ໄລຍະ 4 ເດືອນຕົ້ນປີ 2024 ນີ້, ເມືອງວັງວຽງ ແຂວງວຽງຈັນ, ສາມາດດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ຫຼາຍກວ່າ 3 ແສນຄົນ, ຄາດວ່າໝົດປີນີ້ຈະບັນລຸເປົ້າ ບໍ່ຫຼຸດ 8 ແສນຄົນ.
ທ່ານ ບຸນຈັນ ມາລາວົງ ເຈົ້າເມືອງວັງວຽງ ໃຫ້ຮູ້ເມື່ອບໍ່ດົນມານີ້ວ່າ: ເພື່ອຮ້ອງຮັບບັນດານັກທ່ອງທ່ຽວ ທີ່ເດີນທາງເຂົ້າມາທ່ອງ ທ່ຽວວັງວຽງທີ່ນັບມື້ເພີ່ມຂຶ້ນ, ບັນດາຜູ້ປະກອບການ, ຫົວໜ່ວຍທຸລະກິດໂຮງແຮມ, ຣີສອດ, ຮ້ານອາຫານ, ສະຖານທີ່ທ່ອງທ່ຽວຕ່າງໆ, ລວມເຖິງກິດຈະກຳທາງນໍ້າ, ທາງບົກ ແລະ ທາງອາກາດ ກໍໄດ້ຮັບການປັບປຸງ ແລະ ຍົກລະດັບການບໍລິການ, ນອກຈາກນີ້, ກໍໄດ້ການສະກັດກັ້ນ ແລະ ຄຸ້ມຄອງລາຄາສິນຄ້າ ແລະ ການບໍລິການຕ່າງໆ, ແນໃສ່ຄຸ້ມຄອງປົກປ້ອງຜົນປະໂຫຍດຂອງຜູ້ບໍລິໂພກ ກໍຄື ບັນດານັກທ່ອງທ່ຽວ.