ລູກຊາຍທໍລະພີ ກໍ່ເຫດພະຍາຍາມຄາຕະກຳພໍ່ຕົນເອງ ຍ້ອນບໍ່ມັກທີ່ພໍ່ຫ້າມມົ້ວສຸມຢາເສບຕິດ.
ວັນທີ 12 ມີນາ 2025 ຜ່ານມາ ປກສ ແຂວງຫົວພັນ ໄດ້ນໍາຕົວທ້າວຫຼວງ ອາຍຸ 23 ປີ ປະຊາຊົນ ບ້ານນອງເລົ່າ ເມືອງກວັນ ແຂວງຫົວພັນ ມາຈໍາລອງເຫດການຄືນກໍລະນີຜູ້ກ່ຽວໄດ້ກໍ່ເຫດພະຍາຍາມຂ້າພໍ່ຕົນເອງ ແລະ ຖືກຈັບຕົວໃນວັນທີ 28 ທັນວາ 2024 ຜ່ານມາ.
ທ້າວຫຼວງ ໄດ້ຮັບສາລະພາບວ່າ: ຕົນໄດ້ລົງມືພະຍາຍາມຂ້າພໍ່ຂອງຕົນເອງແທ້, ຍ້ອນໄດ້ເສບຢາເສບຕິດ ຜ່ານມາຜູ້ເປັນພໍ່ໄດ້ເຄີຍບອກສອນຕົນມາຫຼາຍຄັ້ງແລ້ວ ບໍ່ໃຫ້ໄປມົ້ວສຸມຢາເສບຕິດ ແລະ ຫຼິ້ນກິນຟູມເຟືອຍ ເຄີຍໃຊ້ອາລົມຮ້າຍ, ພ້ອມທັງປ່ອຍດ່າພໍ່ ແລະ ເວົ້າວ່າຈະລົງມືຄາຕະກໍາ ມາແລ້ວຫຼາຍຄັ້ງ.
ເຫດການວັນທີ 28 ທັນວາ 2024 ທ້າວຫຼວງ ຖືກພໍ່ເວົ້າໃຫ້ໃນຂະນະລົງມືຂ້າໝາ ຈຶ່ງຈັບເອົາມີດແທງຖືກເອິກເບື້ອງຊ້າຍຂອງພໍ່ຕົນເອງ ແລະ ໄດ້ຮັບບາດເຈັບສົມຄວນ. ຈາກນັ້ນ, ໄດ້ເອົາຕົວຫຼົບໜີເຂົ້າປ່າຂ້າງບ້ານ, ປກສ ບ້ານ ຕິດຕາມນໍາທ້າວຫຼວງ ໄດ້ປະມານ 2 ຊົ່ວໂມງ ຈຶ່ງສາມາດຈັບຕົວຜູ້ກ່ຽວສົ່ງຕົວມອບໃຫ້ເຈົ້າໜ້າທີ່ ປກສ ເມືອງກວັນ ດໍາເນີນຄະດີຕາມຂັ້ນຕອນຂອງກົດໝາຍ.
ສາເຫດ ແລະ ແຮງຈູງໃນການລົງມືກໍ່ເຫດ ຍ້ອນຜູ້ກ່ຽວເສບຢາເສບຕິດ ແລະ ບໍ່ມັກຄໍາບອກສອນຂອງພໍ່ ໃຫ້ຜູ້ກ່ຽວຢຸດເຊົາມົ້ວສຸມຢາເສບຕິດ.
ແຫຼ່ງຂ່າວ: ປກສ ຫົວພັນ