ເນື້ອຄູ່ນັ້ນ ຕາມຄວາມຈິງແລ້ວ ມີທັງຄູ່ບຸນຄູ່ບາບ ແລະມີທັງຄູ່ຢູ່ກິນນຳກັນຢ່າງມີຄວາມສຸກ ຖືໄມ້ເທົ້າຍອດທອງ ກະບອງຍອດເພັດ ມີລູກເຕັມບ້ານ ຫຼານເຕັມເມືອງ ແລະມີທັງຄູ່ທຸກຄູ່ຍາກ ຍິ່ງູຢູ່ຍິ່ງຍາກໄຮ້ເຂັນໃຈ ເຊິ່ງສາມາດຈຳແນກໄດ້ 4 ປະເພດຄື:

1. ເນື້ອຄູ່ແບບຜີຢູ່ກັບສາງ: ໝາຍເຖິງຄູ່ຄອງທີ່ທັງຍິງແລະຊາຍ ເປັນຄົນບໍ່ດີທັງສອງ ທັງຂີ້ລັກ ມັກເຫຼົ້າ ເຝົ້າການພະນັນ ມັກຫຼິນ ມັກທ່ຽວ ຂີ້ໂກງ ຫຼອກລວງ ຂີ້ຄ້ານ ບໍ່ຫາວຽກເຮັດ ແລະອື່ນໆ ເຂົ້າທຳນອງ ຍິງຮ້າຍ ຊາຍເລງ.

2. ເນື້ອຄູ່ແບບຜີຢູ່ກັບເທບ: ໝາຍເຖິງ ຝ່າຍຊາຍເປັນຄົນບໍ່ດີ ຫຼາຍໃຈ ຜິດສິນຕະຫຼອດ ມັກຂີ້ຕົວ ຫຼອກລວງ ການພະນັນ ກິນເຂົ້າ ສູບຢາ ມີເມຍນ້ອຍຫ້ອຍເມຍປາຍ ສາລະພັດຄວາມຊົ່ວ. ສ່ວນຝ່າຍຍິງເປັນຄົນຢູ່ໃນສິນກິນໃນທຳ ນິໄສໃຈຄໍດີ ອາດຈະຖືສິນເປັນປະຈຳ ບໍ່ມັກເຮັດບາບ ມັກໃຫ້ອະໄພ ອາດຈະເປັນຍິງທີ່ມາຈາກຄອບຄົວດີ ມີຖານະ ຮູບຮ່າງໜ້າຕາດີ ເຂົ້າທຳນອງ ຊາຍຊົ່ວກັບແມ່ພະ.

3. ເນື້ອຄູ່ແບບເທບຢູ່ກັບຜີ: ໝາຍເຖິງ ຝ່າຍຊາຍເປັນຄົນດີ ຢູ່ໃນສິນກິນໃນທຳ ມັກເຮັດບຸນ ສຳລວມວາຈາໃຈ ຮັກຄວາມສະຫງົບ ປ່ອຍວາງ ບໍ່ຫຼາຍໃຈ ໃຫ້ອະໄພສະເໝີ ມັກສຶກສາຫາຄວາມຮູ້ ເປັນຄົນທຳມະທຳໂມ ມັກໄປວັດຟັງທຳ. ສ່ວນຝ່າຍຍິງ ກົງກັນຂ້າມໝົດທຸກຢ່າງ ເອີ້ນໄດ້ວ່າ ເປັນຮອຍກ່ານດຳເທິງຜ້າຂາວ ເປັນນັກບຸນກັບຄົນບາບນັ້ນເອງ.

4. ເນື້ອຄູ່ແບບເທບຢູ່ກັບເທບ: ໝາຍເຖິງທັງຝ່າຍຍິງແລະຊາຍ ຕ່າງກໍເປັນຄົນດີ ມີສິນທຳ ປະຕິບັດທຳ ມັກການເຮັດບຸນສິນກິນທານ ມັກຊ່ວຍເຫຼືອສັງຄົມ ບໍ່ຕິດສຸລາ ຢາເມົາ ບໍ່ນອກໃຈກັນ ຄູ່ຊະນິດນີ້ສົມກັນ ເພິ່ນຈຶ່ງເອີ້ນວ່າ ຄູ່ສ້າງ ຄູ່ສົມ ຢູ່ນຳກັນແລ້ວມີຄວາມສຸກ ມີຄວາມຈະເລີນຮຸ່ງເຮືອງ ຜູ້ຄົນນັບໜ້າຖືຕາ.

ທ່ານຜູ້ອ່ານໄດ້ອ່ານໝົດແລ້ວ ລອງເບິ່ງໂຕເອງເບິ່ງ ວ່າຄູ່ຂອງທ່ານັ້ນ ຈັດຢູ່ໃນແບບໃດ?

ຖ້າອ່ານແລ້ວຮູ້ສຶກຈັ່ງໃດ ປະກອບຄຳຄິດເຫັນແດ່ເດີ! ແລະຢ່າລືມບອກໝູ່ເພື່ອນຂອງທ່ານ