ແນ່ນອນວ່າທຸກຄົນລ້ວນແຕ່ຢາກເປັນຄົນທີ່ໜ້າຄົບຫາ ແລະ ເປັນຄົນທີ່ມີສະເໜ, ດ້ວຍຄວາມພະຍາຍາມຕ່າງໆ ເພື່ອທີ່ຈະເຮັດໃຫ້ເບິ່ງເປັນຄົນດີໃນສາຍຕາຂອງຄົນອຶ່ນ, ເປັນຄົນໂອບອ້ອມອາລີ ແລະ ເອົາໃຈໃສ່ຜູ້ອຶ່ນແຕ່ກໍ່ຍັງມີອີກຫຼາຍໆຄົນ ທີ່ມີພຶດຕິກໍາບໍ່ຄອຍດີ ຈົນເຮັດໃຫ້ຄົນອຶ່ນຮູ້ສຶກອຶດອັດລໍາຄານ ແລະ ບໍ່ຢາກຈະຢູ່ໃກ້ໆ. ດັ່ງຕົວຢ່າງພຶດຕິກຳທີ່ບໍ່ເປັນຄົບຕໍ່ໄປນີ້, ຖ້າທ່ານກໍາລັງຈະມີພຶດຕິກໍາດັ່ງກ່າວກໍ່ຄວນແກ້ໄຂຢ່າງຮີບດ່ວນ ກ່ອນທີ່ໝູ່ເພື່ອນຂອງທ່ານຈະເລີ່ມຫ່າງຫາຍໄປຈາກທ່ານຈົນໝົດ.
1. ທ່ານຈົດຈໍ່ຢູ່ນໍາແຕ່ເລື່ອງຂອງຕົນເອງ
ຫຼາຍໆຄົນມັກຈະບໍ່ຮູ້ສຶກຕົວວ່າຕົນເອງກຳລັງມີພຶດຕິກຳດັ່ງກ່າວ ໂດຍສ່ວນໃຫຍ່ແລ້ວທ່ານຈະມັກແຕ່ສຸມໃສ່ແຕ່ເລື່ອງຂອງຕົນເອງ ແລະ ເວົ້າແຕ່ເລື່ອງສ່ວນຕົວຈົນບໍ່ສົນໃຈເລື່ອງຂອງຄົນອ້ອມຂ້າງ. ທ່ານຄິດວ່າໂລກໝູນອ້ອມຕົວທ່ານ ທ່ານເປັນສູນກາງຈັກກະວານ ແລະ ສໍາຄັນແຕ່ພຽງຜູ້ດຽວ. ຖ້າທ່ານຮູ້ສຶກວ່າທ່ານກໍາລັງມີພຶດຕິກໍາແບບນີ້ລະກໍ່ຮີບປ່ຽນດຽວນີ້ເລີຍ ເພາະບໍ່ມີໃຜຢາກຈະເປັນເພື່ອນກັບຄົນທີ່ແຄຣ໌ແຕ່ຕົວເອງຢ່າງດຽວດອກ!
2. ທ່ານໃຫ້ຄວາມສຳຄັນແຕ່ກັບຄວາມງາມພາຍນອກ ເລີຍບໍ່ສົນໃຈກັບຄວາມງາມທີ່ຈິດໃຈຈາກພາຍໃນ
ຄວາມງາມທີ່ແທ້ຈິງນັ້ນແມ່ນມາຈາກພາຍໃນທັງກາຍ ແລະ ໃຈຂອງທ່ານຕ່າງຫາກ ຮູບຮ່າງພາຍນອກບໍ່ຄວນເປັນສິ່ງທີ່ສໍາຄັນທີ່ສຸດໃນການຈະຕັດສິນຄົນດ້ານຄວາມງາມຊຶ່ງຄົນທີ່ບໍ່ເປັນຕາຄົບຫາກໍ່ມັກຈະຕັດສິນຄົນດ້ວຍຮູບຮ່າງພາຍນອກ. ສະນັ້ນ, ຄວນປຽນພຶດຕິກໍາຖ້າຫາກທ່ານເບິ່ງຄົນໃຫ້ທະລຸເຂົ້າໄປເຖິງຄວາມງາມໃນຈິດໃຈຂອງເຂົາໄດ້ ທ່ານກໍຈະໄດ້ມິດຕະພາບທີ່ຍາວນານກັບມາຈາກຄົນທີ່ເໝາະສົມແທ້ໆ ເລີຍລະ.
3. ທ່ານຄິດແຕ່ຈະແຂ່ງກັບຄົນອຶ່ນຕະຫຼອດເວລາ
ທ່ານເປັນຄົນປະເພດທີ່ວ່າຈະຕ້ອງເຮັດທຸກຢ່າງໃຫ້ດີກວ່າ ແລະ ຫຼາຍກວ່າຜູ້ອຶ່ນຢູ່ສະເໝີຫຼືບໍ່? ຖ້າແມ່ນ ສະນັ້ນ ທ່ານກໍ່ເປັນຄົນໜຶ່ງທີ່ບໍ່ຄ່ອຍໜ້າຄົບຫາແລ້ວລະ! ທ່ານຈະຕ້ອງເອົາ ໃຈເຂົາມາໃສ່ໃຈເຮົາ ແລ້ວປ່ອຍໃຫ້ໝູ່ຂອງທ່ານສະຫຼອງຄວາມສຳເລັດຕາມຄວາມສາມາດຂອງເຂົາ, ຖ້າໝູ່ຂອງທ່ານບອກວ່າເຂົາເອົາຊະນະຄວາມຢ້ານກົວບາງຢ່າງ ແລະ ປະສົບຄວາມສໍາເລັດໃນສິ່ງທີ່ຕັ້ງເປົ້າໝາຍໄວ້ແລ້ວ ທ່ານຈົ່ງຢ່າເຢາະເຢີນເຂົາ ເຊັ່ນວ່າ: ເຮັດໄດ້ພຽງແຕ່ສໍ່ານີ້ວ່າຂ້ອຍເຮັດໄດ້ດີກວ່ານີ້ອີກ, ແຕ່ຈົ່ງບອກໝູ່ວ່າ ນີ້ຄືໝູ່ເຮົາ ເຮົາພູມໃຈ ແລະ ດີໃຈນໍາ.
4. ທ່ານເຫັນເພື່ອນເໝືອນກັບວ່າເປັນສັດຕູ
ຄົນທີ່ບໍ່ຄ່ອຍເປັນຕາຄົບຫາມັກຈະເປັນຄົນທີ່ມີເລື່ອງກັບໝູ່ໄດ້ຕະຫຼອດເວລາແທນທີ່ໝູ່ກັນຈະຮັກກັນ ແລະ ຊ່ວຍເຫຼືອເຊິ່ງກັນແລະກັນ ຄົນເຫຼົ່ານີ້ມັກຈະແທງຂ້າງຫຼັງຂອງຕົນຢູ່ຢ່າງງຽບໆ ຈືໄວ້ເລີຍເພື່ອນຂອງທ່ານບໍ່ແມ່ນສັດຕູ ແຕ່ຄືພວກດຽວກັບທ່ານ.
5. ທ່ານຢາກໃຫ້ຄົນອຶ່ນເຫັນວ່າທ່ານສໍາຄັນຕະຫຼອດເວລາ
ທ່ານຈະກາຍເປັນຄົນທີ່ບໍ່ໜ້າຄົບຫາທັນທີ ຖ້າທ່ານເອົາແຕ່ຮຽກຮ້ອງໃຫ້ຄົນອຶ່ນມາສົນໃຈທ່ານ ໃນເມື່ອໝູ່ຂອງທ່ານບໍ່ໃຫ້ຄວາມສົນໃຈເທົ່າທີ່ທ່ານຕ່ອງການ ເຊັ່ນວ່າ: ໝູ່ຂອງທ່່ານ ສອງຄົນໄປໃສມາໃສໂດຍທີ່ບໍ່ບອກທ່ານ,
ພວກເຂົາບໍ່ຄິດຫຍັງເລີຍ ແຕ່ກົງກັນຂ້າມທ່ານກັບຄິດວ່າພວກເຂົາບໍ່ໃສ່ໃຈທ່ານແຕ່ນັ້ນເປັນແນວຄິດທີ່ບໍ່ດີຈົ່ງເຊົາຄິດຊະ! ເຖິງຢ່າງໃດພວກເຂົາກໍ່ຍັງເປັນເພື່ອນຂອງທ່ານ ແລະ ພວກເຂົາກໍ່ສາມາດຢູ່ໄດ້ໂດຍບໍ່ມີທ່ານ.
6. ທ່ານເປັນຄົນເຈົ້າກີ່ເຈົ້າການ
ເວລາຢູ່ຮ່ວມກັບໝູ່ຫຼາຍຄົນ ທຸກຄົນມີສິດເທົ້າທຽມກັນໃນການຊ່ວຍກັນອອກຄວາມຄິດເຫັນ ແລະ ຕັດສິນໃຈບໍ່ແມ່ນມີສິດແຕ່ພຽງທ່ານຜູ້ດຽວທີ່ຄອຍອອກຄຳສັ່ງ ແລະ ຕັດສິນໃຈແທ່ນຜູ້ອຶ່ນ ເຊິ່ງພຶດຕິກຳແບບນັ້ນມັນເປັນການສະແດງອອກທີ່ບໍ່ເໝາະສົມ.
7. ທ່່ານບໍ່ຈິງໃຈ
ຖ້າຫາກວ່າທ່ານຢາກເປັນມິດທີ່ດີຕໍ່ກັບໃຜຈັກຄົນ ຈົ່ງຈໍາໄວ້້ວ່າຕ້ອງຈິງໃຈກັບເຂົາໃຫ້ຫຼາຍທີ່ສຸດ ຄົນທີ່ບໍ່ມີໃຜຄົບຫາສ່ວນໃຫຍ່ຈະເປັນຄົນທີ່ມັກຕົວະ, ຫຼີກລ້ຽງຈະຕອບຄຳຖາມກ່ຽວກັບຕົນເອງ ແລະ ລວມໄປເຖິງບໍ່ຍອມເປີດເຜີຍຄວາມຮູ້ສຶກທີ່ແທ້ຈິງອອກມາໃຫ້ເພື່ອນໄດ້ຮັບຮູ້.
8. ທ່ານເປັນຄົນບໍ່ສຸພາບ
ຄວາມບໍ່ສຸພາບໃນທີ່ນີ້ໝາຍເຖິງ ການທີ່ທ່ານເອົາເລື່ອງຂອງໝູ່ໄປເວົ້າແລ້ວເຮັດໃຫ້ເຂົາອັບອ້າຍຂາຍໜ້າ ດ້ວຍຄຳເວົ້າທີ່ບໍ່ດີຂອງທ່ານ ເລີກຊະ! ເພາະມັນເປັນພຶດຕິກຳທີ່ບໍ່ດີເຮັດໃຫ້ຜູ້ອຶ່ນບໍ່ຢາກຢູ້ໄກ້ທ່ານ. ແນ່ນອນບາງຄັ້ງທ່ານອາດຈະບໍ່ເຫັນດີກັບໃຜບາງຄົນ ແຕ່ມັນກໍ່ບໍ່ມີປະປະໂຫຍດຫຍັງທີ່ຈະເຮັດໃຫ້ຄົນອຶ່ນມາຟັງແຕ່ທ່ານຄົນດຽວ ແລະ ມັນຍິ່ງເຮັດໃຫ້ທ່ານເປັນຄົນບໍ່ດີໃນສາຍຕາຂອງຄົນອຶ່ນ ເພາະວ່າຄວາມຄິດເຫັນຂອງຄົນອຶ່ນບໍ່ໄດ້ຄືກັບຄວາມຄິດຂອງທ່ານສະເໝີໄປ.
9. ທ່ານເອົາແຕ່ເພິ່ງພາຄົນອຶ່ນ ແຕ່ບໍ່ເຄີຍຕອບແທນເຂົາເລີຍ
ເວລາໝູ່ຂອງທ່ານຕົກທຸກໄດຍາກ ທ່ານເຄີຍຊ່ວຍເຫຼືອເຂົາຫຼືບໍ່? ຫຼືທ່ານມົວແຕ່ຫຍຸ້ງວຽກຢູ່ຕະຫຼອດເວລາຕອນທີ່ມີຄົນຕ້ອງການທ່ານ? ຖ້າຫາກທ່ານມີພຶດຕິກຳແບບນັ້ນກໍ່ຄົງຈະບໍ່ມີໃຜຢາກຢູ່ໃກ້, ຍິງໄປກວ່ານັ້ນຖ້າທ່ານເປັນຄົນທີ່ຄອຍແຕ່ຂໍຄວາມຊ່ວຍເຫຼືອຈາກຄົນອຶ່ນໂດຍທີ່ບໍ່ເຄີຍຊ່ວຍຄົນອຶ່ນເລີຍ ຍິ່ງບໍ່ມີໃຜທີ່ຈະຢາກເປັັນເພື່ອນກັບທ່ານເລີຍ.
10. ທ່ານເບິ່ງໂລກໃນແງ່ຮ້າຍຕະຫຼອດ
ຈົ່ງຢ່າເປັນຄົນທີ່ເບິ່ງທຸກສິ່ງໃນແງ່ລົບ ຈົ່ງປ່ຽນທັດສະນະຄະຕິນີ້ ຊະ! ເພາະບໍ່ມີໃຜຢາກເປັນເພື່ອນກັບຄົນທີ່ເຫັນແຕ່ສິ່ງບໍ່ດີຕະຫຼອດເວລາ ຈົ່ງຍີ້ມຮັບ ແລະ ເບິ່ງໂລກໃນແງ່ດີ ແລ້ວຄົນອຶ່ນຈະຍີ້ມແລະເບິ່ງກັບມາທີ່ຕົວທ່ານ.
ຖ້າມີຂໍ້ໃດທີ່ກົງກັບພຶດຕິກໍາຂອງທ່ານກໍ່ຮີບປ່ຽນ ຊະ! ກ່ອນທີ່ທ່ານຈະເສຍໝູ່ໄປອີກຫຼາຍຄົນກວ່ານີ້ ຫຼື ຖ້າໝູ່ຂອງທ່ານມີພຶດຕິກໍາທີ່ບໍ່ດີດັ່ງກ່າວກໍ່ຢ່າລືມແຊຣ໌ຄວາມຫວັງດີຕໍ່ໃຫ້ໝູ່ທ່ານດ້ວຍ.
ຂອບໃຈບົດຄວາມດີໆ ຈາກ: kiitdoo