ປກສ ນະຄອນ ໄກສອນ ພົມວິຫານ ສຸມໃສ່ໃນການຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ

0
1965

ໃນໄລຍະປີ 2021-2023, ກອງບັນຊາການ ປກສ ນະຄອນ ໄກສອນ ພົມວິຫານ ແຂວງສະຫວັນນະເຂດ ໄດ້ສຸມໃສ່ໃນການຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ດ້ວຍຄວາມຮັບຜິດຊອບສູງ ສາມາດຍາດໄດ້ຜົນງານ ແລະ ຜົນສໍາເລັດຫຼາຍດ້ານ.

ພັທ ຄໍາສີ ທູນທະວົງສັກ ຫົວໜ້າກອງບັນຊາການ ປກສ ນະຄອນໄກສອນ ພົມວິຫານ ໄດ້ໃຫ້ສໍາພາດຕໍ່ນັກຂ່າວກົມສື່ມວນຊົນ ປກສ ໃນວັນທີ 12 ທັນ ວາ ນີ້ວ່າ: ກອງບັນຊາການ ປກສ ນະຄອນໄກສອນພົມວິຫານ ໄດ້ເປັນເຈົ້າ ການປະຕິບັດຕາມ 3 ຫຼັກການ ແລະ 6 ວຽກຈຸດສຸມ ທີ່ກໍານົດໄວ້ໃນວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໂດຍໄດ້ຜັນຂະຫຍາຍເປັນແຜນງານອັນລະອຽດ, ຮັດກຸ່ມ ແລະ ຮອບດ້ານ ເຮັດໃຫ້ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ນັບແຕ່ປີ 2021-2023 ມີຜົນສໍາເລັດໂດຍພື້ນຖານ ໃນນີ້, ໄດ້ສໍາເລັດໃນການໂຄສະນາ, ສຶກສາອົບຮົມ ແລະ ເຜີຍແຜ່ບັນດາເອກະສານ ທີ່ກ່ຽວຂ້ອງກັບວາລະແຫ່ງ ຊາດ ວ່າດ້ວຍການແກ້ໄຂບັນຫາຢາເສບຕິດໃຫ້ຄະນະພັກຂັ້ນນະຄອນ, ກຸ່ມບ້ານ 13 ກຸ່ມ, ມີ 67 ບ້ານ, ມີຜູ້ເຂົ້າຮ່ວມທັງໝົດ 5.887 ຄົນ ຍິງ 2.819 ຄົນ, ໄດ້ລົງໂຄສະນາເຜີຍແຜ່ຜົນຮ້າຍໄພອັນຕະລາຍຂອງຢາເສບຕິດຢູ່ບັນດາໂຮງຮຽນ, ສະຖາບັນການສຶກສາ ໄດ້ 10 ຄັ້ງ ມີຜູ້ເຂົ້າຮ່ວມທັງໝົດ 1.625 ຄົນ, ຍິງ 1.295 ຄົນ, ໄດ້ລົງຊຸກຍູ້ວຽກງານກໍ່ສ້າງຮາກຖານການເມືອງ ເພື່ອສ້າງບ້ານປອດຢາເສບຕິດ ແລະ ບ້ານປ້ອງກັນຄວາມສະຫງົບດີ ໃຫ້ມີຄຸນ ນະພາບ; ວຽກງານການແກ້ໄຂຄະດີ ສາມາດແກ້ໄຂຄະດີຢາເສບຕິດໄດ້ທັງ ໝົດ 236 ເລື່ອງ, ກັກຕົວຜູ້ຖືກຫາ 628 ຄົນ ຍິງ 145 ຄົນ, ຢຶດຂອງກາງຢາບ້າ 1.113.097 ເມັດ, ຢາໄອ໌ 6 ຖົງໃຫຍ່ ກັບ 23 ຖົງນ້ອຍ, ຢາອີ 381 ເມັດ, ຢາເຄ 1 ຖົງໃຫຍ່ ກັບ 12 ຖົງນ້ອຍ, ນໍ້າໃບກະທ້ອມ 2.099 ລິດ ນອກນີ້ຍັງມີເຄື່ອງຂອງກາງ ແລະ ພາຫະນະ ທີ່ພົວພັນກັບຄະດີຢາເສບຕິດອີກຈໍານວນຫຼາຍລາຍການ.

ພັທ ຄໍາສີ ທູນທະວົງສັກ ຫົວໜ້າກອງບັນຊາການ ປກສ ນະຄອນ ໄກສອນ ພົມວິຫານ ຍັງໄດ້ໃຫ້ຮູ້ຕື່ມອີກວ່າ: ສໍາລັບທິດທາງແຜນການໃນຕໍ່ໜ້າຈະໄດ້ເອົາໃຈໃສ່ໃນການເຮັດວຽກງານໂຄສະນາສຶກສາອົບຮົມ ແລະ ປຸກລະດົມ ປູກຈິດສໍານຶກ ໃຫ້ທຸກພາກສ່ວນໃນສັງຄົມ ເຫັນໄດ້ເຖີງຄວາມໝາຍຄວາມສໍາຄັນຂອງການຈັດຕັ້ງປະຕິບັດວາລະແຫ່ງຊາດ ວາດ້ວຍການແກ້ໄຂບັນ ຫາຢາເສບຕິດ ໂດຍສະເພາະແມ່ນແຜນການສືບຕໍ່ວາລະແຫ່ງຊາດຂອງລັດຖະບານຈົນໄປເຖີງປີ 2025, ສຸມໃສ່ແກ້ໄຂບັນດາເປົ້າໝາຍທີ່ພົວພັນກັບຢາເສບຕິດໃຫ້ນັບມື້ຫຼຸດໜ້ອຍຖ້ອຍລົງ ໄປພ້ອມໆກັບການສ້າງຄອບ ຄົວ, ບ້ານ, ໂຮງຮຽນ, ສະຖາບັນການສຶກສາ ແລະ ບັນດາຂະແໜງການຕ່າງໆ ພາຍໃນນະຄອນ ໄກສອນ ພົມວິຫານ ໃຫ້ປອດຈາກຢາເສບຕິດ.

ທີ່ມາ: ຄວາມສະຫງົບ