Cook with Mr. International ຫຼື ແຮລິສ ບ່າວອາເມຣິກາເຊື້ອຊາດລາວ ໄດ້ຮັບກະແສຕອບຮັບເປັນຢ່າງດີໃນການເຮັດຄອນເທັ້ນກ່ຽວກັບການແຕ່ງກິນ ໂດຍສະເພາະການເຮັດອາຫານລາວ ພ້ອມທັງຍັງມີການເຜີຍແຜ່ວັດທະນະທຳລາວໃຫ້ຄົນອາເມຣິກາໄດ້ຮັບຮູ້ໄປພ້ອມກັນ.
ຈາກການສຳພາດຂອງ ລາວໂພສ ໄດ້ຮູ້ວ່າ: ແຮລິສ (Harriss) ເປັນຄົນອາເມຣິລາ ເຊື້ອຊາດລາວ ພໍ່ແມ່ເປັນຄົນລາວທັງສອງ ພໍ່ເປັນຄົນນະຄອນຫຼວງວຽງຈັນ ສ່ວນແມ່ເປັນຄົນແຂວງບໍລິຄຳໄຊ ສ່ວນແຮວລິສແມ່ນເກີດ ແລະ ເຕີບໃຫຍ່ຢູ່ອາເມຣິກາ.
ຈຸດເລີ່ມຕົ້ນຂອງການເຮັດຊ່ອງເຮັດອາຫານລາວນີ້ກໍຍ້ອນວ່າ ບໍ່ຄ່ອຍມີໃຜເຮັດອາຫານ ແບບລາວ-ອາເມຣິກາເລີຍ ຈຶ່ງເຮັດໃຫ້ມີຄວາມຄິດລິເລີ່ມທີ່ຈະເຮັດຊ່ອງທາງ TikTok ເພື່ອຊ່ວຍໂປຣໂມດ ແລະ ສອນອາຫານລາວແກ່ຄົນອາເມຣິກາ.
ໃນຄວາມສົນໃຈຂອງການເຮັດອາຫານລາວ ແມ່ນຕັ້ງແຕ່ຮຽນມັດທະຍົມຕອນປາຍ ກໍມັກສັງເກດໃນເວລາແມ່ແຕ່ງກິນ ເຊິ່ງແຮລິສກໍໄດ້ກຽມອາຫານຊ່ວຍແມ່ມາຕະຫຼອດ ຈົນເຖິງເວລາທີ່ຈະໄປຮຽນມະຫາວິທະຍາໄລກໍໄດ້ຮຽນຮູ້ວິທີເຮັດອາຫານລາວກິນເອງ.
ແຮງບັນດານໃຈໃນການເຮັດອາຫານລາວກໍຍ້ອນວ່າ ຮ້ານອາຫານລາວໃນອາເມຣິການີ້ຊອກຫາຍາກຫຼາຍ ແລ້ວອາຫານລາວທີ່ຕົນເອງມັກກໍແມ່ນ “ໝົກໄກ່” ແລະ ເກືອບຈະບໍ່ມີເມນູນີ້ໃນຮ້ານອາຫານລາວທີ່ອາເມຣິກາເລີຍ, ດັ່ງນັ້ນ ມັນຈຶ່ງເປັນແຮງບັນດານໃຈທີ່ແຮລິສ ຕ້ອງຮຽນຮູ້ ເຮັດອາຫານລາວ ແລະ ເມື່ອຢາກກິນອາຫານລາວກໍຕ້ອງແຕ່ງກິນດ້ວຍຕົນເອງ.
ຈາກການເຮັດຄອນເທັ້ນທີ່ໄດ້ເຜີຍແຜ່ທາງ TikTok ໂດຍມີບັນຊີື່ Cook with Mr. International ຕອນທຳອິດກໍບໍ່ໝັ້ນໃຈ ແຕ່ປັດຈຸບັນ ເນື່ອງຈາກມີຄວາມຊຳນານຂຶ້ນຕື່ມໃນການແຕ່ງກິນ ຈຶ່ງເຮັດໃຫ້ວິດີໂອທີ່ສະແດງອອກໄປນັ້ນມີຄວາມເປັນທຳມະຊາດ ແລະ ລຶ້ງເຄີຍໃນການແຕ່ງກິນຫຼາຍຂຶ້ນ.
ຈາກທີ່ເຮົາເຫັນແຕ່ ແຮລິສ ຢູ່ຄົນດຽວຕະຫຼອດໃນເວລາແຕ່ງກິນ ແມ່ນແຮສລິສເຮັດທຸກຢ່າງດ້ວຍຕົນເອງ ບໍ່ວ່າຈະເປັນການແຕ່ງກິນ ການຖ່າຍວິດີໂອ ລວມເຖິງການຕັດຕໍ່, ແຕ່ໃນເມື່ອກ່ອນແມ່ນພັນລະຍາເປັນຄົນຊ່ວຍຖ່າຍວິດີໂອ.
ກ່ຽວກັບການມາປະເທດລາວ ຄັ້ງຫຼ້າສຸດທີ່ແຮລິສກັບມາກໍແມ່ນປີ 2020 ເຊິ່ງກໍໄດ້ໄປສຳຜັດກັບວັດທະນະທຳ ອາຫານ ແລະ ດົນຕີລາວ.
ທ້າຍນີ້ ແຮລິສ ກໍຝາກມາບອກວ່າ: ຂອບໃຈສຳລັບທຸກໆການສະໜັບສະໜູນ ແລະ ດີໃຈຫຼາຍທີ່ມີຄົນອາເມຣິກາຈຳນວນຫຼາຍ ໄດ້ໄປລອງເຮັດອາຫານລາວ ຈາກການທີ່ໄດ້ມາເບິ່ງຊ່ອງຂອງຂ້ອຍໃນຕະຫຼອດຫຼາຍປີທີ່ຜ່ານມາ.
