ສຳນັກຂ່າວຕ່າງປະເທດລາຍງານໃນວັນທີ 25 ກັນຍາ 2024 ຜ່ານມານີ້ວ່າ, ຟາມໂຕແຂ້ແຫ່ງໜຶ່ງໃນຈັງຫວັດລຳພູນ ປະເທດໄທ ໄດ້ທຳການປິດຊີວິດໂຕແຂ້ໝົດທັງໝົດໃນຟາມເກືອບຮ້ອຍໂຕເນື່ອງຈາກຢ້ານນ້ຳຖ້ວມ ແລະ ເຮັດໃຫ້ແຂ້ຫຼຸດອອກມາກັດຄົນໃນພຶ້ນທີ່ດັ່ງກ່າວ.
ເຈົ້າຂອງຟາມໄດ້ລະບຸວ່າ: ໄດ້ຕັດສິນໃຈນຳໂຕແຂ້ພໍ່-ແມ່ ພັນທີ່ຢູ່ດ້ວຍກັນມາຕັ້ງແຕ່ທຳອິດເມື່ອ 17 ປີອອກຈາກອ່າງທັງໝົດ ເນື່ອງຈາກສະພາບອາກາດຮຸນແຮງໃນປີນີ້, ເຈົ້າຂອງຟາມໄດ້ປຶກສາຫາລືກັບຄອບຄົວ ແລະ ບຸກຄົນໃກ້ຊິດ ແລະ ໄດ້ຂໍ້ສະຫຼຸບວ່າການຕັດສິນໃຈຄັ້ງນີ້ເປັນທາງເລືອກທີ່ດີທີ່ສຸດໃນຕອນນີ້ ເພາະເປັນສິ່ງຈຳເປັນເພື່ອປ້ອງກັນບັນຫາທີ່ຈະເກີດຂຶ້ນໃນອານາຄົດ.
ເຊິ່ງການຕັດສິນໃຈດັ່ງກ່າວເຮັດໃຫ້ຟາມຈະບໍ່ໄດ້ມີການເກັບໄຂ່ໂຕແຂ້ໄວ້ ຫຼື ເຮັດລູກແຂ້ອີກຕໍ່ໄປໃນປີໜ້າ ເຈົ້າຂອງຟາມເຊື່ອວ່າຫຼັງຈາກຝົນຕົກໜັກແລ້ວ ສະພາບອາກາດຈະກັບມາດີຂຶ້ນ ແລະ ຄວາມຊຸ່ມໃນດິນຈະຫຼຸດລົງເຮັດໃຫ້ການເຮັດວຽກງ່າຍຂຶ້ນ.
ຢ່າງໃດກໍຕາມຫຼັງຈາກທີ່ໄດ້ເຜີຍແຜ່ຂໍ້ຄວາມດັ່ງກ່າວເຮັດໃຫ້ໄດ້ຮັບຄວາມສົນໃຈຫຼາຍຈາກສື່ສັງຄົມອອນລາຍ ໂດຍຫຼາຍຄົນກໍໄດ້ເຂົ້າມາສະແດງຄວາມເສຍໃຈ ແລະ ໃຫ້ກຳລັງໃຈເຈົ້າຂອງຟາມ ຢ່າງຫຼວງຫຼາຍ.
ແຫຼ່ງຂ່າວ: BRIGHT TV