ປີ 2015 ຈະຍາວຂຶ້ນອີກ 1 ວິນາທີ ຫລັງໂລກໝູນຊ້າລົງ ອົງການ IERS ກຽມເພິ່ມວິນາທີພິເສດ ໃນວັນທີ 30 ມິຖຸນາ ທ່າມກາງຄວາມວິຕົກຢ້ານອິນເຕີເນັດລົ່ມ.
ສຳນັກຂ່າວຕ່າງປະເທດ ລາຍງານໃນມື້ນີ້ (7 ມັງກອນ) ວ່າ ອົງການໃຫ້ບໍລິການລະບົບອ້າງອິງ ແລະ ຕິດຕາມການໝູນຂອງໂລກສາກົນ ຫລື ໄອອີອາເອັສ (International Earth Rotation and Reference Systems Service: IERS) ເຊິ່ງມີສຳນັກງານຕັ້ງຢູ່ທີ່ນະຄອນຫລວງປາຣີ ປະເທດຝຣັ່ງ ໄດ້ປະກາດວ່າ ປີນີ້ຊາວໂລກຈະມີເວລາເພີ່ມຂຶ້ນຫລາຍກ່ວາປົກກະຕິ 1 ວິນາທີ ຍ້ອນໂລກຂອງພວກເຮົາໄດ້ໝູນຊ້າລົງ ໂດຍອົງການດັ່ງກ່າວຈະມີການເພີ່ມວິນາທີພິເສດ ເຂົ້າໄປໃສ່ໃນເວລາ 23:59:60 ໂມງ ຂອງວັນທີ 30 ມິຖຸນາ 2015 ເຊິ່ງຈະເຮັດໃຫ້ພາຍໃນມື້ດັ່ງກ່າວມີເວລາ 86,401 ວິນາທີ.
ສາເຫດທີ່ຕ້ອງໄດ້ເພີ່ມ 1 ວິນາທີເຂົ້າໄປນັ້ນ ກໍເພື່ອຮັກສາມາດຕະຖານການປະກາດເວລາ ໃຫ້ໃກ້ຄຽງກັບເວລາສຸລິຍະ ເຊິ່ງຮັກສາໄວ້ດ້ວຍໂມງອາໂຕມທີ່ມີຄວາມທ່ຽງກົງ ແລະ ແມ່ນຢຳ ເນື່ອງຈາກປັດຈຸບັນໂລກຂອງເຮົາ ໄດ້ໝູນຊ້າລົງກ່ວາເກົ່າສະເລ່ຍ 1/2,000 ວິນາທີຕໍ່ມື້.
ແຕ່ວ່າການປະກາດເພີ່ມເວລາພິເສດ 1 ວິນາທີນີ້ ໄດ້ເຮັດໃຫ້ເກີດກະແສກັງວົນວ່າ ຈະກະທົບຕໍ່ລະບົບອິນເຕີເນັດ ຫລັງຈາກທີ່ Mozilla, Reddit, LinkedIn ແລະ ເວັບໄຊ້ອື່ນໆ ເຄີຍລົ່ມມາແລ້ວເມື່ອຄັ້ງທີ່ມີການເພີ່ມວິນາທີຄັ້ງລ່າສຸດໃນປີ 2012, ແຕ່ນສຳລັບເວັບໄຊ້ Google ນັ້ນ ອາດຈະບໍ່ໄດ້ຮັບຜົນກະທົບຈາກການເພີ່ມວິນາທີພິເສດໃນຄັ້ງນີ້ ເນື່ອງຈາກໄດ້ມີການໃຊ້ເຕັກນິກກະຈາຍເສດລະດັບມິນລີວິນາທີ (leap smear) ເພື່ອຄ່ອຍໆເພີ່ມເວລາເຂົ້າໄປໃນລະບົບມາແລ້ວໃນກ່ອນໜ້ານີ້.
ທັງນີ້ ສະຫະລັດອາເມຣິກາ ແລະ ອີກຫລາຍໆປະເທດ ໄດ້ມີຄວາມພະຍາຍາມຄັດຄ້ານການເພີ່ມເວລາ 1 ວິນາທີດັ່ງກ່າວ ໂດຍໃຫ້ເຫດຜົນວ່າ ຈະກະທົບລົບກວນ ລະບົບຣາດາ ແລະ ລະບົບການສື່ສານ, ການເຮັດທຸລະກຳການເງິນ ກໍອາດມີຄວາມຜິດພາດໄດ້ເຊັ່ນດຽວກັນ.
ສຳລັບ 1 ວິນາທີພິເສດຂອງປີ ໄດ້ຖືກນຳມາໃຊ້ເປັນຄັ້ງທຳອິດໃນປີ 1972 ເຊິ່ງຕອນນັ້ນຍັງບໍ່ທັນມີລະບົບອິນເຕີເນັດເກີດຂຶ້ນ ແລະ ການປັບເພີ່ມ 1 ວິນາທີໃນເດືອນມິຖຸນາປີນີ້ ຈະເປັນຄັ້ງທີ 26 ໃນປະຫວັດສາດຂອງໂລກ.