ໃນວັນທີ 25-27 ກັນຍາ 2024 ທີ່ຫໍປະຊຸມແຫ່ງຊາດ, ກະຊວງພະລັງງານ ແລະ ບໍ່ແຮ່ (MEM) ຂອງ ສປປ ລາວ ຮ່ວມກັບ ສູນພະລັງງານອາຊຽນ (ACE) ໄດ້ເປັນເຈົ້າພາບຈັດກອງປະຊຸມພາກທຸລະກິດດ້ານພະລັງງານອາຊຽນ ຄັ້ງທີ 24 (AEBF-24) ກອງປະຊຸມດັ່ງກ່າວເປັນເວທີເສວະນາ ແລະ ແລກປ່ຽນຄວາມຮູ້ ລະຫວ່າງ ພາກລັດ, ນັກວິຊາການ, ຜູ້ນໍາດ້ານອຸດສາຫະກຳ, ນັກລົງທຶນ ແລະ ຜູ້ຊ່ຽວຊານດ້ານພະລັງງານ ຈາກບັນດາປະເທດໃນອາຊຽນ ເພື່ອປຶກສາຫາລື, ຮ່ວມມື ແລະ ຄົ້ນຄວ້າໃນການແກ້ໄຂດ້ານພະລັງງານໃຫ້ຍືນຍົງໃນອະນາຄົດຂອງອາຊຽນ.
ທ່ານ ສຸກວິສັນ ຄິນສະໝອນ ຮອງຫົວໜ້າກົມແຜນການ ແລະ ການຮ່ວມມື ກະຊວງພະລັງງານ ແລະ ບໍ່ແຮ່ ໄດ້ຂຶ້ນກ່າວໃນຕອນຕົ້ນຂອງງານວ່າ: ໂດຍການເປັນປະທານອາຊຽນ ຂອງ ສປປ ລາວ ພາຍໃຕ້ຄຳຂວັນ “ເພີ່ມທະວີການເຊື່ອມຈອດ ແລະ ຄວາມຍືນຍົງ ພວກເຮົາໄດ້ສະແດງໃຫ້ເຫັນເຖິງການຮ່ວມມືກັນໃນການຮັບປະກັນຄວາມປອດໄພໃຫ້ພະລັງງານຫັນເປັນສີຂຽວ ແລະ ແຫຼ່ງພະລັງງານແບບຍືນຍົງ, ພ້ອມກັນມີສ່ວນຮ່ວມ ເພື່ອສ້າງການປ່ຽນແປງທາງບວກດ້ານພະລັງງານ.
ກອງປະຊຸມ AEBF-24 ໃນຄັ້ງນີ້ ກາຍເປັນເວທີສໍາຄັນຂອງ ສປປ ລາວ ໃນຊຸກຍູ້ບູລິມະສິດດ້ານພະລັງງານ ລວມທັງການເພີ່ມທະວີຄວາມໝັ້ນຄົງ ໃນການສົ່ງເສີມພະລັງງານທົດແທນ ແລະ ການພັດທະນາການເຊື່ອມຈອດທາງດ້ານພະລັງງານໃນພາກພື້ນ ແລະ ຊ່ວຍໃຫ້ ສປປ ລາວ ກັບ ອາຊຽນ ກາຍເປັນຜູ້ນໍາພາສູ່ການປຶກສາຫາລື ກ່ຽວກັບການແກ້ໄຂບັນຫາພະລັງງານແບບຍືນຍົງ.
ທ່ານ ດຣ ແອນດີ້ ຕິຣ໌ຕາ ຫົວໜ້າຝ່າຍບໍລິຫານ ສູນພະລັງງານອາຊຽນ ທັງເປັນປະທານກອງປະຊຸມ AEBF-24 ໄດ້ກ່າວໃຫ້ຮູ້ວ່າວ່າ: ນີ້ເປັນຂີດໝາຍສຳຄັນໃນຄວາມພະຍາຍາມທີ່ຈະສືບຕໍ່ເພີ່ມທະວີການຮ່ວມມືໃນພາກພື້ນ ຂອງຂະແໜງພະລັງງານ, ເປັນເວທີສົນທະນາ ເພື່ອຊຸກຍູ້ການປະຕິບັດງານອາຊຽນ ການຮ່ວມມືດ້ານພະລັງງານ (APAEC) ຮ່ວມກັນ, ພວກເຮົາມີຄວາມມຸ່ງໝັ້ນດ້ານຄວາມປອດໄພທາງດ້ານພະລັງງານ ແລະ ການວາງພື້ນຖານສໍາລັບອະນາຄົດດ້ານພະລັງງານຍືນຍົງໃນອາຊຽນ.
ການຈັດງານໃນຄັ້ງນີ້ຈະມີບົດບາດອັນສຳຄັນເພື່ອຊຸກຍູ້ການປະຕິບັດອາຊຽນແຜນປະຕິບັດງານເພື່ອການຮ່ວມມືດ້ານພະລັງງານ (APAEC), ການມຸ່ງໝັ້ນຮ່ວມມືກັນເພື່ອຄວາມກ້າວໜ້າ ພ້ອມດ້ວຍຄວາມປອດໄພດ້ານພະລັງງານ ແລະ ຄວາມຍືນຍົງໃນທົ່ວພາກພື້ນອາຊຽນ.