ປະຊາຊົນລາວສາມາດເດີນທາງໄປງານບຸນທາດພະນົມ, ຈັງຫວັດນະຄອນພະນົມ, ປະເທດໄທ ຜ່ານດ່ານປະເພນີປາກເຊບັ້ງໄຟ ເມືອງໄຊບູລີແຂວງ, ແຂວງສະຫວັນນະເຂດ ໄດ້ປົກກະຕິໃນມື້ນີ້.
ເນື່ອງຈາກກ່ອນໜ້ານີ້, ໄດ້ມີແຈ້ງການຂອງດ່ານ ຕມ ປາກເຊບັງໄຟ ເມືອງເຊບັ້ງໄຟ ອອກເມື່ອວັນທີ 22 ກຸມພາ 2024 ເລື່ອງ: ກໍລະນີເຈົ້າໜ້າທີ່ໄທບໍ່ອະນຸຍາດໃຫ້ປະຊາຊົນໄທຂ້າມມາຝັ່ງລາວ ແລະ ບໍ່ອະນຸຍາດໃຫ້ຄົນລາວຂ້າມໄປ. ໂດຍມີເນື້ອໃນວ່າ: ໃນເວລາ 10 ໂມງ 30 ນາທີ ຂອງວັນທີ 21 ກຸມພາ 2024 ໜ່ວຍງານກວດກາວິຊາສະເພາະປະຈໍາຢູ່ດ່ານ ຕມ ປາກເຊບັ້ງໄຟໄດ້ຮັບຂ່າວຈາກປະຊາຊົນລາວ ທີ່ຂ້າມໄປທ່ອງທ່ຽວງານທາດພະນົມ ວ່າທາງເຈົ້າໜ້ທີ່ຝັ່ງໄທບໍ່ ອະນຸຍາດໃຫ້ປະຊາຊົນຄົນໄທ ທີ່ຈະຂ້າມມາທ່ອງທ່ຽວງານຢູ່ຝັ່ງລາວ ຍ້ອນມບໍ່ເຂົ້າໃຈກັນເລື່ອງການຂັດຜົນປະໂຫຍດ, ໜ່ວຍປະສານລາວ-ໄທ ຍັງໄດ້ແຈ້ງວ່າ ວັນທີ 22 ກຸມພາ 2024 ຫ້າມບໍ່ໃຫ້ປະຊາຊົນຄົນລາວ ຂ້າມໄປທ່ອງທ່ຽວງານທາດພະນົມ ຊົ່ວຄາວ ຖ້າມີການປ່ຽນແປງຈະແຈ້ງໃຫ້ ຊາບຕາມພາຍຫຼັງ.
ຫຼ້າສຸດ, ວັນທີ 23 ກຸມພາ 2024, ຫ້ອງການ ທວຖ ເມືອງໄຊບູລີ ແຂວງສະຫວັນນະເຂດໄດ້ແຈ້ງໃຫ້ຮູ້ວ່າ: ງານທາດພະນົມມື້ນີ້ ເປີດໃຫ້ເດີນທາງປົກະຕິເດີ ສາມາດຂຶ້ນເຮືອໂດຍສານທີ່ດ່ານປະເພນີປາກເຊບັ້ງໄຟ ເມືອງໄຊບູລີ, ແຂວງສະຫວັນນະເຂດ. ສ່ວນປະຊາຊົນຝັ່ງໄທກໍ່ສາມາດຂື້ນເຮືອໂດຍສານມາທ່ຽວງານຝັ່ງລາວໄດ້ເຊັ່ນດຽວກັນ.