ສານຕັດສິນຕັດອິດສະລະພາບ ທ້າວ ເຕຍຫຼີ ຈຳຄຸກ 10 ປີ ຖານກະທຳຊຳເລົາເດັກນ້ອຍອາຍຸຕ່ຳກວ່າ 15 ປີ

0
123

ໃນວັນທີ 5 ມິຖຸນາ 2024 ຜ່ານມາ, ຄະນະສານອາຍາສານປະຊາຊົນຂັ້ນຕົ້ນແຂວງຊຽງຂວາງໄດ້ນຳຈຳເລີຍ 1 ຄົນມາຕັດສິນ, ຕັດອິດສະຫຼະພາບ ໃນຖານຂົ່ມຂືມກະທຳຊຳເລົາເດັກທີ່ມີອາຍຸຕ່ຳກວ່າ 15 ປີ.

ອີງຕາມຄຳຖະແຫຼງຂອງສານປະຊາຊົນ ແຂວງຊຽງຂວາງ ເຫັນວ່າ: ທ້າວເຕຍຫຼີ ອາຍຸ 29 ປີ ບ້ານໜອງເຮດໃຕ້ ເມືອງໜອງເຮດ ແຂວງຊຽງຂວາງ ຖືກເຈົ້າໜ້າທີ່ກັກຕົວ ໃນວັນທີ 8 ມັງກອນ 2024 ໃນຂໍ້ຫາກະທຳຊຳເລົາເດັກທີ່ມີອາຍຸ ຕ່ຳກວ່າ 15 ປີ ຜ່ານການຄົ້ນຄວ້າບັນດາຂໍ້ມູນ ຫຼັກຖານເອກະສານ ປະກອບຢູ່ສຳນວນຄະດີຢ່າງລະອຽດຖີ່ຖ້ວນຮອບດ້ານ ແລະ ພາວະວິໄສແລ້ວ ເຫັນວ່າຈຳເລີຍໄດ້ກະທຳຜິດ ສະຖານຂົ່ມຂືນທຳຊຳເລົາເດັກອາຍຸຕ່ຳກວ່າ 15 ປີ ເຊິ່ງຜູ້ເສຍຫາຍເປັນລູກລ້ຽງຂອງຕົນເອງພຽງອາຍຸ 13 ປີ, ການກະທຳດັ່ງກ່າວເປັນອັນຕະລາຍແກ່ສັງຄົມບໍ່ມີຄວາມສະຫງົບ.

ເຊິ່ງຈຳເລີຍເປັນຜູ້ທີ່ມີສະຕິສົມບູນດີ ຄາດຄະເນເຖິງຜົນສະທ້ອນທີ່ຈະເກີດຂຶ້ນກັບການກະທຳຂອງຕົນເອງ ແຕ່ກໍຈົງໃຈກະທຳຜິດໂດຍເຈດຕະນາການກະທຳຂອງຈຳເລີຍ ແມ່ນເປັນການກະທຳຜິດທາງອາຍາໃນຖານຂົ່ມຂືນທຳຊຳເລົາເດັກທີ່ມີອາຍຸຕ່ຳກວ່າ 15 ປີ ຕາມທີ່ບົ່ງບອກໄວ້ໃນມາດຕາ 248/3 ຂອງປະມວນກົດໝາຍອາຍາທີ່ລະບຸໄວ້ວ່າ: ໃນກໍລະນີທີ່ຜູ້ກະທຳຜິດຫາກຂົ່ມຂືນກະທຳຊຳເລົາເດັກທີ່ມີອາຍຸຕ່ຳກວ່າ 15 ປີ ແມ່ນຈະຖືກລົງໂທດຕັດອິດສະຫຼະພາບແຕ່ 10 ປີ-20 ປີ ຫຼື ຕັດອິດສະຫຼະພາບຕະຫຼອດຊີວິດ ແລະ ຈະຖືກປັບໄໝແຕ່ 10-70 ລ້ານກີບ ເມື່ອສານໄດ້ພິຈາລະນາຕາມຂໍ້ມູນຫຼັກຖານ ແລະ ກົດໝາຍແລ້ວຈຶ່ງໄດ້ເຫັນຄວນລົງໂທດຕັດອິດສະຫຼະພາບ ທ້າວ ເຕຍຫຼີ 10 ປີ ແລະ ປັບໄໝ 10 ລ້ານກີບ ພ້ອມທັງຈະໄດ້ປົວແປງຈິດໃຈໂຈດທາງແຜ່ງຕາມທີ່ໄດ້ກຳນົດໄວ້ໃນປະມວນກົດໝາຍຕື່ມອີກ.

ແຫຼ່ງຂ່າວ: ປກສ ແຂວງຊຽງຂວາງ