ເມຍໃຈຮ້າຍຈັບມີດຟັນຜົວ ເນື່ອງຈາກເຮັດຕົ້ມຍຳໃຫ້ກິນ ແຕ່ຜົວຢາກກິນເຂົ້າມັນໄກ່
ສຳນັກຂ່າວໄທລາຍງານໃນວັນທີ 16 ມີນາ 2025 ຜ່ານມາ, ເຈົ້າໜ້າທີ່ຕຳຫຼວດໄທໄດ້ຮັບແຈ້ງເຫດວ່າ: ມີຜົວ-ເມຍ ຜິດຖຽງກັນ ຢູ່ອຳເພີແກງ ຈັງຫວັດຣະຍອງ ປະເທດໄທ, ຫຼັງໄດ້ຮັບແຈ້ງເຫດເຈົ້າໜ້າທີ່ຈຶ່ງໄດ້ລົງໄປກວດສອບສະຖານທີ່ເກີດເຫດ ເປັນຫ້ອງເຊົ່າປຸກສ້າງຕິດກັນ ແລະ ໄດ້ພົບຜູ້ຊາຍອາຍຸ 50 ປີ ນອນໄດ້ຮັບບາດເຈັບມີຮອຍບາດຢູ່ເທິງຫົວ ເຈົ້າໜ້າທີ່ກູ້ໄພຈຶ່ງໄດ້ປະຖົມພະຍາບານເບື້ອງຕົ້ນກ່ອນນຳສົ່ງໂຮງໝໍ.
ຕາມການລາຍງານ ເມຍຜູ້ໄດ້ຮັບບາດເຈັບລະບຸວ່າ: ກ່ອນເກີດເຫດຜູ້ເປັນຜົວໄດ້ຈັບສຸ່ມຈັບກະປູມາທຳທ່າຈະທຳຮ້າຍຕົນກ່ອນ ຕົນເລີຍຈັບມີດກ່ອນ ຈະເກີດເຫດການຂັດແຍ່ງມີດ ສຸດທ້າຍດວງຊວຍມີດໄດ້ຟັນຖືກຫົວຜູ້ເປັນຜົວໄດ້ຮັບບາດເຈັບ ກ່ອນຈະມີເພື່ອນບ້ານມາຫ້າມອອກຈາກກັນ.
ຂະນະທີ່ເພື່ອນເລົ່າວ່າ: ຕົນ ແລະ ຜູ້ບາດເຈັບນັ່ງກິນລ້ຽງວັນເກີດເມຍຂອງຜູ້ບາດເຈັບຢູ່ໜ້າບ້ານຕົນເອງ ສ່ວນເມຍຂອງຜູ້ບາດເຈັບທີ່ເປັນເຈົ້າຂອງວັນເກີດໄດ້ນັ່ງກິນຢູ່ກັບໝູ່ອີກກຸ່ມໜຶ່ງ ແລ້ວທັງສອງກໍໄດ້ຍ່າງເຂົ້າໄປໃນຫ້ອງຈຶ່ງເກີດການຜິດຖຽງກັນ ເຊິ່ງເພື່ອບ້ານກໍບໍ່ຮູ້ວ່າທັງສອງຜິດກັນຍ້ອນຫຍັງ ແຕ່ມາຮູ້ຕາມຫຼັງວ່າມາຈາກເລື່ອງ: ທີ່ເມຍເຮັດຕົ້ມຍຳໄວ້ໃຫ້ ແຕ່ຜູ້ເປັນຜົວພັດຢາກກິນເຂົ້າມັນໄກ່ ຈຶ່ງເປັນສາເຫດຂອງການຜິດຖຽງກັນໃນຄັ້ງນີ້.
ສຳລັບເຫດການດັ່ງກ່າວເຈົ້າໜ້າທີ່ຍັງບໍ່ໄດ້ແຈ້ງຂໍ້ຫາແຕ່ຢ່າງໃດ ເນື່ອງຈາກເປັນເລື່ອງຄອບຄົວ ຕ້ອງໄດ້ຖ້າໃຫ້ຜູ້ເປັນຜົວທີ່ໄດ້ຮັບບາດເຈັບ ໃຫ້ອາການດີຂຶ້ນກ່ອນ ຈຶ່ງຈະສາມາດແຈ້ງຈຸດປະສົງກ່ອນວ່າຈະດຳເນີນ ຫຼື ບໍ່?