ກອງປະຊຸມປຶກສາຫາລືກ່ຽວກັບການປະຕິສັງຂອນປະຕູໄຊ (ອານຸສາວະລີ) ຈັດຂຶ້ນວັນທີ 7 ພະຈິກ 2023 ທີ່ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ (ຍທຂ ນວ) ເປັນປະທານຂອງທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ມີບັນດາ ຫົວຫນ້າພະແນກການກ່ຽວຂ້ອງ ແລະ ປະທານບໍລິສັດ ລິດປັນຍາ ອອກແບບ-ກໍ່ສ້າງ ຈໍາກັດຜູ້ດຽວເຂົ້າຮ່ວມ.
ໃນກອງປະຊຸມຜູ້ເຂົ້າຮ່ວມໄດ້ປຶກສາຫາລື ບັນດາຫນ້າວຽກຕ່າງໆທີ່ກ່ຽວຂ້ອງກັບການປະຕິສັງຂອນປະຕູໄຊ ຜ່ານການປຶກສາຫາລືບັນດາຫນ້າ ວຽກແຕ່ລະດ້ານເຈົ້າຄອງນະຄອນຫຼວງວຽງຈັນໄດ້ມີທິດຊີ້ນໍາແຕ່ລະຫນ້າວຽກເຊັ່ນ ມອບໃຫ້ກອງບັນຊາການ ປກສ ນວ ຂຶ້ນແຜນກໍາລັງມາ ປ້ອງກັນໃນໄລຍະການປັບປຸງປະຕູໄຊຈົນກ່ວາຈະສໍາເລັດພ້ອມທັງຂຶ້ນແຜນງົບປະມານຕ່າງໆໃນໄລຍະປະຕິບັດງານ ມອບໃຫ້ຫ້ອງການ ຄຸ້ມຄອງ ແລະ ບໍລິຫານຕົວເມືອງນະຄອນຫຼວງວຽງຈັນ ຮັບຜິດຊອບມ້າງປະຕູມ້ວນເຫຼັກທາງຂຶ້ນປະຕູໄຊທັງ 4 ດ້ານ ພ້ອມທັງເຮັດ ເອກະສານຄ່າບໍລິການເຂົ້າຊົມປະຕູໄຊຈາກ 10.000 ກີບ ມາເປັນ 30.000 ກີບ ເຮັດອອກແຈ້ງການ ພ້ອມທັງກໍານົດວັນທີ່ເປີດເປັນທາງການ ແມ່ນກໍານົດເອົາ ວັນຊາດທີ 2 ທັນວາ 2023 ການປະສານງານໃຫ້ປຶກສາກັບພະແນກ ຖວທ ນວ ພະແນກການເງິນ ພະແນກແຜນການ ແລະ ການ ລົງທຶນ ເພື່ອຈັດລະບຽບການເຂົ້າຊົມສວນປະຕູໄຊ ພ້ອມທັງຄົ້ນຄ້ວາຜູ້ຮັບຜິດຊອບໃນການບໍລິການເປີດຟັງສຽງເປັນພາສາຕ່າງປະເທດ ແຕ່ລະຊັ້ນ ມອບໃຫ້ພະແນກການເງິນ ນວ ເປັນຜູ້ເຈລະຈາຕໍ່ລອງລາຄາກັບທາງບໍລິສັດ ພ້ອມທັງກວດກາຜົນສໍາເລັດແຕ່ລະຫນ້າວຽກພ້ອມທັງ ຊໍາລະເງີນຕາມຫນ້າວຽກຕົວຈິງ ການອອກແບບລາຍມອບໃຫ້ພະແນກ ຖວທ ນວ ສົມທົບກັບທີ່ປຶກສາສະຖາປະຕິຍະກໍາຕົບແຕ່ງ ປູພົມ ທາສີ ດອກໄຟ ຊັ້ນ 2 ແລະ ຊັ້ນ 3 ໃຫ້ສໍາເລັດ ມອບໃຫ້ພະແນກ ຍທຂ ນວ ແຕ່ງຕັ້ງຄະນະຮັບຜິດຊອບຄຸມງານເພື່ອຕິດຕາມທາງດ້ານເຕັກນິກ ການປັບປຸງປະຕູໄຊຈົນໂຄງການສໍາເລັດ ພ້ອມທັງປະສານກັບບໍລິສັດຮັບເຫມົາປັບປຸງປະຕູໄຊເຮັດປ້າຍວາຍນີວ (ຫ້າມເຂົ້າທາງໃນມີການ ປັບປຸງເພື່ອຄວາມປອດໄພຂອງຜູ້ມາທ່ຽວຊົມ) ມອບໃຫ້ພະແນກ ຍທຂ ນວ ຄົ້ນຄ້ວາທາງດ້ານເຕັກນິກພ້ອມທັງຢັ້ງຢືນມູນຄ່າການສ້ອມແປງ ທັງຫມົດ ແລະ ອອກອະນຸມັດໃບສັ່ງວຽກໃຫ້ບໍລິສັດດັ່ງກ່າວສາມາດດໍາເນີນການໂດຍໄວ ແລະ ອອກຂໍ້ຕົກລົງແຕ່ງຕັ້ງຄະນະຮັບຜິດຊອບຊີ້ນໍາທາງດ້ານເຕັກນິກປະຈໍາປະຕູໄຊໃນໄລຍະການກໍ່ສ້າງຈົນກ່ວາຈະສໍາເລັດ.
ນອກຈາກນີ້ກໍໄດ້ຊີ້ນໍາໃຫ້ບໍລິສັດບໍລິສັດລິດປັນຍາ ອອກແບບ-ກໍ່ສ້າງ ຈໍາກັດຜູ້ດຽວທີ່ເປັນບໍລິສັດ ຮັບເຫມົາຕ້ອງມີການກວດກາຫນ້າວຽກຕົວຈິງ ຈັດວາງເວລາຢ່າງລະອຽດໃນການເຮັດວຽກເພື່ອບໍ່ໃຫ້ລົບກວນ ແລະ ຮັບປະກັນຄວາມປອດໄພຂອງນັກທ່ອງທ່ຽວທີ່ເຂົ້າມາທ່ຽວຊົມບໍລິເວນ ສວນປະຕູໄຊ ຮັບປະກັນການຈັດຕັ້ງປະຕິບັດຫນ້າວຽກຕ່າງໆໃຫ້ສໍາເລັດຕາມແຜນການທີ່ວາງໄວ້ ຕ້ອງມີການກໍານົດຫນ້າວຽກທີ່ເປັນບູລິມະສິດຂອງໂຄງການພ້ອມທັງຮັບປະກັນດ້ານຄຸນນະພາບອີກດ້ວຍ.
ທີ່ມາ Vientiane Mai