ່ຽວເມືອງມໍລະດົກໂລກ ເພື່ອຫຼຸດຜ່ອນຄວາມແອອັດການສັນຈອນຢູ່ໃນເຂດເທສະບານເມືອງ ເນື່ອງຈາກແຕ່ລະປີລົດມີຈຳນວນທີ່ເພີ່ມຂຶ້ນແລ່ນເທິງເສັ້ນທາງແຄບ ຈິ່ງມັກເກີດອຸບັດເຫດຕາມທາງສາຍນີ້ ແນວໃດກໍຕາມ ເຊື່ອວ່າຫຼັງຈາກທີ່ເປີດນຳໃຊ້ເສັ້ນທາງ ເວັ້ນຕົວເມືອງແລ້ວການສັນຈອນຢູ່ພາຍໃນເທສະບານກໍຈະສະດວກຂຶ້ນຫຼາຍກວ່າເກົ່າ.
ແຫລ່ງຂ່າວ: ເສດຖະກິດ – ສັງຄົມ