ວັນທີ 26 ມັງກອນ 2026 ທີ່ນະຄອນຫຼວງວຽງຈັນ ປະເທດລາວ, ລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອເປັນມູນຄ່າປະມານ 70,526 ໂດລາສະຫະລັດ ໃນການສະໜັບສະໜູນ “ໂຄງການກໍ່ສ້າງໂຮງຮຽນປະຖົມປາງທອງ ໃນແຂວງບໍ່ແກ້ວ” ເພື່ອຍົກລະດັບຄຸນະພາບການຮຽນ ແລະ ສິດສອນຂອງຄູ-ນັກຮຽນຂອງໂຮງຮຽນດັ່ງກ່າວ ພາຍໃຕ້ໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານ (GGP).
ໂຄງການຈະໃຫ້ການສະໜັບສະໜູນທຶນຮອນເພື່ອກໍ່ສ້າງອາຄານຮຽນ ແລະ ຫ້ອງນ້ຳໃໝ່ ພ້ອມທັງສະໜອງສິ່ງອຳນວຍຄວາມສະດວກທີ່ຈຳເປັນ ໃຫ້ແກ່ໂຮງຮຽນປະຖົມບ້ານປາງທອງ ເມືອງຜາອຸດົມ ແຂວງບໍ່ແກ້ວ ເພື່ອຍົກລະດັບໂອກາດໃນການເຂົ້າເຖິງການສຶກສາຊັ້ນປະຖົມຂອງເດັກນ້ອຍໃນທ້ອງຖິ່ນ.
ພິທີເຊັນສັນຍາເປັນການລົງນາມ ລະຫວ່າງ ພະນະທ່ານ ໂຄອິຊຶມິ ຊຶໂຕະມຸ, ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ ແລະ ອົງການທີ່ກ່ຽວຂ້ອງຈາກທ້ອງຖິ່ນ.
ທ່ານເອກອັກຄະຣາຊະທູດ ໂຄອິຊຶມິ ໄດ້ໃຫ້ຄຳເຫັນ “ລັດຖະບານຍີ່ປຸ່ນໄດ້ໃຫ້ການສະໜັບສະໜູນວຽກງານການສຶກສາ ເຊິ່ງເປັນໜຶ່ງໃນຂົງເຂດທີ່ພວກເຮົາໄດ້ໃຫ້ຄວາມສຳຄັນຫຼາຍທີ່ສຸດ ເນື່ອງຈາກການສຶກສາເປັນກຸນແຈສຳຄັນໃນການພັດທະນາຊັບພະຍາກອນມະນຸດທີ່ຈະກາຍເປັນອະນາຄົດຂອງຊາດ.”
ທ່ານທູດຍັງໄດ້ໃຫ້ຄຳເຫັນຕື່ມ “ຂ້າພະເຈົ້າຫວັງວ່າ ຄວາມສຳເລັດຂອງໂຄງການນີ້ຈະນຳໄປສູ່ການປັບປຸງສະພາບແວດລ້ອມການສຶກສາຮ່ຳຮຽນຂອງຜູ້ທີ່ຈະເປັນຜູ້ສ້າງອະນາຄົດໃຫ້ແກ່ແຂວງບໍ່ແກ້ວ ແລະ ປະເທດລາວ ກໍຄືເດັກນ້ອຍໃນບ້ານປາງທອງ ແລະ ໝູ່ບ້ານອ້ອມແອ້ມໃຫ້ດີຂຶ້ນຢ່າງກ້າວກະໂດດ.”
ໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານ (GGP) ແມ່ນ ການສະໜອງທຶນທີ່ຈຳເປັນໃຫ້ແກ່ໂຄງການຂະໜາດນ້ອຍທີ່ໃຫ້ຜົນປະໂຫຍດໂດຍກົງແກ່ປະຊາຊົນຜູ້ອາໄສ ແລະ ມີຈຸດປະສົງເພື່ອການພັດທະນາເສດຖະກິດ-ສັງຄົມຂອງປະເທດລາວ ໂດຍອີງຕາມຄວາມຕ້ອງການພື້ນຖານຂອງມະນຸດເປັນຫຼັກ.
ລັດຖະບານຍີ່ປຸ່ນໄດ້ໃຫ້ການສະໜັບສະໜູນໃຫ້ແກ່ແຂວງບໍ່ແກ້ວ ລວມເປັນມູນຄ່າຫຼາຍກວ່າ 1,140,000 ໂດລາສຫະລັດ ເປັນຕົ້ນແມ່ນດ້ານການສຶກສາ ແລະ ໂຄງລ່າງພື້ນຖານ ໃນໄລຍະຜ່ານມາ. ປະເທດຍີ່ປຸ່ນຈະສືບຕໍ່ໃຫ້ການຊ່ວຍເຫຼືອປະເທດລາວໃນການປັບປຸງພື້ນຖານຊີວິດການເປັນຢູ່ຂັ້ນຮາກຖານຕໍ່ໄປເພື່ອຮັບປະກັນ “ບໍ່ໃຫ້ມີໃຜຖືກຖິ້ມໄວ້ທາງຫຼັງ” ຜ່ານການແກ້ໄຂຄວາມແຕກໂຕນດ້ານການພັດທະນາເສດຖະກິດ-ສັງຄົມໃນພາກພື້ນ.