ໃນລະຫວ່າງວັນທີ 6-8 ກັນຍາ 2023 ຜ່ານມາ, ເຈົ້າໜ້າທີ່ກວດກາການຄ້າ ພະແນກອຸດສາຫະກຳ ແລະ ການຄ້າແຂວງ ຮ່ວມກັບ ຫ້ອງການອຸດສາຫະກຳ ແລະ ການຄ້າເມືອງ ໄດ້ລົງກວດກາລາຄາ ແລະ ສິນຄ້າຢູ່ທີ່ຕະຫຼາດເທສະບານເມືອງດາກຈຶງ, ນຳໂດຍ ທ່ານ ເຮືອງເພັດ ໄຊພອນເຮືອງ ຮອງຫົວໜ້າຫ້ອງການອຸດສາຫະກຳ ແລະ ການຄ້າ ເມືອງດາກຈຶງ ແຂວງເຊກອງ.
ໃນການລົງເຄື່ອນໄຫວກວດກາຂອງເຈົ້າໜ້າທີ່ໃນຄັ້ງນີ້ ກໍເພື່ອເຮັດໃຫ້ວຽກງານຄຸ້ມຄອງ ແລະ ນໍາເຂົ້າສິນຄ້າຈາກຕ່າງປະເທດໃຫ້ຢູ່ໃນລະບຽບກົດໝາຍທີ່ໄດ້ກຳນົດໄວ້, ເຊິ່ງການລົງກວດກາຂອງເຈົ້າໜ້າທີ່ ໄດ້ກວດພົບປະເພດສິນຄ້າໝົດອາຍຸ ແລະ ເຊື່ອມຄຸນນະພາບ, ສິນຄ້ານອກລະບົບ ໃນເທສະບານເມືອງດາກຈຶງ ມີທັງໝົດ 11 ຮ້ານ, ພົບເຫັນສິນຄ້າໝົດອາຍຸ ແລະ ເຊື່ອມຄຸນນະພາບມີ 7 ລາຍການເປັນຕົ້ນ: ຢາສູບ, ເຂົ້າໝົມ, ໝີ່, ນໍ້າປາຫວຽດ, ຊ໋ອດຫມາກ, ຄະນໍປຸງລົດ ແລະ ປາແດກ ລວມມູນຄ່າທັງໝົດ 3.194.000 ກີບ.
ນອກຈາກນີ້ ຍັງໄດ້ຕິດຕາມ ກວດກາ ລາຄາສິນຄ້າໃນທ້ອງຕະຫຼາດສົດ ເຫັນວ່າການຂາຍປະເພດສິນຄ້າໃນບັນຊີຄວບຄຸມບັນຊີ(ກ)ຄື: ຊີ້ນງົວ, ຄວາຍປະເພດ1 ຂາຍລາຄາ 110.000ກີບ/ກິໂລ; ຊີ້ນງົວ, ຄວາຍປະເພດ2 ລາຄາ 100.000ກີບ/ກິໂລ; ຊີ້ນໝູປະເພດ1 ລາຄາ 75.000ກີບ/ກິໂລ; ຊີ້ນໝູປະເພດ2 ລາຄາ 70.000ກີບ/ກິໂລ; ເຂົ້າໜຽວປະເພດ2 ລາຄາສິນຄ້າໝົ້ 16.000ກີບ/ກິໂລ; ເຂົ້າຈ້າວປະເພດ2 ລາຄາ 18.000ກີບ/ກີໂລ; ປາດຸກພັນ ລາຄາ 43.000ກີບ/ກິໂລ, ເຊິ່ງເຫັນວ່າເປັນໄປຕາມກົນໄກຕະຫຼາດ; ມີຫົວໜ່ວຍທຸລະກິດປໍ້ານໍ້າມັນເຊື້ອໄຟ 2 ຫົວໜ່ວຍ ໄດ້ນຳນໍ້າມັນເຊື້ອໄຟມາຈາກບໍລິສັດເປໂຕດິແມັກຫວຽດນາມ ສາຂາແຂວງ ເຊກອງ ແລະ ແຂວງຈຳປາສັກ 16,000ລິດ/ອາທິດ ແລະ ຂາຍໃນໂຄງສ້າງລາຄາທີ່ກະຊວງອຸດສາຫະກໍາ ແລະ ການຄ້າ ແຈ້ງການອອກມາໃນແຕ່ລະໄລຍະ.
ຈາກນັ້ນ ເຈົ້າໜ້າທີ່ກວດກາການຄ້າ ກໍ່ໄດ້ສ້າງບົດບັນທຶກແນະນໍາຜູ້ດໍາເນີນທຸລະກິດການຄ້າຂາຍຄົນຕ່າງປະເທດທີ່ມາເຄື່ອນໄຫວບໍ່ຖືກຕ້ອງ, ບໍ່ສອດຄ່ອງຕາມລະບຽບກົດໝາຍ ໃຫ້ໄປອອກໃບດຳເນີນກິດຈະການການຄ້າພາຍໃນ ແລະ ໃບຕິດຕາມການຄ້າຂາຍຂອງຄົນຕ່າງປະເທດ ຢູ່ພະແນກ ອຸດສາຫະກໍາ ແລະ ການຄ້າແຂວງ ໃຫ້ຖືກຕ້ອງກ່ອນ ຈຶ່ງສາມາດດຳເນີນກິດຈະການຄ້າຂາຍໄດ້; ສຳລັບສິນຄ້າໝົດອາຍຸທາງເຈົ້າໜ້າທີ່ໄດ້ແຈ້ງໃຫ້ເຈົ້າຂອງຮ້ານຄ້າຮັບຊາບພ້ອມທັງສ້າງບົດບັນທຶກ ແລະ ນຳສິນຄ້າໝົດອາຍຸດັ່ງກ່າວເຂົ້າມາເກັບມ້ຽນໃນສາງຂອງຫ້ອງການອຸດສາຫະກໍາ ແລະ ການຄ້າເມືອງດາກຈຶງ, ລໍຖ້າການຈັດພິທີທຳລາຍຕໍ່ໄປ.
ທີ່ມາ: MediaLAOS