ປກສ ນະຄອນ ໄກສອນ ພົມວິຫານ ກັກຕົວເປົ້າໜາຍຄ້າຂາຍຢາເສບຕິດ
ວັນທີ 18 ກຸມພາ 2025 ຜ່ານມາ, ກອງບັນຊາການ ປກສ ນະຄອນ ໄກສອນ ພົມວິຫານ ແຂວງສະຫວັນນະເຂດ ໄດ້ກັກຕົວເປົ້າໜາຍຄ້າຂາຍຢາເສບຕິດ(ຢາບ້າ) ແລະ ສຶກສາອົບຮົມ ຜູ້ທີ່ ເສບຢາເສບຕິດ(ຢາບ້າ), ເຂົ້າຮ່ວມເປັນປະທານ ໂດຍ ພັຕ ສຸບັນ ສຸມະໂນ ຫົວໜ້າພະແນກຕຳຫຼວດ ປກສ ນະຄອນ ໄກສອນ ພົມວິຫານ, ມີນາຍຕຳຫຼວດທີ່ກ່ຽວຂ້ອງ, ນາຍບ້ານ, ຫົວໜ້າກອງຮ້ອຍ ປກຊ-ປກສ ບ້ານ ພໍ່ແມ່ຜູ້ປົກຄອງ ແລະ ກຸ່ມເປົ້າໝາຍເສບຢາເສບຕິດ ເຂົ້າຮ່ວມ.
ໃນພິທີເຈົ້າໜ້າທີ່ໃຫ້ຮູ້ວ່າ: ວັນທີ 04 ມັງກອນ 2025, ເຈົ້າໜ້າທີ່ໄດ້ຮັບຂໍ້ມູນຈາກພົນລະເມືອງດີວ່າ: ຢູ່ຖຽງນາຂອງປະຊາຊົນຢູ່ບ້ານຊອກ ນະຄອນໄກສອນ ພົມວິຫານ ເປັນບ່ອນຄ້າຂາຍຢາເສບຕິດ(ຢາບ້າ) ແລະ ມົ້ວສຸມເສບຢາເສບຕິດ, ເຈົ້າໜ້າທີ່ ຈຶ່ງໄດ້ເຂົ້າມ້າງຈຸດດັ່ງກ່າວ ໄດ້ກັກຕົວ ທ້າວ ເສົາມັງກອນ ຫຼື ເສົາ ອາຍຸ 29 ປີ ພ້ອມຂອງກາງຢາບ້າ ຈຳນວນ 70 ເມັດ ແລະ ນາງ ມຸກທະລາ ຫຼື ມຸກ ອາຍຸ 26 ປີ ພ້ອມຂອງກາງຢາໄອສ໌ 01 ຖົງນ້ອຍ ແລະ ໄດ້ກັກຕົວພວກມົ້ວສຸມເສບຢາຕິດ ໄດ້ທັງໜົດ 14 ຄົນ ຍິງ 1 ຄົນ.
ຫຼັງຈາກນັ້ນເຈົ້າໜ້າທີ່ຈຶ່ງໄດ້ວາງແຜນຂະຫຍາຍຜົນຫາຜູ້ຮ່ວມຂະບວນການ ແລະ ໄດ້ຮູ້ວ່າ: ຢາເສບຕິດ(ຢາບ້າ) ແມ່ນໄດ້ຊື້ມາຈາກທ້າວ ຫຳ ແຕ່ຜູ້ຖືກຫາໄດ້ເອົາຕົວຫຼົບໜີ ແລະ ໄດ້ເຂົ້າກວດຄົ້ນສະຖານທີ່ຈຶ່ງພົບຂອງກາງ ຢາບ້າ 649 ເມັດ ແລະ ເງິນສົດຈຳນວນໜຶ່ງ.
ສຳລັບກຸ່ມມົ້ວສຸມ 14 ຄົນ ແມ່ນໄດ້ສຶກສາອົບຮົມ, ກ່າວເຕືອນ ແລະ ຂຽນບົດບັນທືກ ຖ້າວ່າພວກກ່ຽວຍັງບໍ່ຢຸດເຊົ້າພົວພັນກັບຢາເສບຕິດຄືເກົ່າແມ່ນຈະໄດ້ປະຕິບັດຕາມລະບຽບ ແລະ ໄດ້ມອບໃຫ້ອໍານາດການປົກຄອງ ກໍຄືພໍ່-ແມ່ ເປັນຜູ້ສືບຕໍ່ສຶກສາອົບຮົມ ແລະ ຕິດຕາມ ການເຄື່ອນໄຫວຂອງກຸ່ມເປົ້າໝາຍ.
ແຫຼ່ງຂ່າວ: ຄວາມສະຫງົບ