ສຳນັກຂ່າວຕ່າງປະເທດລາຍງານໃນວັນທີ 20 ສິງຫາ 2024 ນີ້ກ່ຽວກັບສະຖານະການຂາດແຄນນ້ຳມັນຢ່າງຮຸນແຮງ ຢູ່ທີ່ລັດຊານ ທາງຕອນເໜືອຂອງປະເທດມຽນມາ ເຮັດໃຫ້ປະຊາຊົນພາກັນອອກມາຕໍ່ແຖວຍາວເປັນກິໂລກັນເພື່ອຕໍ່ແຖວກັນເຕີມນ້ຳມັນ ທ່າມກາງພາວະຂາດແຄນນ້ຳມັນຢ່າງຮຸນແຮງ ແລະ ພາວະເງິນເຟີ້ທີ່ພຸ່ງສູງທີ່ກຳລັງຢູ່ໃນພາວະສົງຄາມ.
ຕາມການລາຍງານໄດ້ລະບຸວ່າ: ເນື່ອງຈາກສະກຸນເງິນ ຈາດ ຂອງມຽນມາ ທີ່ອ່ອນຄ່າຮຸນແຮງໄດ້ສົ່ງຜົນກະທົບຕໍ່ການນຳເຂົ້າເຊື້ອໄຟທົ່ວປະເທດ ເຮັດໃຫ້ລັດຖະບານມຽນມາປະກາດວ່າ: ຈະປ່ອຍເງິນ 100 ລ້ານໂດລາສະຫະລັດເຂົ້າສູ່ລະບົບ ເພື່ອຊ່ວຍເຫຼືອຜູ້ນຳເຂົ້າໃນການຊື້ເຊື້ອໄຟ ແລະ ນ້ຳມັນ.
ຜູ້ບັນຊາການກອງທັບກ່າວໃນຖະແຫຼງການວ່າ: ທະນາຄານກາງມຽນມາ ໄດ້ຈັດກຽມເງິນ 100 ລ້ານໂດລາສະຫະລັດ ເພື່ອໃຊ້ກັບພາກສ່ວນນ້ຳມັນເຊື້ອໄຟໃນຕະຫຼາດເງິນຕາຕ່າງປະເທດແລ້ວ.
ທັງນີ້ເນື່ອງຈາກສະຖານະການສົງຄາມກາງເມືອງໃນມຽນມາ ທີ່ຍັງເກີດການສູ້ຮົບລະຫວ່າງຊົນເຜົ່າ ແລະ ທະຫານຝ່າຍລັດຖະບານ ຢູ່ຫຼາຍຈຸດ ກຳລັງສົ່ງຜົນກະທົບໃຫ້ການໃຊ້ຊີວິດໃນມຽນມາຍາກລຳບາກຫຼາຍຂຶ້ນ.