ໂດຍອີງຕາມຂໍ້ຕົກລົງຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງຄະນະຮັບຜິດຊອບລະດັບຊາດ ເພື່ອບູລະນະປະຕິສັງຂອນ ພິພິທະພັນຫໍພະແກ້ວ ເມືອງຈັນທະບູລີ ນະຄອນຫຼວງວຽງຈັນ ເຊິ່ງມີທ່ານຮອງນາຍົກລັດຖະມົນຕີ ຜູ້ຊີ້ນຳວຽກງານຂົງເຂດວັດທະນະທຳ-ສັງຄົມ ເປັນຫົວໜ້າຄະນະ ທ່ານລັດຖະມົນຕີວ່າການກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ແລະ ທ່ານເຈົ້າຄອງນະຄອນຫຼວງວຽງຈັນ ເປັນຮອງຫົວໜ້າຄະນະ.
ໂຄງການປະຕິສັງຂອນພິພິທະພັນຫໍພະແກ້ວຄັ້ງນີ້ ແມ່ນເປັນຄັ້ງທີສາມ ເຊິ່ງຫ່າງຈາກຄັ້ງທີສອງເຖິງ 78 ປີ (ຄ.ສ 1936) ເພື່ອເປັນການສືບສານບູລະນະຮັກສາຮີດຄອງປະເພນີ ແລະ ວັດທະນະທຳລະດັບຊາດໃຫ້ຄົນຮຸ້ນຫຼັງ ໄດ້ສືບທອດຕະຫຼອດໄປ ໃນຕອນບ່າຍວັນທີ 6 ມັງກອນ 2015 ທີ່ຜ່ານມາ ຢູ່ທີ່ຫ້ອງວ່າການນະຄອນຫຼວງ ກຸ່ມບໍລິສັດ ໂຄລາວ ໄດ້ນຳເງິນສົດຈຳນວນ 150 ລ້ານກີບ ມາປະກອບສ່ວນສົມທົບທຶນບູລະນະປະຕິສັງຂອນ ພິພິທະພັນຫໍພະແກ້ວ ເປັນກຽດກ່າວມອບເງິນຈຳນວນດັ່ງກ່າວ ໂດຍທ່ານນາງ ຖາວອນ ວົງສົມບັດ ປະທານກຸ່ມບໍລິສັດ ໂຄລາວ ແລະ ກ່າວຮັບໂດຍທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງ ເຊິ່ງມີພາກສ່ວນທີ່ກ່ຽວຂ້ອງທັງສອງຝ່າຍ ເຂົ້າຮ່ວມເປັນສັກຂີພິຍານ.
ພິພິທະພັນຫໍພະແກ້ວ ເປັນສິ່ງສັກສິດຂອງຊາດ ແລະ ສັນຍະລັກທີ່ຕິດພັນກັບຄວາມສົມບູນພູນສຸກ ຄວາມເຊື່ອຖື ຄວາມສັກກາລະບູຊາ ແລະ ຄວາມວັດທະນາຖາວອນຂອງຊາດ ສາເຫດຂອງການປະຕິສັງຂອນໃນຄັ້ງນີ້ ເນື່ອງຈາກວ່າພິພິທະພັນຫໍພະແກ້ວມີຄວາມຊຸດໂຊມ ຕ້ອງໄດ້ມີການປະຕິສັງຂອນຄືນໃໝ່ ຕາມຄວາມເໝາະສົມກັບສະພາບຄວາມເປັນຈິງ ເພື່ອຮັບປະກັນຄວາມປອດໄພໃຫ້ກັບນັກທ່ອງທ່ຽວ ທັງພາຍໃນ ແລະ ຕ່າງປະເທດ ທີ່ເຂົ້າມາແວ່ຊົມສະຖານທີ່ແຫ່ງນີ້ທຸກລະດູການທີ່ຍັງຄົງຮັກສາ ໄດ້ເອກະລັກທາງດ້ານວັດທະນະທຳດັ້ງເດີມ ໃນເບື້ອງຕົ້ນ ຄາດວ່າຈະໃຊ້ທຶນບູລະນະທັງໝົດປະມານ 15 ຕື້ກີບ.
ແຫລ່ງຂ່າວ: ວຽງຈັນໃໝ່