ປະຕິບັດຕາມແຜນການ ປັບປຸງກົງຈັກການຈັດຕັ້ງ ແລະ ສັບຊ້ອນພະນັກງານຂອງກະຊວງການຕ່າງປະເທດ, ໃນວັນທີ 24 ທັນວາ 2014, ກະຊວງການຕ່າງປະເທດ ໄດ້ຈັດພິທີ ມອບ-ຮັບໜ້າທີ່ ລະຫວ່າງ ຫົວໜ້າ ກົມຜູ້ເກົ່າ ແລະ ຜູ້ໃໝ່ໃຫ້ ແກ່ບາງກົມພາຍໃນກະຊວງການຕ່າງປະເທດ,ໂດຍການໃຫ້ກຽດເຂົ້າຮ່ວມ ເປັນສັກຂີພິຍານ ຂອງທ່ານ ທອງລຸນ ສີສຸລິດ, ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ,ລັດຖະມົນຕີວ່າ ການກະຊວງການຕ່າງປະເທດ, ຫົວຫນ້າຄະນະພົວພັນ ຕ່າງປະເທດສູນກາງພັກ, ພ້ອມດ້ວຍ ບັນດາລັດຖະມົນຕີຊ່ວຍວ່າການ ແລະ ບັນດາຫົວໜ້າກົມ, ຮອງຫົວໜ້າກົມ ຂອງກະຊວງການ ຕ່າງປະເທດ ແລະ ຄຕພ.
ການມອບ-ຮັບໜ້າທີ່ ລະຫວ່າງ ຜູ້ເກົ່າ ແລະ ໃໝ່ ມີດັ່ງນີ້: ມອບ-ຮັບ ລະຫວ່າງ ທ່ານ ສີທົງ ຈິດໂຍທິນ, ຫົວໜ້າກົມການຂ່າວ ກະຊວງການຕ່າງປະເທດ ຜູ້ເກົ່າ ໄປປະຕິບັດໜ້າທີ່ໃໝ່ຢູ່ຕ່າງປະເທດ ແລະ ທ່ານ ພອນທະວີ ບຸດດາລາ, ຮອງຫົວໜ້າຫ້ອງການ ກະຊວງການຕ່າງປະເທດ ເປັນຫົວໜ້າກົມການຂ່າວ ກະຊວງການຕ່າງປະເທດ ຄົນໃໝ່. ມອບ-ຮັບ ລະຫວ່າງ ທ່ານ ລີຢີ້ງ ໄຊຍະຊ້າງ, ຫົວກົມກວດກາກະຊວງການຕ່າງປະເທດ ຜູ້ເກົ່າ ໄປປະຕິບັດໜ້າທີ່ໃໝ່ ຢູ່ຕ່າງປະເທດ ແລະ ທ່ານ ສົມໄຊ ສະໜາມອຸ່ນ, ຮອງຫົວໜ້າກົມກວດກາ ກະຊວງການຕ່າງປະເທດ ເປັນຫົວໜ້າກົມກວດກາ ກະຊວງການຕ່າງປະເທດຜູ້ໃໝ່.
ພາຍຫລັງໄດ້ເຊັນ ມອບ-ຮັບ ໜ້າທີ່ກັນແລ້ວ, ທ່ານຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມບັນດາທ່ານ ທີ່ເຂົ້າຮ່ວມໃນພິທີດັ່ງກ່າວ ໂດຍໄດ້ຊີ້ນຳໃຫ້ບັນດາພະນັກງານຫລັກແຫລ່ງ ຈົ່ງໄດ້ສືບຕໍ່ຍົກສູງ ຄວາມຮັບຜິດຊອບ ຕໍ່ຫນ້າທີ່ວຽກງານ ທີ່ຖືກມອບໝາຍໃຫ້ໃນຄັ້ງນີ້ ເພື່ອສືບຕໍ່ຈັດຕັ້ງຜັນຂະຫຍາຍ ແນວທາງນະໂຍບາຍ ການຕ່າງປະເທດຂອງພັກ-ລັດ ກໍຄືການປະຕິບັດຕາມເນື້ອໃນຈິດໃຈ ຂອງກອງປະຊຸມວຽກງານ ການຕ່າງປະເທດ ຄັ້ງທີ 12 ໃຫ້ປະກົດຜົນ ເປັນຈິງແນໃສ່ປະກອບສວ່ນ ເຂົ້າໃນການເຊື່ອມໂຍງສາກົນ ຂອງປະເທດເຮົາ ໃນໄລຍະໃຫມ່.
ຂໍຄອບໃຈບົດຄວາມຈາກ: ຂປລ