ວິທະຍຸສາກົນ ແຫ່ງປະເທດຈີນ (CRI) ໄດ້ລາຍງານວ່າ: ນັບມາຮອດວັນທີ 2 ທັນວາ 2023, ທາງລົດໄຟ ຈີນ-ລາວ ເປີດນຳໃຊ້ຄົບຮອບ 2 ປີ. ໃນສອງປີຜ່ານມາ, ທາງລົດໄຟ ຈີນ-ລາວ ຂົນສົ່ງຜູ້ໂດຍສານໄດ້ 24,2 ລ້ານເທື່ອຄົນ ແລະໄດ້ຂົນສົ່ງສິນຄ້າ 29,1 ລ້ານໂຕນ, ໄດ້ເສີມຂະຫຍາຍບົດບາດທີ່ເປັນຊ່ອງທາງຄຳດ້ານການຂົນສົ່ງນັບມື້ນັບພົ້ນເດັ່ນຂຶ້ນ, ເພີ່ມພະລັງຊີວິດໃໝ່ໃຫ້ແກ່ການພັດທະນາເສດຖະກິດສັງຄົມຂອງພາກພື້ນ.
ໃນດ້ານການຂົນສົ່ງຜູ້ໂດຍສານ, ຈຳນວນຂົນສົ່ງຜູ້ໂດຍສານຂອງທາງລົດໄຟ ຈີນ-ລາວ ຈາກ 6 ແສນກວ່າເທື່ອຄົນຕໍ່ເດືອນ ໃນໄລຍະຫາກໍເປີດນຳໃຊ້ໄດ້ເພີ່ມຂຶ້ນເປັນ 1,1 ລ້ານກວ່າເທື່ອຄົນຕໍ່ເດືອນໃນປັດຈຸບັນ, ລວມທັງໝົດໄດ້ຂົນສົ່ງຜູ້ໂດຍສານ 24,2 ລ້ານເທື່ອຄົນ. ພ້ອມກັນນັ້ນ, ທາງລົດໄຟ ຈີນ-ລາວ ໄດ້ເປີດນຳໃຊ້ລະບົບຂາຍປີ້ດ້ວຍ APP ທາງໂທລະສັບມືຖື ແລະໄດ້ເພີ່ມຊ່ອງທາງຊຳລະເງິນແບບເອເລັກໂຕຣນິກຂອງທະນາຄານທ້ອງຖິ່ນ, ເຮັດໃຫ້ປະສົບການດ້ານການອອກເດີນທາງສະດວກຂຶ້ນຕື່ມອີກ.
ໃນດ້ານການຂົນສົ່ງສິນຄ້າ, ຂະບວນລົດໄຟຂົນສົ່ງສິນຄ້າຂ້າມຊາດ ຈາກ 2 ຂະບວນຕໍ່ວັນໃນໄລຍະຫາກໍເປີດນຳໃຊ້ໄດ້ເພີ່ມຂຶ້ນເປັນ 14 ຂະບວນຕໍ່ວັນໃນປັດຈຸບັນ; ສິນຄ້າເຫຼົ່ານີ້ສາມາດສົ່ງໄປເຖິງ 12 ປະເທດທີ່ຮ່ວມກັນສ້າງ ໜຶ່ງແລວໜຶ່ງເສັ້ນທາງ ເຊັ່ນ: ລາວ, ໄທ, ຫວຽດນາມ, ມຽນມາ ແລະອື່ນໆ ແລະ 31 ແຂວງ, ເຂດປົກຄອງຕົນເອງ ແລະກຳແພງນະຄອນຂອງຈີນ; ການຂົນສົ່ງສິນຄ້າຂ້າມຊາດ ຈາກ 10 ກວ່າຊະນິດໃນໄລຍະຫາກໍເປີດນຳໃຊ້ເພີ່ມຂຶ້ນເປັນ 2.700 ກວ່າຊະນິດໃນປັດຈຸບັນ, ໄດ້ຊຸກຍູ້ການຍົກລະດັບຂອງຂະແໜງການປະເພດຕ່າງໆຂອງປະເທດທີ່ຮ່ວມກັນສ້າງ ໜຶ່ງແລວໜຶ່ງເສັ້ນທາງ ແລະ ເພີ່ມການໄປມາຫາສູ່ກັນດ້ານເສດຖະກິດການຄ້າສາກົນ.
ໃນດ້ານການທ່ອງທ່ຽວ, ພາກສ່ວນທາງລົດໄຟທັງສອງປະເທດ ຈີນ-ລາວ ລາວ-ຈີນ ຕັ້ງໜ້າຮ່ວມມືກັບພາກສ່ວນທ່ອງທ່ຽວຂອງສອງປະເທດ, ໄດ້ເປີດເສັ້ນທາງທ່ອງທ່ຽວຫຼາຍເສັ້ນ ລະຫວ່າງ ນະຄອນຄຸນໝິງ ກັບນະຄອນຫຼວງວຽງຈັນ, ເຊິ່ງໄດ້ຊຸກຍູ້ໃຫ້ເສດຖະກິດທ່ອງທ່ຽວຂອງກິ່ງແຂວງສິບສອງພັ່ນນາ ຂອງຈີນ ແລະ ແຂວງຫຼວງພະບາງຂອງລາວ ພັດທະນາຢ່າງວ່ອງໄວ. ແຕ່ເດືອນມັງກອນ ຫາເດືອນກັນຍາ 2023, ນັກທ່ອງທ່ຽວຕ່າງປະເທດທີ່ໄປທ່ຽວປະເທດລາວ ໄດ້ບັນລຸເຖິງ 2,4 ລ້ານເທື່ອຄົນ, ເພີ່ມຂຶ້ນ 285% ເມື່ອທຽບໃສ່ໄລຍະດຽວກັນຂອງປີຜ່ານມາ.
ນອກນີ້, ທາງລົດໄຟ ຈີນ-ລາວ ໄດ້ອອກແຮງອົບຮົມຜູ້ມີຄວາມຮູ້ຄວາມສາມາດດ້ານທາງລົດໄຟໃຫ້ແກ່ປະເທດລາວ, ພະນັກງານລາວ 800 ກວ່າຄົນຂອງບໍລິສັດທາງລົດໄຟ ລາວ-ຈີນ ນັ້ນມີ 90% ຂຶ້ນໄປໄດ້ມີຕຳແໜ່ງງານແລ້ວ, ໄດ້ເຂົ້າຮ່ວມການດຳເນີນງານຂອງທາງລົດໄຟ ຈີນ-ລາວ ແລະ ກາຍເປັນຜູ້ມີຄວາມຮູ້ຄວາມສາມາດດ້ານເຕັກນິກທາງລົດໄຟຮຸ່ນທຳອິດຂອງປະເທດລາວ.
ອີງຕາມຕົວເລກສະຖິຕິທີ່ກ່ຽວຂ້ອງໃຫ້ຮູ້ວ່າ, ແຕ່ເດືອນມັງກອນ ຫາເດືອນສິງຫາປີນີ້, ມູນຄ່າການຄ້າລະຫວ່າງ ຈີນກັບລາວບັນລຸເຖິງ 4,39 ຕື້ໂດລາ, ທຽບໃສ່ໄລຍະດຽວກັນຂອງປີ 2022 ໄດ້ເພີ່ມຂຶ້ນ 410 ລ້ານໂດລາ, ເທົ່າກັບ 34%.
ປັດຈຸບັນ, ທາງລົດໄຟ ຈີນ-ລາວໄດ້ຕິດຕັ້ງເຄື່ອງຈັກໃຫ້ແກ່ການພັດທະນາຂະແໜງການຕ່າງໆທີ່ລຽບຕາມທາງລົດໄຟ ຈີນ-ລາວ, ທັງໄດ້ເພີ່ມພະລັງຊີວິດໃໝ່ໃຫ້ແກ່ການພັດທະນາເສດຖະກິດຂອງເຂດອາຊີຕາເວັນອອກສຽງໃຕ້. ຄຽງຄູ່ກັບການດຳເນີນງານຂອງທາງລົດໄຟ ຈີນ-ລາວ ໄດ້ຮັບການປັບປຸງໃຫ້ດີຂຶ້ນຢ່າງບໍ່ຢຸດຢັ້ງ, ທາງລົດໄຟ ຈີນ-ລາວ ຈະກາຍເປັນເສັ້ນທາງແຫ່ງການພັດທະນາ, ເສັ້ນທາງແຫ່ງການສ້າງຄວາມຜາສຸກ ແລະ ເສັ້ນທາງແຫ່ງມິດຕະພາບຂອງປະຊາຊົນທັງສອງປະເທດ ຈີນ-ລາວ ຢ່າງແນ່ນອນ.