ລັດຖະມົນຕີກະຊວງກະສິກຳຂອງອິນໂດເນເຊຍ ຍື່ນໜັງສືລາອອກຈາກຕຳແໜ່ງ ໃນຂະນະການສອບສວນຄະດີສໍ້ລາດບັງຫຼວງ ຮັບສິນບົນພິຈາລະນາເລື່ອນຕຳແໜ່ງທີ່ກະຊວງ.
ອີງຕາມ The JakartaPost ຂອງອິນໂດເນເຊຍ ໄດ້ລາຍງານວ່າ: ໃນວັນທີ 5 ຕຸລາ 2023 ທ່ານ ຊະຍາລຸນ ລິມໂປ ລັດຖະມົນຕີກະຊວງກະສິກຳຂອງອິນໂດເນເຊຍ ຍື່ນໜັງສືລາອອກຈາກຕຳແໜ່ງເຖິງປະທານາທິບໍດີ ໂຈໂກ ວິໂດໂດ ໂດຍໃຫ້ເຫດຜົນວ່າ ເພື່ອເປັນການຕັ້ງໃຈທີ່ຈະປະເຊີນກັບຄະດີສໍ້ລາດບັງຫຼວງທີ່ຖືກກ່າວຫາວ່າອາດຈະມີສ່ວນພົວພັນ ແລະ ກຳລັງເລີ່ມມີການສືບສວນຄະດີ ແລະ ຫວັງມວນຊົນຈະຖືວ່າລາວບໍລິສຸດຈົນກວ່າຈະມີຄຳຕັດສິນຂອງສານ.
ການລາອອກໃນຄັ້ງນີ້ ມີຂຶ້ນຫຼັງຈາກຄະນະກຳມະການປາບປາມການສໍ້ລາດບັງຫຼວງ ຫຼື KPK ເປີດເຜີຍວ່າ ມີການຕິດສິນບົນທີ່ກ່ຽວຂ້ອງກັບການພິຈາລະນາເລື່ອນຕຳແໜ່ງໃນກະຊວງກະສິກຳ ລວມເຖິງໂຄງການສໍ້ໂກງໃນນະຄອນຫຼວງຈາກາຕາ ປະເທດອິນໂດເນເຊຍ.
ກ່ອນໜ້ານີ້ ລິມໂປ ຢູ່ໃນລະຫວ່າງການຢ້ຽມຢາມ ອິຕາລີ ແລະ ສະເປນ ເມື່ອເຈົ້າໜ້າທີ່ເຂົ້າກວດບ້ານພັກຂອງລາວໃນນະຄອນຫຼວງຈາກາຕາກໍພົບປືນ 12 ກະບອກ ທະນາບັດຫຼາຍສະກຸນເງິນ ມູນຄ່າ 30.000 ລ້ານລູເປຍ ນອກນີ້ກໍຍັງຍຶດເອກະສານສຳຄັນຫຼາຍສະບັບ.