ຈາກກໍລະນີທີ່ມີປະຊາຊົນ ສ່ອງແສງຜ່ານສື່ສັງຄົມອອນລາຍ ໃນວັນທີ 5 ກຸມພາ 2024 ຜ່ານມາ, ໄດ້ພົບປາຕາຍຈຳນວນຫລາຍຢູ່ຫ້ວຍໜອງນໍ້າທຳມະຊາດ ເຂດບ້ານຄົກເຂົ້າດໍ ເມືອງຊະນະຄາມ ແຂວງວຽງຈັນ ໂດຍບໍ່ຮູ້ສາເຫດ, ສົ່ງຜົນກະທົບເຮັດໃຫ້ມີກິນເນົ່າາເໝັນ ເຊິ່ງເຫດການດັ່ງກ່າວເກີດຂຶ້ນຕັ້ງແຕ່ວັນທີ 2 ກຸມພາ 2024 ເປັນຕົ້ນມາ.
ຕໍ່ເຫດການທີ່ເກີດຂຶ້ນ, ທ່ານ ແກ້ວ ພິມມະວົງ ເຈົ້າເມືອງຊະນະຄາມ ໄດ້ຊີ້ແຈງໃນວັນທີ 7 ກຸມພາ 2024 ນີ້ວ່າ: ສາເຫດຂອງປາຕາຍແມ່ນເກີດມາຈາກອ່າງບໍາບັດນໍ້າເປື້ອນຂອງໂຮງງານມັນຕົ້ນແຫ່ງໜຶ່ງທີ່ກໍາລັງກໍ່ສ້າງຢູ່ເຂດໃກ້ຄຽງ ບໍ່ສາມາດຮອງຮັບນໍ້າໄດ້ຍ້ອນມີຝົນຕົກ ເຮັດໃຫ້ນໍ້າເປື້ອນລົ້ນອອກຈາກບໍ່ບໍາບັດທີ່ກໍາລັງກໍ່ສ້າງຢູ່ແລ້ວໄຫລລົງສູ່ຫ້ວຍທໍາມະຊາດທີ່ຢູ່ໃກ້ຄຽງ ຊຶ່ງເປັນຫ້ວຍນ້ອຍເຮັດໃຫ້ປາຕາຍຈໍານວນໜຶ່ງ ປັດຈຸບັນ, ພາກສ່ວນທີ່ກ່ຽວຂ້ອງກຳລັງ ປະເມີນຜົນເສຍຫາຍຢ່າງລະອຽດ ຊຶ່ງເຈົ້າຂອງໂຮງງານຮັບປາກຈະຮັບຜິດຊອບຜົນເສຍຫາຍທັງໝົດຢ່າງສົມເຫດສົມຜົນທັງສອງຝ່າຍ. ນອກຈາກນີ້ ອົງການປົກຄອງເມືອງ ໄດ້ແຈ້ງເຕືອນປະຊາຊົນບໍ່ໃຫ້ນໍາໃຊ້ນໍ້າໃນເຂດທີ່ມີປາຕາຍ ແລະ ຫ້າມທໍາມາຫາກິນໃນເຂດດັ່ງກ່າວເທື່ອໃນໄລຍະນີ້
ທ່ານຍັງໄດ້ກ່າວຕື່ມອີກວ່າ: ຫ້ວຍທີ່ມີປາຕາຍຍ້ອນນໍ້າເປື້ອນຈາກໂຮງງານມັນຕົ້ນ ເປັນຫ້ວຍນ້ອຍ ຊຶ່ງໃນໄລຍະຍາມແລ້ງມີນໍ້າບໍ່ຫລາຍ ແລະ ປະຊາຊົນບໍ່ໄດ້ທໍາການຜະລິດຢູ່ໃນເຂດໃກ້ຄຽງຈິ່ງບໍ່ມີຜົນກະທົບຕໍ່ຄົນ ແລະ ສັດຊະນິດອື່ນ ນອກຈາກມີປາຕາຍຈໍານວນໜຶ່ງເທົ່ານັ້ນ.
ທີ່ມາ: Lao Youth