ພິທີເປີດງານວາງສະແດງ ແລະ ຈໍາໜ່າຍສິນຄ້າໃນງານບຸນນະມັດສະການພະທາດສີໂຄດຕະບອງປະຈໍາປີ 2024 ໄດ້ຈັດຂຶ້ນໃນວັນທີ 21 ກຸມພາທີ່ຜ່ານມາ ທີ່ບໍລິເວນເດີ່ນພະທາດສີໂຄດຕະບອງ, ເມືອງທ່າແຂກ ໂດຍການໃຫ້ກຽດເຂົ້າຮ່ວມຂອງທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ມີທ່ານ ບຸນມີ ພິມມະສອນ ປະທານສະພາປະຊາຊົນແຂວງ, ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄໍາມ່ວນ ປະທານຄະນະກໍາມະການຈັດງານບຸນພະທາດສີໂຄດຕະບອງປະຈໍາປີ 2024, ມີການນໍາຂັ້ນແຂວງ, ຕາງ ໜ້າຜູ້ປະກອບການ, ແຂກຖືກເຊີນກ່ຽວຂ້ອງເຂົ້າຮ່ວມ.
ທ່ານ ແກ້ວອຸດອນ ບຸດສິງຂອນ ກ່າວວ່າ: ການຈັດງານຄັ້ງນີ້ ເພື່ອເປັນການສົ່ງເສີມການຜະລິດ ແລະ ຊົມໃຊ້ຜະລິດຕະພັນພາຍໃນແຂວງໃຫ້ປະກົດຜົນເປັນຈິງ. ໂດຍສະເພາະຊຸກຍູ້ສົ່ງເສີມໃຫ້ກຸ່ມຜູ້ຜະລິດຕ່າງໆພາຍໃນແຂວງໃຫ້ເລັ່ງທຳການຜະລິດສິນຄ້າ ແລະ ພັດທະນາສິນຄ້າໃຫ້ຫຼາກຫຼາຍເພື່ອຕອບສະໜອງຄວາມຮຽກຮ້ອງຕ້ອງການຂອງຕະຫຼາດໃນແຕ່ລະໄລຍະ ແລະ ປຸກລະດົມປະຊາຊົນໃຫ້ມີສະຕິຫັນມາຊົມໃຊ້ຜະລິດຕະພັນພາຍໃນໃຫ້ຫຼາຍຂຶ້ນ.
ສິນຄ້າທີ່ນໍາມາວາງສະແດງຄັ້ງນີ້ ມີສິນຄ້າໂອດັອບ ແລະ ສິນຄ້າທ່າແຮງຂອງ 10 ຕົວເມືອງມີ 175 ລາຍການມູນຄ່າລວມທັງໝົດ 351.357.000 ກີບ ຊຶ່ງມີພາກລັດ, ຫົວໜ່ວຍທຸລະກິດ, ຜູ້ປະກອບການໃນທົ່ວແຂວງທີ່ເຂົ້າຮ່ວມໃນງານມີຈໍານວນ 265 ຫົວໜ່ວຍ, ຄາດວ່າຈະມີເງິນສະພັດບໍ່ຕໍ່າກວ່າ 10 ຕື້ກວ່າກີບ.
ໃນພິທີທ່ານເຈົ້າແຂວງຄໍາມ່ວນ ພ້ອມການນຳແຂວງໄດ້ຮ່ວມກັນຕັດແຖບຜ້າ, ລັ່ນຄ້ອງ 9 ບາດເພື່ອເປັນສິລິມຸງຄຸນໃຫ້ແກ່ການເປີດງານຄັ້ງນີ້. ຈາກນັ້ນ, ຄະນະນໍາ ແລະ ແຂກທີ່ເຂົ້າຮ່ວມງານໄດ້ຢ້ຽມຊົມງານຕະຫຼາດນັດຕື່ມອີກ.
ຂ່າວ-ພາບ: ແດງສະຫວັດ ແສນພານິດ